ଓଏଲ୍ ବ୍ୟୁରୋ: ନାମାଙ୍କନ ଦାଖଲ କଲେ କଂଗ୍ରେସ ପ୍ରାର୍ଥୀନି ପ୍ରିୟଙ୍କା ଗାନ୍ଧୀ। କେରଳର ୱାୟନାଡ଼ ଲୋକସଭା ଆସନରେ ହେବାକୁ ଥିବା ଉପ-ନିର୍ବାଚନ ପାଇଁ ନାମାଙ୍କନ ଦାଖଲ କରିଛନ୍ତି ପ୍ରିୟଙ୍କା। ନାମାଙ୍କନ ପତ୍ର ଦାଖଲ ସମୟରେ ତାଙ୍କ ଭାଇ ତଥା ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ସ୍ୱାମୀ ରୋବର୍ଟ ଭଦ୍ରା ମଧ୍ୟ ତାଙ୍କ ସହ ଉପସ୍ଥିତ ରହିଥିଲେ। କଂଗ୍ରେସ ମହାସଚିତ ସମେତ କଂଗ୍ରେସ ମୁଖ୍ୟମନ୍ତ୍ରୀ ମାନେ ମଧ୍ୟ ସାମିଲ ଥିଲେ।
ନିର୍ବାଚନୀ ପ୍ରଚାର ସଭାରେ, ପ୍ରିୟଙ୍କା ଗାନ୍ଧୀ କହିଛନ୍ତି, ଯେତେବେଳେ ମୋତେ ୧୭ ବର୍ଷ ହୋଇଥିଲା, ମୁଁ ମୋ ବାପାଙ୍କ ପାଇଁ ୧୯୮୯ରେ ନିର୍ବାଚନୀ ପ୍ରଥମ ଥର କରିଥିଲି। ବର୍ତ୍ତମାନ ୩୫ ବର୍ଷ, ମୁଁ ବିଭିନ୍ନ ନିର୍ବାଚନରେ ମୋ ମା’, ଭାଇ ଏବଂ ମୋର ଅନେକ ସହକର୍ମୀଙ୍କ ପାଇଁ ପ୍ରଚାର କରିଛି। କିନ୍ତୁ ପ୍ରଥମ ଥର ମୁଁ ନିଜ ପାଇଁ ପ୍ରଚାର କରୁଛି। ମୁଁ କଂଗ୍ରେସ ସଭାପତିଙ୍କ ପାଖରେ ଗଭୀର କୃତଜ୍ଞ। ମୋତେ ପ୍ରାର୍ଥୀ ହେବାକୁ ସୁଯୋଗ ପ୍ରଦାନ କରିଥିବାରୁ ଏବଂ ୱାୟାନାଡ ପାଇଁ ପ୍ରାର୍ଥୀ ହେବାକୁ ମୋତେ ସମର୍ଥନ କରିଥିବାରୁ ମୋ ପରିବାର ପାଖରେ କୃତଜ୍ଞ। ଯଦି ଆପଣମାନେ ମୋତେ ଥରେ ସୁଯୋଗ ଦିଅନ୍ତି, ତେବେ ତୁମ ମାନଙ୍କ ପାଇଁ ପ୍ରତିନିଧିତ୍ୱ କରିବା ମୋର ପାଇଁ ଗୌରବର ବିଷୟ ହେବ।
ସୂଚନାଥାଉକି, ଦେଶରେ ହୋଇଥିବା ସାଧାରଣ ନିର୍ବାଚନରେ ରାହୁଲ ଗାନ୍ଧୀ ୱାୟନାଡ଼ ଲୋକସଭା ଆସନରୁ ବିଜୟୀ ହୋଇଥିଲେ। ରାଏବରେଲି ଆସନରୁ ମଧ୍ୟ ଜିତିଥିଲେ ରାହୁଲ। ଏଭଳି ପରିସ୍ଥିତିରେ ସେ ପରେ ୱାୟାନାଡ ଆସନରୁ ଇସ୍ତଫା ଦେଇଥିଲେ। ଏହା ପରେ ଏଠାରେ ଉପ-ନିର୍ବାଚନ ଅନୁଷ୍ଠିତ ହେଉଛି। ୧୩ ନଭେମ୍ବରରେ ଏଠାରେ ମତଦାନ ଅନୁଷ୍ଠିତ ହେବ, ଫଳାଫଳ ୨୩ ନଭେମ୍ବରରେ ଘୋଷଣା କରାଯିବ।
ଉପ-ନିର୍ବାଚନରେ କଂଗ୍ରେସ ପ୍ରିୟଙ୍କା ଗାନ୍ଧୀଙ୍କୁ ଏଠାରୁ ପ୍ରାର୍ଥୀ କରିଛି। ବରିଷ୍ଠ ସିପିଆଇ ନେତା ସତ୍ୟନ ମୋକେରି ୱାୟାନାଡ ଆସନରେ ପ୍ରିୟଙ୍କା ଗାନ୍ଧୀଙ୍କ ବିରୋଧରେ ପ୍ରାର୍ଥୀ ହୋଇଛନ୍ତି। ସିପିଆଇ ରାଜ୍ୟ ପରିଷଦ ବୈଠକରେ ଏହି ନିଷ୍ପତ୍ତି ନିଆଯାଇଛି। ସିପିଆଇ ସାଧାରଣ ସମ୍ପାଦକ ଡି.ରାଜାଙ୍କ ପତ୍ନୀ ଆନି ରାଜା ପୂର୍ବରୁ ୱାୟାନାଡ ଲୋକସଭା ନିର୍ବାଚନରେ ରାହୁଲ ଗାନ୍ଧୀଙ୍କ ବିରୋଧରେ ପ୍ରାର୍ଥୀ ହୋଇଥିଲେ ମଧ୍ୟ ପରାଜୟର ସାମ୍ନା କରିବାକୁ ପଡିଥିଲା।