ପୁଣି ଆମେରିକାର ଆକ୍ରମଣରେ ୬ ମୃତ

ବାଗଦାଦ: ଇରାକରେ ଲଗାତର ୨ୟ ଥର ଆମେରିକା ପକ୍ଷରୁ ଆକ୍ରମଣ କରାଯାଇଛି। ଉତ୍ତର ବାଗଦାଦର ତାଜି ରୋଡ୍‌ ନିକଟରେ ଆଜି ସକାଳେ ୨ଟି କାର୍‌କୁ ଟାର୍ଗେଟ କରି ଡ୍ରୋନ ଆକ୍ରମଣ କରାଯିବା ଫଳରେ ୬ ଜଣଙ୍କ ମୃତ୍ୟୁ ଘଟିଛି। ଯେଉଁ ରାସ୍ତାରେ ଆକ୍ରମଣ କରାଯାଇଛି ତାହା ରାସ୍ତା ଅଣଆମେରିକୀୟ ସେନାର ଘାଟିକୁ ଯାଇଛି। ପୂର୍ବରୁ ଗତ କାଲି ସକାଳେ ଇରାକର ରାଜଧାନୀ ବାଗଦାଦରେ ଥିବା ଏକ ବିମାନବନ୍ଦରରେ ଆମେରିକା ପକ୍ଷରୁ ଡ୍ରୋନ ଆକ୍ରମଣ କରାଯାଇଥିଲା। ଏଥିରେ ଇରାନ ସେନାର ବରିଷ୍ଠ କମାଣ୍ଡର କାସିମ ସୁଲେମାନିଙ୍କର ମୃତ୍ୟୁ ଘଟିଥିଲା। ସୁଲେମାନିଙ୍କ ଆକ୍ରମଣ ପରେ ଇରାନ ପ୍ରତିଶୋଧପରାୟଣ ହୋଇପଡ଼ିଛି। ଆମେରିକା ବିରୋଧରେ ଯୁଦ୍ଧ କରିବା ପାଇଁ ଇରାନ ପ୍ରସ୍ତୁତି ଚଳାଇଛି।

ଇରାକ୍‌ର ସରକାରୀ ଅଧିକାରୀଙ୍କ କହିବା ଅନୁସାରେ, ଆମେରିକା ପକ୍ଷରୁ ଶନିବାର ହୋଇଥିବା ଆକ୍ରମଣରେ ୨ଟି କାର୍‌କୁ ଟାର୍ଗେଟ କରାଯାଇଥିଲା। ଏହି କାରରେ ଇରାନ ସମର୍ଥିତ ସେନା ହଶଦ-ଅଲ-ସାବୀର ୬ ଯବାନ ରହିଥିଲେ। ହଶଦ-ଅଲ-ସାବୀର କମାଣ୍ଡରଙ୍କ କାର୍‌କୁ ଲକ୍ଷ୍ୟ କରି ଆମେରିକା ଏହି ଆକ୍ରମଣ କରିଥିଲା। ହଶଦ-ଅଲ-ସାବୀ ପପୁଲାର ମୋବିଲାଇଜେଶନ ଫୋର୍ସ(ପିଏମଏଫ) ନାମରେ ପରିଚିତ। ତେବେ କାରରେ ପିଏମଏଫର ବରିଷ୍ଠ କମାଣ୍ଡର ନ ଥିଲେ ବୋଲି ସଂଗଠନ ପକ୍ଷରୁ କୁହାଯାଇଛି। ଆକ୍ରମଣରେ ନିହତ ୬ ଜଣଙ୍କ ମଧ୍ୟରେ ଡାକ୍ତର ବି ସାମିଲ ଥିଲେ। ଏହି ଆକ୍ରମଣରେ ଅନ୍ୟ ୩ ଜଣ ଗୁରୁତର ଆହତ ହୋଇଛନ୍ତି। ଏହି ଆକ୍ରମଣ ପରେ ମଧ୍ୟ ପୂର୍ବରେ ପୂର୍ବାପେକ୍ଷା ଉତ୍ତେଜନା ଆହୁରି ବଢ଼ିଯାଇଛି।