‘ରାଜ୍ୟରେ ୯୭ ପ୍ରତିଶତ ଘରେ ବିଜୁଳି ସଂଯୋଗ ରହିଛି’

ଓଏଲ୍‌ ବ୍ୟୁରୋ: ବିଧାନସଭାରେ ବିଭିନ୍ନ ପ୍ରସଙ୍ଗକୁ ନେଇ ଜାରି ରହିଛି ଅଧିବେଶନ। ବିଭିନ୍ନ ପ୍ରସଙ୍ଗ ମଧ୍ୟରେ କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ବିଦ୍ୟୁତ ପରିବହନ ଜନିତ କ୍ଷତି ଉପରେ ନିଜର ମତ ରଖିଥିଲେ। ବିଦ୍ୟୁତ ପରିବହନ ଜନିତ କ୍ଷତି ପ୍ରସଙ୍ଗକୁ ନେଇ ଶକ୍ତି ମନ୍ତ୍ରୀ ପ୍ରତାପ ଦେବ କହିଛନ୍ତି, ବିରୋଧୀ ଯେଉଁ ଅଭିଯୋଗ ଆଣିଛନ୍ତି ତାହା ବାସ୍ତବ ନୁହେଁ। ୨୦୦୦ ମସିହାରେ ୨୮ପ୍ରତିଶତ ଘରକୁ ବିଜୁଳି ସଂଯୋଗ ହୋଇଥିବା ବେଳେ ବର୍ତ୍ତମାନ ୯୭ ପ୍ରତିଶତ ଘରକୁ ବିଜୁଳି ସଂଯୋଗ କରାଯାଇଛି। ବିଜୁଳି ବ୍ୟବହାର ବଢିବା ସହିତ ଉତ୍ପାଦନ ବଢିବ ବୋଲି ଶକ୍ତି ମନ୍ତ୍ରୀ କହିଛନ୍ତି।

ସେ ଆହୁରି ମଧ୍ୟ କହିଛନ୍ତି,୨୦୦୦ ମସିହାରେ ୧୬ଲକ୍ଷ ବିଦ୍ୟୁତ ଉପଭୋକ୍ତା ରହିଥିବା ବେଳେ ବିଦ୍ୟୁତ ଚାହିଦା ୧୦ହଜାର ମିଲିୟନ ୟୁନିଟ ଆବଶ୍ୟକ ପଡିଥିଲା। ୨୦୨୩ ମସିହାରେ ଉପଭୋକ୍ତାଙ୍କ ସଂଖ୍ୟା ୯୮ ଲକ୍ଷରେ ପହଞ୍ଚିଛି। ଚାହିଦା ୨୭ ହଜାର ୪୦୦ ମିଲିୟନ ୟୁନିଟକୁ ବୃଦ୍ଧି ପାଇଛି। ବିଦ୍ୟୁତ ପରିବହନ ଜନିତ କ୍ଷତି ନିୟନ୍ତ୍ରଣ କରିବାରେ ସଫଳତା ମିଲିଛି। ପାଣି, ପବନ, ବିଜୁଳି ଏକାନ୍ତ ଆବଶ୍ୟକ। ମାଗଣା ଦେଲେ ଶ୍ରୀଲଙ୍କା ଭଳି ସ୍ଥିତି ହେବ। ୨୦୦୦ ମସିହାରେ ୫୭ ପ୍ରତିଶତ କ୍ଷତି ହେଉଥିଲା କିନ୍ତୁ ୨୦୨୩ରେ ଏହା ୨୬ ପ୍ରତିଶତକୁ ହ୍ରାସ ପାଇଛି ବୋଲି ଶକ୍ତି ମନ୍ତ୍ରୀ କହିଛନ୍ତି।

ଖବର ଅନୁସାରେ, ବିଦ୍ୟୁତ ପରିବହନ ଜନିତ କ୍ଷତିକୁ ନେଇ ସାଲୁଜା କହିଥିଲେ ଯେ, ବିଦ୍ୟୁତ ପରିବହନ ଜନିତ କ୍ଷତିକୁ ହ୍ରାସ କରିବାରେ ସରକାର ବିଫଳ ହୋଇଛନ୍ତି। ବିଦ୍ୟୁତ ପରିବହନ ଜନିତ କ୍ଷତି ହ୍ରାସ କରିବା ପାଇଁ ଘରୋଇ କମ୍ପାନିକୁ ଦିଆ ଯାଇଥିଲା। ହେଲେ ବିଦ୍ୟୁତ ପରିବହନ ଜନିତ କ୍ଷତି ହ୍ରାସ ପାଇବାରେ ବିଫଳ ହୋଇଛି। ଓଡିଶା ଏକ ବିଦ୍ୟୁତ ବଳକା ରାଜ୍ୟ ହୋଇଥିବା ବେଳେ ବିଦ୍ୟୁତ ତାରିଫ ବଢ଼ି ବଢ଼ି ଚାଲିଛି। ଏହା ଲୋକଙ୍କ ଉପରେ ବୋଝ ହୋଇଛି। ଦିଲ୍ଲୀ, ପଞ୍ଜାବ ଭଳି ଆମ ରାଜ୍ୟ ସରକାର ଉପଭୋକ୍ତାମାନଙ୍କୁ ୨ଶହ ୟୁନିଟ ପଯ୍ୟନ୍ତ ବିଜୁଳି ମାଗଣାରେ ଦିଅନ୍ତୁ।

ଅନ୍ୟପକ୍ଷେ, ମୋହନ ମାଝୀ କହିଛନ୍ତି, ସରକାର କମ୍ପାନି ସୁରକ୍ଷା ପାଇଁ କାମ କରୁଛନ୍ତି। ମନ୍ତ୍ରୀ କମ୍ପାନିକୁ ସୁହାଇଲା ଭଳି କଥା କହୁଛନ୍ତି। ଜନସାଧାରଣଙ୍କୁ ବଳି ଦିଆଯାଉଛି। ଉପରୋକ୍ତାଙ୍କ ତଣ୍ଟି ଚିପି ବିଲ୍ ଆଦାୟ କରାଯାଉଛି। ବିଦ୍ୟୁତ ସଂସ୍କାରରେ ଓଡ଼ିଶା ପ୍ରଥମ ରାଜ୍ୟ ହୋଇଥିବା ବେଳେ, ସରକାରଙ୍କ ଭୁଲ ନୀତି ଏବଂ ବିଭାଗୀୟ ଅପାରଗତା ପାଇଁ ବିଜୁଳି ଦର ବଢୁଛି‌। ସୁଲଭ ମୂଲ୍ୟରେ ଗୁଣାତ୍ମକ ବିଜୁଳି ସେବା ଯୋଗାଇବାରେ ଓଡ଼ିଶା ସରକାର ବିଫଳ ହୋଇଛନ୍ତି।