ବେଜିଂ: ସାରା ବିଶ୍ବ କରୋନା ଭୂତାଣୁକୁ ନେଇ ଆତଙ୍କିତ। ଅପରପକ୍ଷେ ଚୀନର ଉହାନ ସହରକୁ ବିଶ୍ୱ ମହାମାରୀ କରୋନାର କେନ୍ଦ୍ରସ୍ଥଳ ବୋଲି କୁହାଯାଉଛି। ଉହାନର ଗବେଷକମାନେ ଆକ୍ରାନ୍ତଙ୍କୁ ନେଇ ଏକ ଗବେଷଣା କରିଛନ୍ତି। କେଉଁ ବ୍ଲଡ ଗ୍ରୁପ ପ୍ରତି କରୋନା ଅଧିକ ବିପଦ ରହିଛି ସେ ନେଇ ଗବେଷଣା କରିଛନ୍ତି।
ଏହି ଗବେଷଣାରେ ବ୍ଲଡ ଗ୍ରୁପ ‘ଏ’ ଥିବା ବ୍ୟକ୍ତି କରୋନା ଭାଇରସ ଦ୍ୱାରା ଅଧିକ ସଂକ୍ରମିତ ହେବାର ସମ୍ଭାବନା ରହିଛି। ସେହିପରି ‘ଓ’ ବ୍ଲଡ ଗ୍ରୁପ ପ୍ରତି କରୋନା ଭାଇରସ ସଂକ୍ରମିତ ହେବାର ସମ୍ଭାବନା କମ୍ ରହିଛି ବୋଲି ଜଣାପଡ଼ିଛି। ଏ ନେଇ ବ୍ରିଟେନର ଦୈନିକ ଖବରକାଗଜ ଡେଲିମେଲରେ ଖବର ପ୍ରକାଶ ପାଇଛି।
ଏହି ବୈଜ୍ଞାନିକମାନେ ଉହାନରେ କରୋନାରେ ଆକ୍ରାନ୍ତ ହୋଇଥିବା ୨୧୭୩ ଜଣଙ୍କ ଉପରେ ଗବେଷଣା କରିଥିଲେ। ଉହାନର ତିନୋଟି ହସ୍ପିଟାଲରେ ଏହି ଆକ୍ରାନ୍ତମାନେ ଭର୍ତ୍ତି ହୋଇଥିଲେ। ଏଥିମଧ୍ୟରୁ ୨୦୬ ଜଣଙ୍କର ମୃତ୍ୟୁ ଘଟିଛି। ମୃତ ୨୦୬ ଜଣଙ୍କ ମଧ୍ୟରୁ ୮୫ ଜଣଙ୍କ ବ୍ଲଡ ଗ୍ରୁପ ‘ଏ‘ ବୋଲି ଜଣାପଡ଼ିଛି। ସେହିପରି ୫୨ ଜଣଙ୍କର ବ୍ଲଡ ଗ୍ରୁପ ‘ଓ‘ ରହିଛି।
ଏହାବାଦ୍ ମୋଟ୍ ୨୧୭୩ ଆକ୍ରାନ୍ତଙ୍କ ମଧ୍ୟରେ ବ୍ଲଡ ଗ୍ରୁପ ଏ ୩୨ ପ୍ରତିଶତ ରହିଥିବା ବେଳେ ବ୍ଲଡ ଗ୍ରୁପ ‘ଓ’ ୨୬ ପ୍ରତିଶତ ରହିଥିଲେ। ଏହି ରିପୋର୍ଟ ଆଧାରରେ ଗବେଷକମାନେ କହିଛନ୍ତି ଯେ, ବ୍ଲଡ ଗ୍ରୁପ ‘ଏ’ ପ୍ରତି କରୋନା ବିପଦ ଅଧିକ ରହିଥିବା ବେଳେ ଅନ୍ୟ ବ୍ଲଡ ଗ୍ରୁପ ପ୍ରତି କମ୍ ରହିଛି।
ଅପରପକ୍ଷେ ଏହି ରିପୋର୍ଟକୁ ନେଇ ଚୀନ ସରକାର କୌଣସି ସ୍ପଷ୍ଟୀକରଣ ରଖିନାହାନ୍ତି। ହେଲେ ଏହି ଗବେଷଣା ଆଗାମୀ ଦିନରେ ଗବେଷକଙ୍କ ପାଇଁ ଅଧିକ ଫଳପ୍ରଦ ହେବ ବୋଲି ଚୀନର ଲାବୋରେଟୋରୀ ଅଫ୍ ଏକ୍ସପେରିମେଣ୍ଟାଲ୍ ହେମାଟୋଲୋଜିର ବୈଜ୍ଞାନିକ ଗାଓ ୟିଙ୍ଗଦାଇ କହିଛନ୍ତି।
Comments are closed.