ଧାନ କଳରେ ଚୁଟି ପଶି ମହିଳା ଗୁରୁତର

ଆନନ୍ଦପୁର: ଧାନ କଳରେ ଚୁଟି ପଶି ଜଣେ ମହିଳା ଗୁରୁତର ଆହତ ହୋଇଛନ୍ତି। କେନ୍ଦୁଝର ଜିଲ୍ଲା ଘସିପୁରା ଥାନା ଅନ୍ତର୍ଗତ ଦରଡ଼ିପାଳ ଗାଁରେ ଏଭଳି ଘଟଣା ଘଟିଛି। ମହିଳାଙ୍କୁ ଗୁରୁତର ଅବସ୍ଥାରେ ପ୍ରଥମେ ଆନନ୍ଦପୁର ଏବଂ ଅବସ୍ଥା ଅଧିକ ଗୁରୁତର ହେବାରୁ କଟକ ସ୍ଥାନାନ୍ତର କରାଯାଇଛି। ମହିଳାଙ୍କ ନାଁ ସତ୍ୟଭାମା ରାଉତ।

ସୂଚନା ମୁତାବକ, ଆଜି ସକାଳେ ସତ୍ୟଭାମା ଗାଁରେ ଥିବା ହଲରକୁ ଧାନ ପେସିବାକୁ ଯାଇଥିଲେ। ମେସିନ୍‌ରେ ଧାନ ଢାଳୁଥିବା ବେଳେ ଅସାବଧାନତା କାରଣରୁ ତାଙ୍କ ଚୁଟି ମେସିନ୍‌ ବେଲ୍ଟ ସଂସ୍ପର୍ଶରେ ଆସି ଗୁଡ଼ାଇ ହୋଇ ଯାଇଥିଲା। ତାଙ୍କୁ ଉଦ୍ଧାର କରାଯାଇ ପ୍ରଥମେ ଆନନ୍ଦପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା ପରେ ତାଙ୍କୁ କଟକ ସ୍ଥାନାନ୍ତର କରାଯାଇଛି।