ଭାରତରେ ପ୍ରଥମ କରୋନା ମୃତ୍ୟୁ

ବେଙ୍ଗାଲୁରୁ: ଦେଶରେ ଆସ୍ତେ ଆସ୍ତେ ବ୍ୟାପୁଛି କେରୋନା ଭାଇରସ୍। ଏହାରି ମଧ୍ୟରେ କରୋନା ସଂକମ୍ରଣରେ ପ୍ରଥମ ଭାରତୀୟ ପ୍ରାଣ ହରାଇଛନ୍ତି। କର୍ଣ୍ଣାଟକରେ ଜଣେ ୭୬ ବର୍ଷୀୟ ବୟସ୍କ ବ୍ୟକ୍ତିଙ୍କ ମୃତ୍ୟୁ ହୋଇଛି। ଏ ନେଇ କେନ୍ଦ୍ର ସରକାର କହିଛନ୍ତି ଯେ ସେହି ବୟସ୍କ ରୋଗୀ ମଧୁମେହ, ଉଚ୍ଚ ରକ୍ତଚାପ ଓ ଆଜ୍‌ମା ରୋଗରେ ପୀଡିତ ଥିଲେ ଏବଂ ତାଙ୍କ ରକ୍ତ ନମୁନାରେ କରୋନା ଭୁତାଣୁ ସଂକ୍ରମଣ ହୋଇଥିବା ସ୍ପଷ୍ଟ ହୋଇଥିଲା। ସେ ଜାନୁଆରୀ ୨୯ରେ ସାଉଦି ଆରବ ଗସ୍ତ କରିଥିଲେ ଓ ଏକ ମାସ ପରେ ଅର୍ଥାତ ଫେବୃଆରୀ ୨୯ରେ ଭାରତ ଫେରିଥିଲେ। ଫେରିବା ସମୟରେ ତାଙ୍କ ଦେହରେ ଅସ୍ୱାଭାବିକ ଲକ୍ଷଣ ପ୍ରକାଶ ପାଇଥିଲା ଓ ସେ ଆସିବାର ଏକ ସପ୍ତାହ ପରେ ଜ୍ୱର ଏବଂ କାଶରେ ପୀଡିତ ହୋଇଥିଲେ।

The 76 year old man from Kalburgi who passed away and was a suspected COVID 19 patient has been Confirmed for COVID 19. The necessary contact tracing, isolation and other measures as per protocol are being carried out.

— K'taka Health Dept (@DHFWKA) March 12, 2020

ସମ୍ପୃକ୍ତ ୭୬ ବର୍ଷ ବୟସ୍କ ବ୍ୟକ୍ତିଙ୍କ ଉଚ୍ଚ ରକ୍ତଚାପ ଥିଲା ଏବଂ ସେ ଆଜ୍‌ମା ରୋଗରେ ମଧ୍ୟ ପୀଡିତ ଥିଲେ। ତେବେ ସେହି ବ୍ୟକ୍ତିଙ୍କୁ କାଲାବୁରାଗିର ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଡାକ୍ତରଖାନାରେ ପୀଡିତାଙ୍କୁ ମିଡ୍ ଜୋନ୍ ନିମୋନିଆ ସଂକ୍ରମଣ ହୋଇଥିବା ଜଣାପଡିବା ପରେ କରୋନା ସଂକ୍ରମଣ ସନ୍ଦେହ କରାଯାଇଥିଲା। ମାର୍ଚ୍ଚ ୯ରେ ତାଙ୍କ ଠାରୁ ରକ୍ତ ଓ ଲାଲ ସଂଗ୍ରହ କରାଯାଇ ପରୀକ୍ଷା ପାଇଁ ବେଙ୍ଗାଲୁରୁକୁ ପଠାଯାଇଥିଲା। ପରୀକ୍ଷା ଫଳାଫଳକୁ ଅପେକ୍ଷା ନକରି ସେହି ରୋଗୀଙ୍କ ସମ୍ପର୍କୀୟମାନେ ଡାକ୍ତରଙ୍କ କଥା ନ ମାନି ତାଙ୍କୁ ହାଇଦ୍ରାବାଦର ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଇଥିଲେ।

କର୍ଣ୍ଣାଟକ ସରକାର କହିଛନ୍ତି ଯେ ଜିଲ୍ଲାର ଡେପୁଟି କମିଶନରଙ୍କ ନିର୍ଦ୍ଦେଶ ଅନୁଯାୟୀ କାଲାବୁରାଗି ଜିଲ୍ଲା ସ୍ୱାସ୍ଥ୍ୟ ଅଧିକାରୀ ସେହି ରୋଗୀର ସମ୍ପର୍କୀୟଙ୍କୁ ଭେଟି ରୋଗୀଙ୍କୁ ଏକ ଅଲଗା ୱାର୍ଡକୁ ସ୍ଥାନାନ୍ତର କରିବାକୁ ଅନୁରୋଧ କରିଥିଲେ ମଧ୍ୟ ସମ୍ପର୍କୀୟମାନେ ରୋଗୀକୁ ହାଇଦ୍ରାବାଦ ନେଇଥିଲେ। ତେବେ ମାର୍ଚ୍ଚ ୧୦ରେ କାଲାବୁରାଗିସ୍ଥିତ ଡାକ୍ତରଖାନାକୁ ନେବା ବାଟରେ ତାଙ୍କର ମୃତ୍ୟୁ ଘଟିଥିଲା।