ଓଏଲ୍ ବ୍ୟୁରୋ: ୟୁନିଭରସିଟି ଗ୍ରାଣ୍ଟସ୍ କମିଶନ (ୟୁଜିସି) ନେଲେ ବଡ଼ ନିଷ୍ପତ୍ତି। ଏଣିକି ବିଶ୍ବବିଦ୍ୟାଳୟ ଗୁଡ଼ିକ ନିଜସ୍ବ ପ୍ରବେଶିକା ପରୀକ୍ଷା କରିପାରିବେ। ଏନେଇ ଅନୁମତି ପ୍ରଦାନ କରିଛନ୍ତି ୟୁଜିସି। କେଉଁ ଆଧାରରେ ପ୍ରବେଶିକା ହେବ ସେ ନେଇ ମଧ୍ୟ ଉଲ୍ଲେଖ କରିଛନ୍ତି ୟୁଜିସି।
ୟୁଜିସି ରିପୋର୍ଟ ଅନୁସାରେ ତିନି କିମ୍ବା ଚାରି ରାଉଣ୍ଡ କାଉନସେଲିଂ ପରେ ମଧ୍ୟ କେନ୍ଦ୍ରୀୟ ବିଶ୍ୱବିଦ୍ୟାଳୟ ଏବଂ ସେମାନଙ୍କ ଅନୁବନ୍ଧିତ କଲେଜଗୁଡ଼ିକରେ ବହୁ ସଂଖ୍ୟକ ସିଟ୍ ଖାଲି ରହିଛି। ଏହା ଦ୍ୱାରା କେବଳ ସମ୍ବଳର ଅପଚୟ ହେବ ନାହିଁ, ବରଂ ଅନେକ ଛାତ୍ରଛାତ୍ରୀ ଉଚ୍ଚଶିକ୍ଷା ସୁଯୋଗରୁ ବଞ୍ଚିତ ରହିବେ। ଏଥିପାଇଁ ଏହି ସମସ୍ୟାର ସମାଧାନ ପାଇଁ, ୟୁଜିସି ମାନକ ଅପରେଟିଂ ପ୍ରଣାଳୀ (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର, ଏସଓପି) ର ଏକ ସେଟ୍ ଅନୁମୋଦନ କରିଛି, ଏହା ସାହାଯ୍ୟରେ କେନ୍ଦ୍ରୀୟ ବିଶ୍ୱବିଦ୍ୟାଳୟଗୁଡିକ ଖାଲି ଥିବା ସିଟକୁ ପୂରଣ କରିବା ପାଇଁ ନିଜସ୍ୱ ପରୀକ୍ଷା କରିପାରିବେ।
ସୂଚନାଥାଉକି, ବିଶ୍ୱବିଦ୍ୟାଳୟଗୁଡ଼ିକରେ ଆସନ ପୂରଣ କରିବା ପାଇଁ ଏହି ନିଷ୍ପତ୍ତି ନିଆଯାଇଛି। ସେପ୍ଟେମ୍ବର ୨୦, ୨୦୨୩ରେ ୟୁଜିସିର ୫୭୨ ବୈଠକରେ ଏହି ନିଷ୍ପତ୍ତି ନିଆ ଯାଇଥିଲା, ଯାହା ଆଗକୁ କାର୍ଯ୍ୟକାରୀ ହେବାକୁ ଯାଉଛି।