ଭ୍ୟାନ ଓ ଟ୍ରକ ମୁହାଁମୁହିଁ, ୭ ମୃତ

ଉନ୍ନାଓ : ଭ୍ୟାନ ଓ ଟ୍ରକର ମୁହାଁମୁହିଁ ଧକ୍କାରେ ଭ୍ୟାନରେ ନିଆଁ ଲାଗି ୭ ଜଣ ଲୋକ ଜିଅନ୍ତା ଜଳିଯାଇଛନ୍ତି। ଏଭଳି ଏକ ଲୋମହର୍ଷଣକାରୀ ଘଟଣା ଘଟିଛି ଉନ୍ନାଓ-ହରଦୋଇ ମାର୍ଗରେ ବାଙ୍ଗରମଉ କୋତବାଲୀ କ୍ଷେତ୍ର ଅନ୍ତର୍ଗତ ନସିରାପୁର ଗାଁ ନିକଟରେ। ମୃତକଙ୍କ ମଧ୍ୟରେ ଭ୍ୟାନରେ ଚାଳକ ସମେତ ୨ ଯୁବକ, ୨ ଶିଶୁ, ୨ ମହିଳା ସମେତ ମୋଟ ୭ ଜଣ ଥିଲେ ବୋଲି ଜଣାପଡ଼ିଛି।ଦୁର୍ଘଟଣା ସମୟରେ ମୁହଁମୁହିଁ ଧକ୍କା ହେବା ଫଳରେ ଏକ ଭୟଙ୍କର ଶବ୍ଦ ହେବାରୁ ସ୍ଥାନୀୟଲୋକେ ଘଟଣାସ୍ଥଳକୁ ଯାଇଥିଲେ।

ସୂଚନା ଯୋଗ୍ୟ, ଗତକାଲି ସନ୍ଧ୍ୟାରେ ଟ୍ରକ ଓ ଭ୍ୟାନ ମୁହାଁମୁହିଁ ଧକ୍କା ହେବା ପରେ ଗ୍ୟାସ ସିଲିଣ୍ଡରରେ ଚାଳିତ ହେଉଥିବା ଉକ୍ତ ଭ୍ୟାନରେ ନିଆଁ ଲାଗିଯିବାରୁ ପ୍ରାୟ ୭ ଜଣ ଲୋକେ ଜିଅନ୍ତା ଜଳିଯାଇଥିଲେ। ଭ୍ୟାନରେ ଖୁବ ଦ୍ରୁତ ଗତିରେ ନିଆଁ ବ୍ୟାପି ଯାଇ ସମ୍ପୂର୍ଣ୍ଣ ଭ୍ୟାନଟି ଜଳିଯାଇଥିଲା। ନିଆଁର ପ୍ରକୋପ ଏତେ ଅଧିକ ଥିଲା ଯେ, ସ୍ଥାନୀୟଲୋକେ ଭ୍ୟାନ ନିକଟକୁ ଯିବାମାତ୍ରେ ସେମାନଙ୍କ ଶରୀରରେ ମଧ୍ୟ ନିଆଁ ଧାସ ବାଜିଥିଲା। ନିଆଁର ମାତ୍ରା ଖୁବ ଅଧିକ ଥିବାରୁ ଓ ଧକ୍କା ଫଳରେ ଭ୍ୟାନର ଏକ ଅଂଶ ଟ୍ରକ ଭିତରକୁ ଥିବାରୁ ଟ୍ରକର ଏକ ଅଂଶରେ ମଧ୍ୟ ନିଆଁ ଲାଗି ଯାଇଥିଲା। ଖବର ପାଇ ୨ଟି ଦମକଳ ଗାଡ଼ି ଆସି ନିଆଁକୁ ଆୟତ୍ତ କରିଥିଲେ।