ଓଏଲ୍ ବ୍ୟୁରୋ: ମଣିଷ ନିଜର ଅତ୍ୟାବଶ୍ୟକ ଦ୍ରଵ୍ୟର ପୂରଣ ପାଇଁ ବିଭିନ୍ନ କାର୍ଯ୍ୟ ପନ୍ଥା ଆପଣେଇ ଥାଏ। ଆଜି କାଲି ଶିକ୍ଷିତ ଗୋଷ୍ଠୀ ପଢା ସରୁ ସରୁ ଚାକିରୀ ଅଭିମୁଖେ ପ୍ରସ୍ତୁତ ହେଉଛନ୍ତି। ନିଜର ଆଶା ଆକାଂକ୍ଷା ପୂରଣ ପାଇଁ ଚାକିରୀକୁ ମାଧ୍ୟମ କରିଛନ୍ତି। ତେବେ ବଞ୍ଚିବା ପାଇଁ ଆପଣେଇଥିବା ଚାକିରୀ ଯେବେ ମରିବାର କାରଣ ପାଲଟେ, ସେତେବେଳେ ଅନେକ ପ୍ରଶ୍ନ ସୃଷ୍ଟି ହୁଏ। ପୁଣି ଏମିତି ଏକ ଘଟଣା ସାମ୍ନାକୁ ଆସିଛି, ଯାହା ଅନେକ ଚାକିରିଆଙ୍କୁ ଚିନ୍ତିତ କରିପକାଇଛି। ଆଜିକାଲି କାର୍ଯ୍ୟ ଚାପ କେତେ ଭୟଙ୍କର ହୋଇପାରେ ତାହାର ଏକ ଉଦାହରଣ ଦେଖିବାକୁ ମିଳିଛି ଲକ୍ଷ୍ନୌରେ।
ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁସାରେ, କାର୍ଯ୍ୟ ଚାପ ଯୋଗୁଁ ପୁଣେରେ ଜଣେ କର୍ମଚାରୀଙ୍କ ମୃତ୍ୟୁ ହେବାର କିଛି ଦିନ ପରେ ସରକାରଙ୍କ ଦୃଷ୍ଟି ଆକର୍ଷଣ କଲାବେଳେ ଲକ୍ଷ୍ନୌର ଜଣେ ମହିଳା ଅଫିସର୍ ଚେୟାରରୁ ଖସିପଡି ମୃତ୍ୟୁ ବରଣ କରିଥିବା ଅଭିଯୋଗ ହୋଇଛି। ତାଙ୍କ ସହକର୍ମୀମାନେ କହିଛନ୍ତି ଯେ, କାର୍ଯ୍ୟ ଚାପରେ ଏପରି ଘଟିଛି। ମଙ୍ଗଳବାର ଦିନ ଏହି ଘଟଣା ଘଟିଛି ଏବଂ ମହିଳା ଜଣଙ୍କ ଏଚଡିଏଫସି ବ୍ୟାଙ୍କରେ କାମ କରୁଥିବା ସଦାଫ ଫାତିମା ବୋଲି ଜଣାପଡିଛି।
ସଦାଫ ଫତିମା ଗୋପତିନଗରର ଏଚ୍ଡିଏଫ୍ସି ବ୍ୟାଙ୍କର ବିଭୁତି ଖଣ୍ଡ ଶାଖାରେ ଅତିରିକ୍ତ ଉପ-ସଭାପତି ଭାବରେ ନିଯୁକ୍ତ ହୋଇଥିଲେ। ସେଦିନ ସଦାଫ ଫତିମା ଅଫିସରେ କାମ କରୁଥିଲେ। ହଠାତ୍ ଚେୟାରରୁ ଖସି ପଡ଼ିଲେ। ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା, ସେଠାରେ ତାଙ୍କୁ ମୃତ ଘୋଷଣା କରାଯାଇଥିଲା। ପରେ ତାଙ୍କ ମୃତଦେହକୁ ପୋଷ୍ଟମର୍ଟମ ପାଇଁ ପଠାଯାଇଥିଲା। ଏକ୍ସ ପୋଷ୍ଟରେ ସମାଜବାଦୀ ପାର୍ଟି (ଏସପି) ମୁଖ୍ୟ ଅଖିଳେଶ ଯାଦବ ଏହି ଘଟଣାକୁ ଉଦ୍ବେଗଜନକ ବୋଲି କହିଛନ୍ତି ଏବଂ ଏହା ଦେଶରେ ବର୍ତ୍ତମାନର ଆର୍ଥିକ ଚାପର ପ୍ରତୀକ ବୋଲି କହିଛନ୍ତି।
https://x.com/yadavakhilesh/status/1838632405898567763
