ଓଏଲ୍ ବ୍ୟୁରୋ: ଆଜି ହେଉଛି ବିଶ୍ୱ ପରିବେଶ ଦିବସ। ପରିବେଶକୁ ସୁରକ୍ଷିତ ରଖିବା ପାଇଁ ଏହି ଦିନ ପାଳନ କରାଯାଉଛି। ପରିବେଶକୁ ପ୍ରଦୂଷଣରୁ କିପରି ରୋକାଯାଇ ପାରିବ ସେନେଇ ସଚେତନତା ସୃଷ୍ଟି କରାଯାଉଛି। ଚଳିତ ବର୍ଷର ଥିମ୍ ‘ଭୂମି ପୁନରୁଦ୍ଧାର କର, ପୃଥିବୀକୁ ପୁନର୍ଜୀବିତ କର’ ରଖାଯାଇଛି। ଏହି ଆନ୍ତର୍ଜାତୀୟ ଦିବସ ଅବସରରେ, ବରମୁଣ୍ଡା ବିଦ୍ୟୁତ ବିଭାଗର କର୍ମଚାରୀମାନେ ପୃଥିବୀକୁ ବଞ୍ଚାଇବା ପାଇଁ କିଛି ନିଆରା କଥା ଚିନ୍ତା କରିଛନ୍ତି।
ଆଜିକାଲି ଆଧୁନିକ ମଣିଷର ଘର ପାଇଁ ବିଦ୍ୟୁତ ଯୋଗାଣ ନିହାତି ଆବଶ୍ୟକ। ଏକ ବସ୍ତିରେ ରହୁଥିବା ଜଣେ ସାଧାରଣ ବ୍ୟକ୍ତିଙ୍କ ଘର ଠାରୁ ଆରମ୍ଭ କରି କୋଟିପତି ପର୍ଯ୍ୟନ୍ତ ସମସ୍ତେ କିପରି ନିଜ ଘରକୁ ବିଦ୍ୟୁତ ଯୋଗାଣ ନେଇ ପାରିବେ ସେଥିପାଇଁ ଚିନ୍ତା କରିଥାନ୍ତି। ଜନସାଧାରଣଙ୍କୁ ନିରବଚ୍ଛିନ୍ନ ଏବଂ ଗୁଣାତ୍ମକ ବିଦ୍ୟୁତ୍ ଯୋଗାଇବା ପାଇଁ, ବେଳେବେଳେ କର୍ମଚାରୀଙ୍କୁ ଗଛର ଶାଖାଗୁଡ଼ିକୁ କାଟିବାକୁ ପଡେ। ଯାହା କରେଣ୍ଟ ତାରକୁ ସ୍ପର୍ଶ କରେ ଏବଂ ବିଦ୍ୟୁତ୍ ଯୋଗାଣରେ ବାଧା ସୃଷ୍ଟି କରିଥାଏ। ଅନେକ ଥର ବୃକ୍ଷର ଶାଖା କାଟିବା ପାଇଁ କର୍ମଚାରୀ ମାନେ ସମାଲୋଚନାର ସମ୍ମୁଖୀନ ହୋଇଥାନ୍ତି। ଯେଉଁଠାରେ କି ସେମାନଙ୍କ ଉଦ୍ଦେଶ୍ୟ କେବେ ବି ଏହା ନଥାଏ କି ଗଛ କାଟି ପରିବେଶର କ୍ଷତି କରିବା।
ଏହି ଅବସରରେ ଆଜି ଏସ୍.ଡି.ଓ ନୟାପାଲ୍ଲୀ ଇଂ. ବିଶ୍ଵରଂଜନ ଧଳଙ୍କ ଉପସ୍ଥିତିରେ ବରମୁଣ୍ଡା ବିଦ୍ୟୁତ୍ ସେକ୍ସନ ଇନ-ଚାର୍ଜ ଇଂ ଅବକାଶ ପୃଷ୍ଟି, ଜେଏମସି ଇଂ ମାନସ ରଂଜନ କୁଣ୍ଡ, ସେକ୍ସନ ପର୍ଯ୍ୟବେକ୍ଷକ ଇଂ ରୁଦ୍ରଦେବ ମଲ୍ଲିକ ଏବଂ ବାରାମୁଣ୍ଡା ବିଦ୍ୟୁତ୍ ବିଭାଗର ଅନ୍ୟାନ୍ୟ କର୍ମଚାରୀ ସମୁହ ଜଗନ୍ନାଥ ବିହାର ଏବଂ ଷ୍ଟୁଡିଓ ଛକକୁ ସଂଯୋଗ କରୁଥିବା ରାସ୍ତା କଡ଼ରେ ଚାରା ରୋପଣ କରିଥିଲେ। ଏହା ସହ ଜନସାଧାରଣଙ୍କୁ ମଧ୍ୟ ଆହ୍ବାନ କରିଥିଲେ ଯେ ଗ୍ଲୋବାଲ ୱାର୍ମିଂକୁ ରୋକିବା ପାଇଁ ଯଥାସମ୍ଭବ ଗଛ ଲଗାଇବା ଉଚିତ। କିନ୍ତୁ ଚାରା ରୋପଣ ସମୟରେ, ଲୋକ ମାନେ ଦୟା ପୂର୍ବକ ଧ୍ୟାନ ଦେବା କଥା ଯେ ଗଛଟି ଯେପରି ବଡ଼ ହୋଇ ବିଦ୍ୟୁତ୍ ଲାଇନ ତଳେ ନ ରହିଯାଉ ସେ ନେଇ ଅବଗତ କରାଇଥିଲେ।