ଓଏଲ୍ ବ୍ୟୁରୋ: ବାଜି ସାରିଛି ବିଗୁଲ। ଆଉ ମାସକ ପରେ ଅନୁଷ୍ଠିତ ହେବ ହରିୟାଣା ବିଧାନସଭା ନିର୍ବାଚନ। ତାରିଖ ଘୋଷଣା ପରେ ସମସ୍ତ ରାଜନୈତିକ ଦଳ ନିର୍ବାଚନ ବୈତରଣୀ ପାର କରିବା ପାଇଁ ଆରମ୍ଭ କରିଛନ୍ତି ରଣ କୌଶଳ। ଏସବୁ ମଧ୍ୟରେ ସାମ୍ନାକୁ ଆସିଛି ବଡ଼ ଖବର। କଂଗ୍ରେସରେ ଯୋଗ ଦେଇଛନ୍ତି କୁସ୍ତି ଖେଳାଳି ଭିନେଶ ଫୋଗାଟ ଓ ବଜରଙ୍ଗ ପୁନିଆ। ଭିନେଶ ଫୋଗାଟ ଓ ବଜରଙ୍ଗ ପୁନିଆ କଂଗ୍ରେସରେ ବିଧିବଦ୍ଧ ଭାବେ ସାମିଲ ହୋଇଛନ୍ତି।
ଏହା ସହ ରେଳ ବିଭାଗର ଚାକିରିରୁ ବିନେଶ ଫୋଗାଟ ଇସ୍ତଫା ଦେଇଛନ୍ତି। ବିନେଶ ନିଜେ ସୋସିଆଲ ମିଡିଆରେ ଏହାର ଫଟୋ ସେୟାର କରିଛନ୍ତି। ବିନେଶ ଲେଖିଛନ୍ତି ଯେ ଭାରତୀୟ ରେଳ ସେବା କରିବା ମୋ ଜୀବନର ଏକ ସ୍ମରଣୀୟ ତଥା ଗର୍ବିତ ସମୟ ଅଟେ। ମୋ ଜୀବନର ଏହି ସମୟରେ ମୁଁ ନିଜକୁ ରେଳ ସେବା ଠାରୁ ଅଲଗା କରିବାକୁ ନିଷ୍ପତ୍ତି ନେଇଛି ଏବଂ ମୋର ଇସ୍ତଫା ପତ୍ର ଭାରତୀୟ ରେଳବାଇର ଦକ୍ଷ ଅଧିକାରୀଙ୍କ ନିକଟରେ ଦାଖଲ କରିଛି। ଦେଶର ସେବାରେ ରେଳବାଇ ମୋତେ ଦେଇଥିବା ଏହି ସୁଯୋଗ ପାଇଁ ମୁଁ ଭାରତୀୟ ରେଳ ପରିବାରକୁ ସର୍ବଦା କୃତଜ୍ଞ ରହିବି।