ଓଏଲ୍ ବ୍ୟୁରୋ: ଚିନ୍ତା ବଢ଼ାଉଛି ନିମୋନିଆ। କରୋନା ପରେ ଏବେ ଚୀନରେ ନିମୋନିଆ ଭୟ। କରୋନା ଭଳି ନିମୋନିଆ ଯେପରି ମାରାତ୍ମକ ନହେବ ସେଥିପ୍ରତି କେନ୍ଦ୍ର ସରକାର ଆଗୁଆ ପଦକ୍ଷେପ ନେଇଛନ୍ତି। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଏନେଇ ଭୟଭୀତ ନହେବା ସହିତ ସବୁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ସତର୍କ ରହିବା ଓ ହସ୍ପିଟାଲର ସ୍ଥିତି ସମୀକ୍ଷା କରିବାକୁ କହିଛନ୍ତି।
ଏହା ପରେ ଚୀନ୍ରେ ବ୍ୟାପୁଥିବା ନିମୋନିଆ ନେଇ ଜନସ୍ବାସ୍ଥ୍ୟ ନିର୍ଦ୍ଦେଶକ ପ୍ରତିକ୍ରିୟା ରଖିଛନ୍ତି।
କେନ୍ଦ୍ର ସରକାରଙ୍କ ନିର୍ଦ୍ଦେଶ ପରେ ରାଜ୍ୟ ସରକାର ପଦକ୍ଷେପ ନେଇଛନ୍ତି। ଯଦିଓ ଏହି ଭାଇରସ୍ H9N2 ନୂଆ ନୁହେଁ, କିନ୍ତୁ ରାଜ୍ୟରେ ଚିହ୍ନଟ ହୋଇନି। ସତର୍କମୂଳକ ଭାବେ ସର୍ଭେଲାନ୍ସ ସହ ଟେଷ୍ଟିଂ ବଢ଼ାଇବାକୁ ନିର୍ଦ୍ଦେଶ ରହିଛନ୍ତି। ଏଯାବତ୍ ରାଜ୍ୟରେ ନୂଆ ଭାଇରସ୍ ନେଇ କିଛି ତଥ୍ୟ ନାହିଁ। ଯେଉଁମାନଙ୍କୁ ଥଣ୍ଡା ଓ କାଶ ହେଉଛି, ସେମାନେ ମାସ୍କ ବ୍ୟବହାର କରନ୍ତୁ ବୋଲି ଜନସ୍ବାସ୍ଥ୍ୟ ନିର୍ଦ୍ଦେଶକ ପ୍ରତିକ୍ରିୟା ରଖିଛନ୍ତି।
ସୂଚନା ଅନୁସାରେ, ନିମୋନିଆ ନିମନ୍ତେ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ସବୁ ରାଜ୍ୟ ସରକାରଙ୍କୁ ମାର୍ଗଦର୍ଶିକା ଜାରି କରିଛନ୍ତି। ସବୁ ଚିକିତ୍ସାଳୟରେ ମାନବସମ୍ବଳ, ଭିତ୍ତିଭୂମି, ଶଯ୍ୟା, ଭେଣ୍ଟିଲେଟର, ପରୀକ୍ଷା କିଟ ଓ ଔଷଧ ସମ୍ବନ୍ଧିତ ଉପରେ ସମୀକ୍ଷା କରିବାକୁ ନିର୍ଦେଶ ଦିଆଯାଇଛି। ଆତଙ୍କିତ ହେବାର କୌଣସି କାରଣ ନାହିଁ। ଚୀନରେ ଏଭଳି ସ୍ଥିତି ଉପୁଜିଥିବାବେଳେ କେନ୍ଦ୍ର ସରକାର ପୂରା ପ୍ରସ୍ତୁତ ହୋଇ ରହିଛନ୍ତି। ରାଜ୍ୟଗୁଡିକ ମଧ୍ୟ ଭୟଭୀତ ନହୋଇ ଏ ବାବଦରେ ଆବଶ୍ୟକ ସମୀକ୍ଷା କରନ୍ତୁ। ଚୀନ ଏହାର କେନ୍ଦ୍ରସ୍ଥଳ ହୋଇଥିବା ବେଳେ ଆମକୁ ସତର୍କ ରହିବାକୁ ପଡିବ ବୋଲି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି।
ଅନ୍ୟପକ୍ଷରେ ମୁକାବିଲା ନିମନ୍ତେ ରାଜ୍ୟ ସରକାର ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି ବୋଲି ଜନସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି। ଏନେଇ ନିର୍ଦେଶକ ଡା. ନିରଞ୍ଜନ ମିଶ୍ର କହିଛନ୍ତି ଭୟଭୀତ ହେବାର ଆବଶ୍ୟକତା ନାହିଁ; କିନ୍ତୁ ଆମକୁ ସତର୍କ ଓ ସଚେତନ ରହିବାକୁ ପଡ଼ିବ। ଏନେଇ ବିଭିନ୍ନ ଚିକିତ୍ସାଳୟରେ ଆବଶ୍ୟକୀୟ ଭିତ୍ତିଭୂମି ରହିଛି ଏବଂ ନିର୍ଦେଶନାମା ଆଧାରରେ କାର୍ଯ୍ୟପନ୍ଥା ଗ୍ରହଣ କରାଯିବ।