ଓଏଲ୍ ବ୍ୟୁରୋ: କାଲିଠୁ ତିନିଦିନିଆ ଓଡ଼ିଶାରେ ଗସ୍ତରେ ଆସିଛନ୍ତି ମହାମହିମ। ରାଷ୍ଟ୍ରପତିଙ୍କ ଗସ୍ତକୁ ନେଇ ଚଳଚଂଚଳ କଟକ ସହର। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଓଡ଼ିଶା ଗସ୍ତର ଆଜି ଦ୍ବିତୀୟ ଦିନ। ଓଡ଼ିଶା ଗସ୍ତର ଦ୍ବିତୀୟ ଦିନରେ ଅର୍ଥାତ ଆଜି କଟକରେ ଏକାଧିକ କାର୍ଯ୍ୟକ୍ରମରେ ରାଷ୍ଟ୍ରପତି ଯୋଗ ଦେଇଛନ୍ତି। ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ କଲେଜ ଓ ହସ୍ପିଟାଲର ବାର୍ଷିକୋତ୍ସବରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଯୋଗଦାନ କରିଛନ୍ତି। ଏଥିପାଇଁ ସୁରକ୍ଷା ବ୍ୟବସ୍ଥା କଡ଼ାକଡି କରାଯାଇଛି।
କଟକ ବଡ ମେଡିକାଲର ବାର୍ଷିକ ଉତ୍ସବରେ ଯୋଗ ଦେଇ ରାଷ୍ଟ୍ରପତି କହିଛନ୍ତି, ଡାକ୍ତରମାନେ ଜୀବନ ସାରା ରୋଗୀ ଚିକିତ୍ସାରେ ବ୍ରତୀ ହେବା ପ୍ରଶଂସନୀୟ। ଡାକ୍ତରୀ ଏକ ବୃତ୍ତି ନୁହେଁ, ଏହା ଏକ ବ୍ରତ ବୋଲି ମହାମହିମ କହିଛନ୍ତି। ଡାକ୍ତର, ଶିକ୍ଷକ ଏବଂ ଓକିଲଙ୍କୁ ଗାଁ ଗହଳିରେ ଭଗବାନ ମାନନ୍ତି। କୋଭିଡ୍ ବେଳେ ଡାକ୍ତରମାନଙ୍କର ଭୂମିକା ଅତି ପ୍ରଶଂସନୀୟ। ଭାରତ ନିଜସ୍ଵ କୋଭିଡ୍ ଟିକା ବାହାର କରି ବିଶ୍ଵର ଅନ୍ୟ ଦେଶକୁ ପଠାଇଛି। କୋଭିଡ୍ ବେଳେ ସ୍ଵାସ୍ଥ୍ୟକର୍ମୀଙ୍କ ସେବାକୁ ଯେତେ ପ୍ରଶଂସା କଲେ ବି କମ୍ ହେବ ବୋଲି ମହାମହିମ କହିଛନ୍ତି।
ମହାମହିମ ଆହୁରି ମଧ୍ୟ କହିଛନ୍ତି, ଦେଶରେ ଶିଶୁମାତୃ ମୃତ୍ୟୁହାର ହ୍ରାସ ପାଇଛି। ଏବେ ଆମେ ଅମୃତ କାଳରେ ପ୍ରବେଶ କରିଛେ, ଆଗାମୀ ୨୫ ବର୍ଷ ଆମ ପାଇଁ ଗୁରୁତ୍ଵପୂର୍ଣ୍ଣ। ଆମେ ମିଳିମିଶି ଏକ ବିକଶିତ ଭାରତ ଗଠନର ସ୍ଵପ୍ନ ସାକାର କରିବା। ଏସସିବି ଏକ ମିନି ଇଣ୍ଡିଆ। ଦେଶ, ବିଦେଶର ଛାତ୍ରଛାତ୍ରୀ ଏଠାକୁ ଅଧ୍ୟୟନ ପାଇଁ ଆସନ୍ତି। ଏହା ଏସସିବି ମେଡିକାଲର ବାର୍ଷିକ ଉତ୍ସବରେ ଯୋଗଦେଇ ବିଶେଷ ଆନନ୍ଦିତ ହେବ ସହ ଏକ ସ୍ମରଣିକା ଉନ୍ମୋଚନ ହେବା ଜାଣି ମୁଁ ଅଭିନନ୍ଦନ ଜଣାଉଛି ବୋଲି ମହାମହିମ କହିଛନ୍ତି।
ଏସ୍ସିବି ଏକ ଛୋଟ ତୀର୍ଥଯାତ୍ରୀ ଡାକ୍ତରଖାନାରୁ ଆରମ୍ଭ ହୋଇଥିବା ଡାକ୍ତରଖାନା ଆଜି ଦେଶରେ ସୁନାମ ଆଣିଛି। ସବୁ ବର୍ଗର ଲୋକଙ୍କୁ ଏଠାରେ ନିଃଶୁଳ୍କ ଚିକିତ୍ସା ଦିଆଯାଉଛି। ମରାଠା ଶାସନ କାଳରେ କଟକରେ ତୀର୍ଥଯାତ୍ରୀଙ୍କ ପାଇଁ ଏକ ମେଡିକାଲ ଥିଲା। ପରେ ଏହା ସଂପ୍ରସାରିତ ହୋଇ ଏସ୍ସିବି ମେଡିକାଲ କଲେଜ ଓ ହସ୍ପିଟାଲରେ ପରିଣତ ହୋଇପାରିଛି। ଏହି ମେଡିକାଲ କଲେଜର ପ୍ରତିଷ୍ଠାରେ ଶ୍ରୀରାମଚନ୍ଦ୍ର ଭଂଜଦେବଙ୍କର ଅବଦାନ ଅତୁଳନୀୟ ବୋଲି ମହାମହିମ କହିଛନ୍ତି।
ସୂଚନା ଅନୁସାରେ, ଆଜି ମହାମହିମ କଟକ ଗସ୍ତରେ ଆସି ମଧୁବାବୁଙ୍କ ଜନ୍ମସ୍ଥାନ ପରିଦର୍ଶନ କରିଥିଲେ। ହାଇକୋର୍ଟର ୭୫ ବର୍ଷ ପୂର୍ତ୍ତି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ମୁଖ୍ୟ ଅତିଥି ଭାବେ ଯୋଗ ଦେଇ ନିଜର ଅଭିଭାଷଣ ରଖିଥିଲେ। ତ୍ୱରିତ ନ୍ୟାୟ ଉଭୟ ପୀଡ଼ିତ ଓ ନିର୍ଦ୍ଦୋଷଙ୍କୁ ସହାୟ ହେବ। ଏକଥା ଆଗରୁ ମଧ୍ୟ ମୁଁ କହିଛି ବୋଲି ରାଷ୍ଟ୍ରପତି କହିଥିଲେ।
ମହାମହିମ ଆହୁରି ମଧ୍ୟ କହିଛନ୍ତି, ସମାଜର ଅନେକ ବର୍ଗ ମାମଲା ଲଢ଼ିବାକୁ ସମର୍ଥ ନୁହଁନ୍ତି। ବଞ୍ଚିତ ବର୍ଗଙ୍କୁ କିଭଳି ନ୍ୟାୟ ପ୍ରଦାନ କରାଯିବ, ଗୁରୁତ୍ୱ ମିଳିବା ଉଚିତ। ଏଥିପାଇଁ ଆଇନ ସହାୟତା ମିଳୁଥିବାରୁ ଧନ୍ୟବାଦ ଦେଉଛି। ଅନେକ ଆଇନଜୀବୀ ବି ମାଗଣା ଆଇନ ସହାୟତା ଦେଉଛନ୍ତି ବୋଲି ମହାମହିମ କହିଛନ୍ତି। ଏହା ସହ ମହାମହିମ ନିଜ ଅଭିଭାଷଣରେ କଟକର ସୁବର୍ଣ୍ଣ ଇତିହାସ ବର୍ଣ୍ଣନା କଲେ। ୭୫ବର୍ଷ ପୂର୍ତ୍ତି ଅବସରେ ମହାମହିମ ସ୍ବତନ୍ତ୍ର ଡାକ ଟିକଟ ଉନ୍ମୋଚନ କଲେ।