ଓଏଲ୍ ବ୍ୟୁରୋ: ଟିମ୍ ଇଣ୍ଡିଆର ଷ୍ଟାର କ୍ରିକେଟର ତଥା ବିଶ୍ବ କ୍ରିକେଟରେ ରନ୍ ମେସିନ୍ ଭାବେ ପରିଚିତ ବିରାଟ କୋହଲି ସବୁବେଳେ ଚର୍ଚ୍ଚାରେ ଥାଆନ୍ତି। ନିଜର ବ୍ୟକ୍ତିତ୍ବ, ଖେଳ ପ୍ରଦର୍ଶନ ଓ ଅନାନ୍ୟ କାରଣରୁ ସବୁବେଳେ ଚର୍ଚ୍ଚାରେ ଥାଆନ୍ତି ବିରାଟ। ଏବେ ପୁଣିଥରେ କ୍ରିକେଟରୁ ଅବସର ପ୍ରସଙ୍ଗକୁ ନେଇ ଚର୍ଚ୍ଚାରେ ଅଛନ୍ତି। ସେ ଅବସର ପ୍ରସଙ୍ଗରେ ମୁହଁ ଖୋଲିଛନ୍ତି।
ନିକଟରେ ଆରସିବିର ଏକ ପୋଡକାଷ୍ଟରେ ବିରାଟ କୋହଲି ନିଜ କ୍ୟାରିୟରକୁ ନେଇ କହିଥିଲେ। ସେ ଅବସର ପ୍ରସଙ୍ଗରେ କହିଛନ୍ତି, ଯଦିଓ ମୋତେ କେବେ ନା କେବେ ଅବସର ନେବାକୁ ପଡ଼ିବ, ତେବେ ଏହା ବିଷୟରେ ଚିନ୍ତା କରିବାର ସମୟ ଆସିନାହିଁ। ଯେଉଁଦିନ ସେ ନିଜର ଶତ ପ୍ରତିଶତ ଦେଇନପାରିବେ ସେହିଦିନ ହିଁ ଅବସର ନେଇଯିବେ ବୋଲି କୋହଲି କହିଛନ୍ତି।
ଅବସର ପରବର୍ତ୍ତୀ ପ୍ଲାନ ଉପରେ ସେ କହିଛନ୍ତି, ପ୍ରଥମେ ସେ ବହୁ ସମୟ ରେଷ୍ଟ୍ ନେବେ। ପରେ କ’ଣ କରିବେ ତାହାର ପ୍ଲାନ କରିବେ। ଯେବେ ମୋ ଭିତରେ ଆଉ ଖେଳିବାକୁ ଆଗ୍ରହ ରହିବ ନାହିଁ, ଯେବେ ମୁଁ ମୋର ସର୍ବଶ୍ରେଷ୍ଠ ପ୍ରଦର୍ଶନ ଦେଇନପାରିବି; ସେବେ ମୋତେ ଆଉ କେହି ଦେଖିବାକୁ ପାଇବେନି। ମୁଁ ପଡ଼ିଆରୁ ହିଁ ହଜିଯିବି ବୋଲି କୋହଲି କହିଛନ୍ତି।
ସୂଚନାଥାଉକି, ଚଳିତ ଆଇପିଏଲ ସଂସ୍କରଣରେ ୬୧୧ ରନ୍ ସ୍କୋର କରି ବିରାଟ କୋହଲି ଟପ୍ ସ୍କୋରର ରହିଛନ୍ତି। ସେ ୧୩ଟି ଇନିଂସରେ ୧୫୫.୧୬ ଷ୍ଟ୍ରାଇକ ରେଟ୍ରେ ସ୍କୋର କରିଛନ୍ତି ବିରାଟ। ଆସନ୍ତା ଶନିବାର ଦିନ ୧୩ ଟି ମ୍ୟାଚରୁ ୧୪ ପଏଣ୍ଟ ପାଇ ତୃତୀୟ ସ୍ଥାନରେ ଥିବା ଚେନ୍ନାଇ ସପୁର କିଙ୍ଗସ୍ ବିପକ୍ଷରେ ଏକ ଗୁରୁତ୍ୱପୂର୍ଣ୍ଣ ମ୍ୟାଚ ଖେଳିବ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୁରୁ।