ଲମତାପୁଟ: ଆନ୍ଧ୍ରପ୍ରଦେଶ ଅଞ୍ଚଳରୁ ଛତିଶଗଡ଼ ଚାଲାଣ ବେଳେ ୭୦ ଲକ୍ଷ ଟଙ୍କାର ଗଞ୍ଜେଇ ଜବତ କରାଯାଇଛି। ଚୋରା ଚାଲାଣ ବେଳେ ୭ କ୍ବିଣ୍ଟାଇଲ ଗଞ୍ଜେଇ ଜବତ କରିଛି ମାଛକୁଣ୍ଡ ପୋଲିସ।
ମିଳିଥିବା ସୂଚନା ଅନୁସାରେ, ଏକ ନମ୍ବର ବିହୀନ ପିକଅପ୍ ଭ୍ୟାନରେ ଗଞ୍ଜେଇ ଚୋରା ଚାଲାଣ ନେଇ ବିଶେଷ ସୂତ୍ରୁ ଖବର ପାଇଥିଲା ମାଛକୁଣ୍ଡ ପୋଲିସ। ନନ୍ଦପୁର ଏସଡ଼ିପିଓ, ମାଛକୁଣ୍ଡ ଥାନା ଅଧିକାରୀ, ଲମତାପୁଟ ଫାଣ୍ଡି ଅଧିକାରୀ ଏବଂ ଜଲାପୁଟ ଫାଣ୍ଡି ଅଧିକାରୀ ୪ଟି ଟିମ୍ ଗଠନ କରି ମଟାମପୁଟ ଗାଁ ନିକଟରେ ଗାଡିକୁ ଅଟକାଇଥିଲେ। ତେବେ ପୋଲିସକୁ ଦେଖି ଡ୍ରାଇଭର ଘଟଣା ସ୍ଥଳରୁ ଗାଡି ଛାଡି ଫେରାର ହୋଇଯାଇଥିଲା।
ସେହି ଗାଡ଼ିକୁ ଜବତ କରି ଯାଞ୍ଚ କରିଥିଲା ପୋଲିସ। ଗାଡିରେ ବିପୁଳ ପରିମାଣର ଗଞ୍ଜେଇ ରହିଥିଲା। ଯାହାର ଆନୁମାନିକ ମୂଲ୍ୟ ୭୦ ଲକ୍ଷ ଟଙ୍କା ହେବ ବୋଲି ପୋଲିସ କହିଛି। ତେବେ ପିକ୍ ଅପ ଭ୍ୟାନରେ ନମ୍ବର ନଥିବାରୁ ଏହାର ପଞ୍ଜୀକରଣ ହୋଇଛି କି ନାହିଁ ସେ ନେଇ ମଧ୍ୟ ତଦନ୍ତ କରୁଛି ପୋଲିସ
Comments are closed.