ଓଏଲ୍ ବ୍ୟୁରୋ: ନିର୍ବାଚନକୁ ଦୃଷ୍ଟିରେ ରଖି ରାଷ୍ଟ୍ରୀୟ ନେତୃବୃନ୍ଦ ଘନ ଘନ ଓଡ଼ିଶା ଗସ୍ତ କରୁଛନ୍ତି। ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓଡ଼ିଶା ଗସ୍ତରେ ଆସି ଭୁବନେଶ୍ଵରରେ ବିଶାଳ ରୋଡ୍ ଶୋ କରିବା ସହ ଫୁଲବାଣୀ, ବରଗଡ ଓ ବଲାଙ୍ଗୀରରେ ମାରାଥନ୍ ପ୍ରଚାର କରିଥିବାବେଳେ କାଲି କଟକରେ ରୋଡ୍ ଶୋ’ କରିବେ ଅମିତ ଶାହ। ଆସନ୍ତାକାଲି କଟକ ଆସୁଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ। ଗୋପବନ୍ଧୁ ପାର୍କ ଛକରୁ ରୋଡ ଶୋ’ ଆରମ୍ଭ କରିବେ। ବକ୍ସିବଜାର, ତିନିକୋଣିଆ ହୋଇ ଚାନ୍ଦିନୀଚୌକ ଯିବେ। ସନ୍ଧ୍ୟା ୬ଟା ୧୫ରୁ ୭ଟା ୧୦ ଯାଏ ରୋଡ ଶୋ’ ଚାଲିବ ବୋଲି ସୂଚନା ରହିଛି।
ଅନ୍ୟପଟେ, ଆସନ୍ତା ୨୦ ତାରିଖରେ ପୁଣି ଓଡ଼ିଶା ଗସ୍ତରେ ଆସିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଗତ ରବିବାର ଏନେଇ ସୂଚନା ଦେଇଛନ୍ତି ରାଜ୍ୟ ବିଜେପି ଉପସଭାପତି ଗୋଲକ ମହାପାତ୍ର। ୨୦ ତାରିଖ ସକାଳେ ପ୍ରଧାନମନ୍ତ୍ରୀ ପୁରୀରେ ବିଶାଳ ରୋଡ୍ ଶୋ କରିବେ। ଏହାପରେ କଟକ ଓ ଅନୁଗୁଳରେ ଆୟୋଜିତ ହେବାକୁ ଥିବା ଜନସଭାକୁ ସମ୍ବୋଧିତ କରିବାର କାର୍ଯ୍ୟକ୍ରମ ରହିଛି।