ଭୁବନେଶ୍ବର: ଗ୍ରାହକଙ୍କୁ ଲାଗିବାକୁ ଯାଉଛି ଝଟକା। କାରଣ ମେ’ ପହିଲାରୁ ବଢ଼ିବ ଦୁଗ୍ଧଜାତ ଦ୍ରବ୍ୟର ଦର। ମେ’ ୧ରୁ ଛେନା,ପନିର, ଖୁଆ ଆଦି ଦ୍ରବ୍ୟର ମୂଲ୍ୟ ବୃଦ୍ଧି ହେବ। କଟକ ଜିଲ୍ଲା ଦୁଗ୍ଧଜାତ ଦ୍ରବ୍ୟ ବ୍ୟବସାୟୀ ସଂଘର ପକ୍ଷରୁ ଏପରି ନିଷ୍ପତ୍ତି ନିଆଯାଇଛି।
ନିକଟରେ ଓମ୍ଫେଡ୍ କ୍ଷୀର ଲିଟର ପ୍ରତି ୪ଟଙ୍କା ବୃଦ୍ଧି ହେବା ସହ ଗୋଖାଦ୍ୟ ଓ ନିତ୍ୟ ବ୍ୟବହାର୍ଯ୍ୟ ଦ୍ରବ୍ୟର ଦର ମଧ୍ୟ ବଢ଼ିଛି। ଯାହାକୁ ନଜରରେ ରଖି କଟକ ଜିଲ୍ଲା ଦୁଗ୍ଧ ଜାତ ଦ୍ରବ୍ୟ ବ୍ୟବସାୟ ସଂଘ ଦୁଗ୍ଧଜାତ ଦ୍ରବ୍ୟର ଦର ବଢ଼ାଇଥିବା କହିଛନ୍ତି ସାଧାରଣ ସମ୍ପାଦକ ପ୍ରଦୀପ କୁମାର ବେହେରା।
ନିଷ୍ପତ୍ତି ପରେ ଛେନା କେଜି ପିଛା ୨୦, ପନିର କେଜି ୩୦ ଟଙ୍କା ଓ ଖୁଆ କେଜି ପିଛା ୬୦ ଟଙ୍କା ବୃଦ୍ଧି ପାଇବ ବୋଲି ଜଣାପଡ଼ିଛି। କ୍ଷୀର ଦର ବଢ଼ିଥିବାରୁ ଦୁଗ୍ଧଜାତ ଦ୍ରବ୍ୟ ଦର ବୃଦ୍ଧି ନିଷ୍ପତ୍ତି ନିଆଯାଇଛି। ଛେନା କେଜି ପୂର୍ବରୁ କେଜି ପିଛା ୧୭୫ ଟଙ୍କା ଥିବା ବେଳେ ଏବେ ମୂଲ୍ୟ ବୃଦ୍ଧି ନିଷ୍ପତ୍ତି ପରେ ୧୯୫ରେ ବିକ୍ରି ହେବ। ସେହିପରି ପନିର କେଜି ୩୦ ଟଙ୍କା ବୃଦ୍ଧି ପାଇବା ପରେ କେଜି ପିଛା ମୂଲ୍ୟ ୨୨୫ ଟଙ୍କାରୁ ୨୫୫କୁ ବୃଦ୍ଧି ପାଇବ। ଖୁଆ କେଜି ମଧ୍ୟ ୬୦ ବଢ଼ି ୨୬୦ ବଦଳରେ ୩୨୦ ଟଙ୍କାରେ ବିକ୍ରି ହେବ।