ନବ ଦାସ ହତ୍ୟାକାଣ୍ଡ : ପୁଣି ୫ଦିନ ରିମାଣ୍ଡରେ ଯିବ ଗୋପାଳ 

ଓଏଲ୍‌ ବ୍ୟୁରୋ : ବହୁ ଚର୍ଚ୍ଚିତ ସ୍ୱାସ୍ଥ୍ୟ ମନ୍ତ୍ରୀ ନବ ଦାସଙ୍କ ହତ୍ୟା ମାମଲାକୁ ନେଇ କ୍ରାଇମବ୍ରାଞ୍ଚ ଜାରି କରିଛି ତଦନ୍ତ। ଅଭିଯୁକ୍ତ ଗୋପାଳକୁ ଗିରଫ କରି ତଦନ୍ତ କରୁଥିବାବେଳେ ତାଙ୍କୁ ରିମାଣ୍ଡରେ ନେଇ ଜେରା କରୁଛି କ୍ରାଇମବ୍ରାଞ୍ଚ। ଆଜି ଗୋପାଳର ରିମାଣ୍ଡର ଅବଧି ଶେଷ ହୋଇଥିବାବେଳେ ପୁଣିଥରେ ତାକୁ ରିମାଣ୍ଡରେ ନେବାକୁ କୋର୍ଟ ଅନୁମତି ପ୍ରଦାନ କରିଛି। ଗୋପାଳର ୫ଦିନ ପାଇଁ ରିମାଣ୍ଡ ଅବଧି ବୃଦ୍ଧି ହୋଇଥିବାବେଳେ ତାଙ୍କର ନାର୍କୋ ଟେଷ୍ଟ ଏବଂ ପଲିଗ୍ରାଫ ଟେଷ୍ଟ କରାଯିବାକୁ ଅନୁମତି ପ୍ରଦାନ କରିଛି କୋର୍ଟ। ନାର୍କୋ ଟେଷ୍ଟ ଏବଂ ପଲିଗ୍ରାଫ ଟେଷ୍ଟ ପାଇଁ ସହମତି ଦେଇଛି ଗୋପାଳ।

ସୂଚନା ଅନୁସାରେ, ଗତ ୨୯ରେ ବ୍ରଜରାଜନଗର ଗାନ୍ଧି ଛକରେ ସ୍ୱାସ୍ଥ୍ୟ ମନ୍ତ୍ରୀ ନବ ଦାସଙ୍କୁ ଦିନ ଦିବାଲୋକରେ ଏବଂ ଲୋକଲୋଚନାରେ ଗୁଳି କରିଥିଲେ ପୁଲିସ କର୍ମଚାରୀ ଗୋପାଳ। ସ୍ୱାସ୍ଥ୍ୟ ମନ୍ତ୍ରୀଙ୍କୁ ଜଣେ ପୁଲିସ ଅଧିକାରୀ ମାରିବା ପରେ ବିଭିନ୍ନ ମହଲରେ ଚର୍ଚ୍ଚା ଜୋର ଧରିଛି। ଅଭିଯୁକ୍ତ ଗୋପାଳଙ୍କୁ ପୁଲିସ ଗିରଫ କରିଥିବାବେଳେ ରିମାଣ୍ଡରେ ନେଇ ତଦନ୍ତ କରୁଛି କ୍ରାଇମବ୍ରାଞ୍ଚ।

ଗତକାଲି ହତ୍ୟାକାଣ୍ଡର ତଦନ୍ତ ପାଇଁ ଗୋପାଳଙ୍କୁ ନେଇ ବ୍ରଜରାଜନଗରରେ ପହଞ୍ଚିଥିଲା କ୍ରାଇମବ୍ରାଞ୍ଚ। ନବ ଦାସଙ୍କ ହତ୍ୟାର କ୍ରାଇମ୍ ସିନ୍ ରିକ୍ରିଏସନ ହୋଇଥିଲା। ହତ୍ୟାକାଣ୍ଡ ସ୍ଥଳରେ ପହଂଚିଥିଲେ ବ୍ରଜରାଜନଗର ଥାନା ଆଇଆଇସି। ବ୍ରଜରାଜନଗର ପୋଲିସ ସହ ଫୋର୍ସ ସୁରକ୍ଷା ପାଇଁ ପହଞ୍ଚିଥିଲେ। ତେବେ କିଭଳି ଓ କେମିତି ଅତି ପାଖରୁ ନବ ଦାସଙ୍କୁ ଗୁଳି କଲା ଗୋପାଳ ଦାସ ତାହାର ସିନ୍ ରିକ୍ରିଏସନ କରାଯାଇଥିଲା। ଖେଳନା ବନ୍ଧୁକ ଧରି ଦେଖାଇଥିଲା ଅଭିଯୁକ୍ତ ଗୋପାଳ। କେମିତି ନବ ଦାସଙ୍କୁ ଗୁଳି ମାଡ଼ କରିଥିଲା ଗୋଟି ଗୋଟି କରି ସବୁ କିଛି ଦେଖାଇଥିଲା ଅଭିଯୁକ୍ତ ଗୋପାଳ। ଗୁଳି ମାଡ଼ ପରେ ଫାଙ୍କା ଗୁଳି ଚଲାଇ ବି ଦେଖାଇଥିଲା।