ଇନ୍ଦିରାଙ୍କ ଭଳି ମହିଳାଙ୍କ ଗର୍ଭରୁ ବଳାତ୍କାରୀ ଜନ୍ମ ନିଅନ୍ତି: କଙ୍ଗନା

ମୁମ୍ବାଇ: ନିଜ ଫିଲ୍ମ ଏବଂ କଡ଼ା ବୟାନ ପାଇଁ ଅଭିନେତ୍ରୀ କଙ୍ଗନା ରାଣାୱତ୍ ସବୁବେଳେ ଚର୍ଚ୍ଚାରେ ରହିଥାନ୍ତି। ଦେଶରେ ଏବେ ନିର୍ଭୟାଙ୍କ ଦୋଷୀଙ୍କୁ ଫାଶୀ ଘଟଣାକୁ ନେଇ ଖୁବ୍ ଚର୍ଚ୍ଚା ଚାଲିଥିବା ବେଳେ କଙ୍ଗନା ବି ଏଥିରେ ସାମିଲ ହୋଇ ନିଜର କଡା ଆଭିମୁଖ୍ୟ ଜାହିର କରିଛନ୍ତି। ନିକଟ ଅତୀତରେ ବରିଷ୍ଠ ଆଇନଜୀବୀ ଇନ୍ଦିରା ଜୟସିଂହ ନିର୍ଭୟା ଦୋଷୀମାନଙ୍କୁ କ୍ଷମା ଦେଇ ଦେବାକୁ ନିର୍ଭୟାଙ୍କ ମା’ ଆଶା ଦେବୀଙ୍କୁ ପରାମର୍ଶ ଦେଇଥିଲେ। ସେ କହିଥିଲେ, “ଯେପରି ରାଜୀବ ଗାନ୍ଧୀଙ୍କ ହତ୍ୟାକାରୀଙ୍କୁ ସୋନିଆ ଗାନ୍ଧୀ କ୍ଷମା କରି ଦେଇଛନ୍ତି। ସେହିପରି ନିର୍ଭୟାଙ୍କ ମା’ ମଧ୍ୟ ଦୋଷୀମାନଙ୍କୁ କ୍ଷମା କରିଦେବା ଦରକାର।” ଏହି ମନ୍ତବ୍ୟ ପାଇଁ ତାଙ୍କୁ ବିଭିନ୍ନ ବର୍ଗର ଲୋକେ ସମାଲୋଚନା କରିଥିବା ବେଳେ କଙ୍ଗନା ଏନେଇ କଡ଼ା ମନ୍ତବ୍ୟ ଦେଇଛନ୍ତି।

ସେ କହିଛନ୍ତି, “ଇନ୍ଦିରା ଜୟସିଂହଙ୍କ ଭଳି ମହିଳାଙ୍କ ଗର୍ଭରୁ ବଳାତ୍କାରୀ ପୁରୁଷ ଜନ୍ମ ହୋଇଥା’ନ୍ତି। ଏଭଳି ମହିଳାଙ୍କୁ ବଳାତ୍କାରୀଙ୍କ ସହ ୪ ଦିନ ଜେଲ୍‌ରେ ରଖିବା ଉଚିତ୍। ’କଙ୍ଗନା ଆହୁରି କହିଛନ୍ତି, “ନିର୍ଭୟାଙ୍କ ମାତାପିତା ଏତେ ବର୍ଷ ହେଲା ନ୍ୟାୟ ପାଇଁ ସଂଘର୍ଷ କରୁଛନ୍ତି। କ’ଣ ଅବସ୍ଥା ହୋଇଗଲାଣି ସେମାନଙ୍କର। ଏହା କିଭଳି ସମାଜ, ଯେଉଁଠି ଲୋକ ଚୁପ୍‌ ରହୁଛନ୍ତି। ଯଦି ସମାଜରେ ଏକ ଉଦାହରଣ ନ ରଖିପାରୁଛ ତେବେ ସମାଜରେ ରହିବାର ଲାଭ କ’ଣ? ସେ ବଳତ୍କାରୀଙ୍କୁ ଛକ ମଝିରେ ବାନ୍ଧି ପିଟିବା ଉଚିତ୍‌।

ଇନ୍ଦିରାଙ୍କ ମନ୍ତବ୍ୟ ଉପରେ ନିର୍ଭୟାଙ୍କ ମା’ ମଧ୍ୟ କଡ଼ା ପ୍ରତିକ୍ରିୟା ରଖିଥିଲେ। ସେ ରାଗି ଯାଇ କହିଥିଲେ, “ଏଭଳି ପରାମର୍ଶ ଦେବାକୁ ଇନ୍ଦିରା ଜୟସିଂହଙ୍କର କେମିତି ସାହାସ ହେଲା? ସୁପ୍ରିମକୋର୍ଟରେ ଅନେକ ଥର ତାଙ୍କ ସହ ଏହି ମାମଲାରେ ଦେଖା ସାକ୍ଷାତ ହୋଇଛି। ହେଲେ କେବେ ମୋର ହାଲ୍‌ଚାଲ୍‌ ବାବଦରେ ପଚାରି ନାହାନ୍ତି। ଆଉ ଏବେ ଦୋଷୀଙ୍କ ସପକ୍ଷରେ କହୁଛନ୍ତି। ଏଭଳି ବ୍ୟକ୍ତି ଦୁଷ୍କର୍ମକାରୀଙ୍କୁ ସମର୍ଥନ କରି ନିଜ ଜୀବିକାକୁ ବଞ୍ଚାଇ ରଖୁଛନ୍ତି। ଆଉ ଏଥିପାଇଁ ପିଡ଼ୀତାମାନେ ନ୍ୟାୟ ପାଇପାରୁ ନାହାନ୍ତି।”