ଖୁବ୍ ଶୀଘ୍ର ଆସିବ ଦାଦାଙ୍କ ବାୟୋପିକ୍

ମୁମ୍ବାଇ: ଟିମ୍ ଇଣ୍ଡିଆର ବହୁ ପୂର୍ବତନ ଖେଳାଳିଙ୍କ ଉପରେ ବାୟୋପିକ୍ ପ୍ରସ୍ତୁତ ହୋଇଛି। ସଚିନ୍ ତେନ୍ଦୁଲକର, ମହେନ୍ଦ୍ର ସିଂ ଧୋନି ଓ ମହମ୍ମଦ ଆଝାରୁଦ୍ଦିନଙ୍କ ଭୂମିକାରେ ଅଭିନେତା ଅଭିନୟ କରି ଦର୍ଶକଙ୍କ ହୃଦୟ ଜିଣିଛନ୍ତି। ଏବେ ପୂର୍ବତନ କ୍ୟାପଟେନ୍ ସୌରଭ ଗାଙ୍ଗୁଲିଙ୍କ ଜୀବନୀ ଉପରେ ଫିଲ୍ମ ନିର୍ମାଣ ହେବାକୁ ଯାଉଛି। ବିସିସିଆଇ ଅଧ୍ୟକ୍ଷ ଓ ପୂର୍ବତନ କ୍ୟାପଟେନ୍ ଗାଙ୍ଗୁଲି ଏହି ପ୍ରୋଜେକ୍ଟ ପାଇଁ ହଁ କରିଛନ୍ତି।

ରିପୋର୍ଟ ମୁତାବକ, ଏହି ବିଗ୍ ବଜେଟ୍ ଫିଲ୍ମର ନିର୍ମାଣରେ ଖର୍ଚ୍ଚ ହେବ ୨୦୦ରୁ ୨୫୦ କୋଟି ଟଙ୍କା। ଏପରିକି ସୌରଭ ଗାଙ୍ଗୁଲିଙ୍କ ଏହି ବାୟୋପିକରେ ବଲିଉଡର ଜଣାଶୁଣା ଅଭିନେତା ରଣବୀର କପୁର ମୁଖ୍ୟ ଭୂମିକା ତୁଲାଇପାରନ୍ତି। ନ୍ୟୁଜ୍-୧୮ ସହ ସାକ୍ଷାତକାରରେ ଗାଙ୍ଗୁଲି କହିଛନ୍ତି, ହଁ ମୁଁ ବାୟୋପିକ୍ ପାଇଁ ରାଜି ହୋଇଛି। ଏହା ହିନ୍ଦିରେ ପ୍ରସ୍ତୁତ ହେବ, କିନ୍ତୁ ଏଯାଏ ନିର୍ଦ୍ଦେଶକଙ୍କ ନାଁ ସ୍ଥିର ହୋଇନାହିଁ। ସବୁକିଛି ଫାଇନାଲ୍ ହେବା ପାଇଁ ସମୟ ଲାଗିବ।

ରିପୋର୍ଟ ମୁତାବକ, ରଣବୀର କପୁର ଏହି ଗାଙ୍ଗୁଲିଙ୍କ ଭୂମିକା ତୁଲାଇବା ପାଇଁ ସର୍ବଶ୍ରେଷ୍ଠ ପସନ୍ଦ। କିନ୍ତୁ ଏହା ପୂର୍ବରୁ ନେହା ଧୂପିଆ ପ୍ରସ୍ତାବ ଦେଇଥିଲେ ଯେ ହ୍ରିତିକ ରୋଶନ ହିଁ ସୌରଭ ଗାଙ୍ଗୁଲିଙ୍କୁ ଭୂମିକା ପାଇଁ ଉପଯୁକ୍ତ।

ମିଳିଥିବା ଖବର ଅନୁଯାୟୀ, ଫିଲ୍ମର ସ୍କ୍ରିପ୍ଟ ଲେଖା ସରିଛି। ପ୍ରଡକ୍ସନ୍ ହାଉସ୍ ମଧ୍ୟ ଗାଙ୍ଗୁଲିଙ୍କୁ ଏକାଧିକ ଥର ସାକ୍ଷାତ କରିସାରିଛନ୍ତି। ଏକତା କପୁରଙ୍କ ଠାରୁ ଆରମ୍ଭ କରି ଫକ୍ସ ଷ୍ଟାର୍ ଷ୍ଟୁଡିଓଜ ଭଳି ପ୍ରଡକ୍ସନ୍ ହାଉସ୍ ଦାଦାଙ୍କ ବାୟୋପିକକୁ ନେଇ ଆଗ୍ରହ ଦେଖାଇଛନ୍ତି। ସେମାନେ ଦାଦାଙ୍କୁ ଫିଲ୍ମରେ କାମ କରିବା ପାଇଁ ମଧ୍ୟ ଅଫର୍ ଦେଇଥିଲେ, କିନ୍ତୁ ଗାଙ୍ଗୁଲି ଏହାକୁ ସ୍ୱୀକାର କରିନଥିଲେ। କିନ୍ତୁ ଏଥର ସୌରଭ ଗାଙ୍ଗୁଲି ରାଜି ହୋଇଛନ୍ତି।