ସେଣ୍ଟ୍ରାଲ ଭିଷ୍ଟା ପ୍ରକଳ୍ପ ରୋକିବା ଆବେଦନ ଖାରଜ, ଆବେଦନକାରୀଙ୍କୁ ଜୋରିମାନା ଲାଗୁ

ନୂଆଦିଲ୍ଲୀ: ସେଣ୍ଟ୍ରାଲ ଭିଷ୍ଟା ପ୍ରକଳ୍ପ କାମ ରୋକିବା ନେଇ ହୋଇଥିବା ଆବେଦନକୁ ଖାରଜ କରିଛନ୍ତି ଦିଲ୍ଲୀ ହାଇକୋର୍ଟ। କରୋନା ପାଇଁ ଦିଲ୍ଲୀ ଲକଡାଉନ ରହିଥିବା ବେଳେ ଏହି ପ୍ରକଳ୍ପ କାମ କିନ୍ତୁ ଚାଲୁ ରହିଥିଲା। ଯାହାକୁ ବିରୋଧ କରି ଅନ୍ୟ ମଲହୋତ୍ରା ଏବଂ ସୋହିଲ ହାସମି ପିଆଇଏଲ ଦାଖଲ କରିଥିଲେ। ଦିଲ୍ଲୀ ହାଇକୋର୍ଟ ଆବେଦନକୁ ଖାରଜ କରିବା ସହ ଆବେଦନକାରୀଙ୍କ ଉପରେ ଏକ ଲକ୍ଷ ଟଙ୍କାର ଜୋରିମାନା ଲାଗୁ କରିଛନ୍ତି ।

ହାଇକୋର୍ଟର ମୁଖ୍ୟ ବିଚାରପତି ଡି.ଏନ୍ ପଟେଲ ଏବଂ ଜଷ୍ଟିସ୍ ଜ୍ୟୋତି ସିଂଙ୍କ ଖଣ୍ଡପୀଠ ଏହି ଆବେଦନକୁ ଖାରଜ କରିଛନ୍ତି। ଦିଲ୍ଲୀ ହାଇକୋର୍ଟର ଏହି ବେଞ୍ଚ କହିଛନ୍ତି ଯେ, ଏହା ଦେଶର ସ୍ୱାର୍ଥ ଦୃଷ୍ଟିରୁ ଏକ ଅପରିହାର୍ଯ୍ୟ ପ୍ରକଳ୍ପ। ଆବେଦନକାରୀ ଯେଉଁ ଆଧାର ଦର୍ଶାଇ ପିଆଇଏଲ ଦାଖଲ କରିଛନ୍ତି ତାହା ଉଦ୍ଦେଶ୍ୟ ପ୍ରଣୋଦିତ। ଏହାକୁ ଜନସ୍ୱାର୍ଥ ମାମଲା କୁହାଯାଇପାରିବ ନାହିଁ ବୋଲି ଦିଲ୍ଲୀ ହାଇକୋର୍ଟ କହିଛନ୍ତି। ଏଥିସହ ଆବେଦନକାରୀଙ୍କୁ ୧ ଲକ୍ଷ ଟଙ୍କାର ଜୋରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ।

ପୂର୍ବରୁ ସୁପ୍ରିମକୋର୍ଟ ଏହି ଭିଷ୍ଟା ପ୍ରକଳ୍ପର କାମକୁ ଗ୍ରୀନ ସିଗନାଲ ଦେଇ ସାରିଛନ୍ତି। ଦିଲ୍ଲୀ ହାଇକୋର୍ଟ କହିଛନ୍ତି ଯେ, ନିର୍ମାଣ କାମରେ ନିୟୋଜିତ ଶ୍ରମିକମାନେ ଗୋଟିଏ ସ୍ଥାନରେ ରହୁଛନ୍ତି। ତେଣୁ ନିର୍ମାଣ କାମ ବନ୍ଦ କରିବାର କୌଣସି ଯଥାର୍ଥତା ନାହିଁ। ଏହା ଡିଡିଏମଏ ନିର୍ଦ୍ଦେଶର ନିର୍ମାଣରେ ଉଲ୍ଲଂଘନ ହେଉନାହିଁ।

ସୂଚନାଯୋଗ୍ୟ,ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗତ ବର୍ଷ ୧୦ ଡିସେମ୍ବରରେ ଏହି ପ୍ରକଳ୍ପର ମୂଳଦୁଆ ପକାଇଥିଲେ। ଏହି ପ୍ରକଳ୍ପର ମୂଲ୍ୟ ପ୍ରାୟ ୨୦,୦୦୦ କୋଟି ଟଙ୍କା ରହିଛି। ଏହି ପ୍ରକଳ୍ପ କାମ ଟାଟା ପ୍ରୋଜେକ୍ଟ ଲିମିଟେଡ୍ କରୁଛି। ଏହି ପ୍ରକଳ୍ପ ପାଇଁ ୯୭୧ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରାଯାଇଛି। ନୂଆ ସଂସଦ ଭବନ ତ୍ରିକୋଣୀୟ ଆକୃତିର ହେବ। ୨୦୨୨ ମସିହାରେ ଦେଶର ୭୫ ତମ ସ୍ୱାଧୀନତା ଦିବସ ସୁଦ୍ଧା ଏହା ପ୍ରସ୍ତୁତ ହେବ ବୋଲି ଆଶା କରାଯାଉଛି।