ଲଣ୍ଡନ: ବିଶ୍ବରେ ସଦାବେଳେ ଭାରତୀୟଙ୍କ ଜଲଓ୍ବା ଦେଖବାକୁ ମିଳିଛି। ପୁଣି ଜଣେ ଭାରତୀୟ ବିଦେଶରେ ନିଜର ଚମକ ଦେଖାଇଛନ୍ତି। ବ୍ରିଟେନରେ ଆୟୋଜିତ ସୁନ୍ଦରୀ ପ୍ରତିଯୋଗିତା ‘ମିସ୍ ଇଂଲଣ୍ଡ-୨୦୧୯’ ମୁକୁଟ ପିନ୍ଧି ସେ ଭାରତ ପାଇଁ ଗୌରବ ଆଣି ଦେଇଛନ୍ତି। ସେ ହେଉଛନ୍ତି ଡାକ୍ତର ଭାଷା ମୁଖାର୍ଜୀ। ଶୁକ୍ରବାର ସେ ଜୁନିଅର ଡାକ୍ତର ଭାବେ ନିଜର କ୍ୟାରିୟର ଆରମ୍ଭ କରିଛନ୍ତି। ଗୁରୁବାର ରାତିରେ ଅନୁଷ୍ଠିତ ଗ୍ରାଣ୍ଡ ଫିନାଲେରେ ସେ ଏହି ଟାଇଟଲ ହାସଲ କରିବା ପରେ ଡିସେମ୍ବରରେ ଅନୁଷ୍ଠିତ ହେବାକୁ ଥିବା ୬୯ତମ ମିସ୍ ୱାର୍ଲ୍ଡ ସୁନ୍ଦରୀ ପ୍ରତିଯୋଗିତାରେ ଅଂଶଗ୍ରହଣ କରିବେ। ଏହି ପ୍ରତିଯୋଗିତାର ଆୟୋଜନ ଏଥର ଲଣ୍ଡନରେ ହେବ।
୯ବର୍ଷ ବୟସରେ ଭାଷା ମୁଖାର୍ଜୀ ନିଜ ମା’ବାପାଙ୍କ ସହିତ ଲଣ୍ଡନ ଚାଲିଯାଇଥିଲେ। ବର୍ତ୍ତମାନ ତାଙ୍କ ବୟସ ୨୩ ବର୍ଷ। ଇଂଲଣ୍ଡର ପୂର୍ବ-ମଧ୍ୟ ଅଞ୍ଚଳରେ ଅବସ୍ଥିତ ଡରବୀରେ ରହୁଥିବା ଭାଷା ଗୁରୁବାର ରାତିରେ ଟାଇଟନ ହାସଲ କରିବାର କିଛି ଘଣ୍ଟା ପରେ ଶୁକ୍ରବାର ସେ ପିଲଗ୍ରିମ ହସ୍ପିଟାଲରେ ଡାକ୍ତର ଭାବେ ଚାକିରି ଜୀବନ ଆରମ୍ଭ କରିଛନ୍ତି। ମୁଁ ଦକ୍ଷିଣ-ଏସୀୟ ସମୁଦାୟ, ସଂଖ୍ୟାଲଘୁ ସମୁଦାୟ ଏବଂ ଡରବୀର ପ୍ରତିନିଧିତ୍ବ କରି ବହୁତ ଗର୍ବ ଅନୁଭବ କରୁଛି ବୋଲି ଟାଇଟଲ ଜିତିବା ପରେ ଭାଷା ଗଣମାଧ୍ୟମରେ କହିଛନ୍ତି।
Comments are closed.