ଓଏଲ୍ ବ୍ୟୁରୋ: ବାଂଲାଦେଶର ରାଜଧାନୀ ଢାକାରେ ସ୍ଥିତି ଅଣାୟତ୍ତ। ହଜାର ହଜାର ବିକ୍ଷୋଭକାରୀ ବାଂଲାଦେଶର ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ସରକାରୀ ଘରେ ପ୍ରବେଶ କରି ଭଙ୍ଗାରୁଜା କରିଛନ୍ତି। କେବଳ ସେତିକି ନୁହେଁ ବିକ୍ଷୋଭକାରୀ ବଙ୍ଗବନ୍ଧୁ ଶେଖ୍ ମଜୀବଙ୍କ ପ୍ରତିମୂର୍ତ୍ତି ଭାଙ୍ଗିବାକୁ ଚେଷ୍ଟା ମଧ୍ୟ କରିଛନ୍ତି। ସେନା ପକ୍ଷରୁ ଜାରି କରାଯାଇଥିବା କର୍ଫ୍ୟୁ କଟକଣାକୁ ଖାତିର ନକରି ବିକ୍ଷୋଭକାରୀ ମାନେ ଢାକାରେ ଥିବା ଅବାମୀ ଲିଗ୍ କାର୍ଯ୍ୟାଳୟରେ ପଶି ଭଙ୍ଗାରୁଜା କରିଛନ୍ତି। ଅନ୍ୟପଟେ ୨୦ ବର୍ଷ ଧରି ପ୍ରଧାନମନ୍ତ୍ରୀ ପଦରେ ଥିବା ଶେଖ୍ ହସିନା ତାଙ୍କ ପଦରୁ ଇସ୍ତଫା ଦେଇଛନ୍ତି। ଏଥିସହିତ ସ୍ବତନ୍ତ୍ର ବିମାନ ଯୋଗେ ବାଂଲାଦେଶ ଛାଡ଼ି ଭାରତ ଅଭିମୁଖେ ଯାତ୍ରା କରିଛନ୍ତି। ବର୍ତ୍ତମାନ ସାରା ବାଂଲାଦେଶର ଶାସନ ଭାର ସେନା ନେଇଛି।
ସବୁଠୁ ବଡ଼କଥା ହେଲା ଭାରତୀୟ ଏୟାର ସ୍ପେସ୍ରେ ବାଂଲାଦେଶର ଟ୍ରାନ୍ସପୋର୍ଟ ବିମାନ ଟ୍ରାକ କରାଯାଇଛି। ସୂଚନା ରହିଛି ଯେ ଏହି ବିମାନରେ ବାଂଲାଦେଶର ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଥିବା ଶେଖ ହସିନା ଭାରତ ଆସୁଛନ୍ତି। ହେଲେ ଏନେଇ ସରକାରୀ ସ୍ପଷ୍ଟୀକରଣ ମିଳିନାହିଁ। ବାଂଲାଦେଶରେ ଆନ୍ଦୋଳନ ସ୍ଥିତି ଏତେ ମାତ୍ରାରେ ବୃଦ୍ଧି ପାଇଛି ଯେ ଆଇନ୍ ମନ୍ତ୍ରୀଙ୍କ ଆବାସକୁ ଘେରି ରହିଛନ୍ତି ଆନ୍ଦୋଳନକାରୀ। ଭଙ୍ଗାରୁଜା ବି କରିଛନ୍ତି ଆନ୍ଦୋଳନକାରୀ। ଅନ୍ୟପଟେ ବାଂଲାଦେଶର ଆଇନ୍ ମନ୍ତ୍ରୀ ଅନୀସୁଲ ହକ କହିଛନ୍ତି, ଦେଶର ସ୍ଥିଛି ବର୍ତ୍ତମାନ ସମୟରେ ଠିକ୍ ନାହିଁ। ମୋତେ ବି ଜଣା ନାହିଁ ଆଗକୁ କ’ଣ ହେବ।
ଚାକିରିରେ ସଂରକ୍ଷଣ ଶେଷ କରିବା ପାଇଁ ଓ ପ୍ରଧାନମନ୍ତ୍ରୀ ଶେଖ ହସିନାଙ୍କ ଇସ୍ତଫା ଦାବି କରୁଥିବା ଜନତା ଓ ଶାସକ ଦଳର ସମର୍ଥକଙ୍କ ମଧ୍ୟରେ ହିଂସା ହେବା ଯୋଗୁଁ ୧୯ ପୁଲିସ କର୍ମୀ ଓ ୧୦୦ରୁ ଉର୍ଦ୍ଧ୍ବ ଜନତାଙ୍କ ମୃତ୍ୟୁ ଖବର ସାମ୍ନାକୁ ଆସିଛି। ୨୫୦ରୁ ଉର୍ଦ୍ଧ୍ବ ଲୋକ ଆହତ ଥିବା ସୂଚନା ରହିଛି। ଦେଶର ସ୍ଥିତି ଏତେ ଖରାପ ଯେ ସାରା ଦେଶରେ ଅନିଶ୍ଚିତ ସମୟ ପାଇଁ କର୍ଫ୍ୟୁ ଲାଗୁ କରାଯାଇଛି। ଏଥିସହିତ ସାରା ଦେଶରେ ଇଣ୍ଟରନେଟ୍ ଉପରେ ବ୍ୟାନ୍ ଲଗାଯାଇଛି। ପୂରା ଦେଶ ଏବେ ସେନାର ଛତ୍ରଛାୟାରେ ରହିଛି। ଏବେ ସମ୍ପର୍ଣ୍ଣ ଦେଶକୁ ସେନା ପରିଚାଳନା କରିବ।
ବାଂଲାଦେଶରେ ସ୍ଥିତି ଅଧିକ ବିଗିଡ଼ିବାରୁ ଭାରତ ସରକାର ସୀମାରେ ଅଧିକ ସଚେତନ ରହିବା ପାଇଁ ସେନାଙ୍କୁ ନିର୍ଦ୍ଦେଶ ଦେଇଛନ୍ତି। ବାଂଲାଦେଶ ଆଇନ୍ ବ୍ୟବସ୍ଥା ଭୁଶୁଡ଼ିବା ପରେ ସ୍ଥିତିକୁ ଅନୁଧ୍ୟାନ କରି ବିଏସ୍ଏଫ୍ ବାଂଲାଦେଶ-ଭାରତ ସୀମାରେ ହାଇ ଆର୍ଲଟ ଜାରି କରିଛି। ବିଏସ୍ଏଫ୍ର ଜଣେ ଅଧିକାରୀ କହିଛନ୍ତି, ବିଏସ୍ଏଫ୍ ଡିଜି ଏବେ କୋଲକାତାରେ ପହଁଞ୍ଚିଛନ୍ତି। ପଶ୍ଚିମବଙ୍ଗ-ବାଂଲାଦେଶ ସୀମାରେ ବିଏସ୍ଏଫ୍ ଅଧିକ ସକ୍ରିୟ ହୋଇ ଉଠିଛି।
ବାଂଲାଦେଶ ହିଂସା ପଛର କାରଣ କ’ଣ ?
ବାଂଲାଦେଶରେ ହିଂସାର ମୂଳ କାରଣ ହେଉଛି ଲାଗୁ ହୋଇଥିବା ସଂରକ୍ଷଣ ବ୍ୟବସ୍ଥା। ଦେଶରେ ସରକାରୀ ଚାକିରିରେ ୩୦ ପ୍ରତିଶତ ସଂରକ୍ଷଣ ରହିଛି। ୧୯୭୧ ସ୍ୱାଧୀନତା ଆନ୍ଦୋଳନରେ ଯେଉଁମାନେ ସଂଗ୍ରାମୀ ଥିଲେ ସେମାନଙ୍କ ସମ୍ପର୍କୀୟଙ୍କ ପାଇଁ ଏହି ବ୍ୟବସ୍ଥା ରଖାଯାଇଛି, ଯାହାକୁ ପ୍ରତ୍ୟାହାର କରିବା ପାଇଁ ଦାବି କରୁଛନ୍ତି ବିଭିନ୍ନ ଛାତ୍ର ସଂଗଠନ। ଏହି ଦାବି ନେଇ ବିଭିନ୍ନ ଛାତ୍ର ସଂଗଠନ ଆନ୍ଦୋଳନକୁ ଓହ୍ଲାଇଛନ୍ତି। ଏଥିସହ ପ୍ରଧାନମନ୍ତ୍ରୀ ଶେଖ ହାସିନାଙ୍କ ଇସ୍ତଫା ମଧ୍ୟ ଦାବି କରିଛନ୍ତି ଆନ୍ଦୋଳନକାରୀ।
ଏହି ଆନ୍ଦୋଳନ ବାଂଲାଦେଶରେ ଏକ ବ୍ୟାପକ ସରକାର ବିରୋଧୀ ଆନ୍ଦୋଳନରେ ପରିଣତ ହୋଇଛି। ଅଭିନେତା, ସଂଗୀତଜ୍ଞ ଏବଂ ଗାୟକଙ୍କ ସମେତ ସବୁ ସ୍ତରର ଲୋକେ ଏହାକୁ ସମର୍ଥନ କରୁଛନ୍ତି। ଲୋକଙ୍କ ସମର୍ଥନ ପାଇଁ ଆହ୍ୱାନ କରୁଥିବା ଗୀତଗୁଡିକ ସୋଶାଲ ମିଡିଆରେ ବେଶ୍ ଆଦୃତ ହେଉଛି, ଯେଉଁଥିରେ ବାଂଲାଦେଶବାସୀ ମଧ୍ୟ ଆନ୍ଦୋଳକାରୀଙ୍କ ସମର୍ଥନରେ ଥିବା ସ୍ପଷ୍ଟ ହେଉଛି।