ଓଏଲ୍ ବ୍ୟୁରୋ: କାଲିଠୁ କଟକର ଐତିହାସିକ ବାଲିଯାତ୍ରା। ମହାନଦୀ କୂଳରେ ଜୋରସୋରରେ ଚାଲିଛି ପ୍ରସ୍ତୁତି। ଦୋଳି ବନ୍ଧାଠାରୁ ଆରମ୍ଭ କରି ମଞ୍ଚ ସଜା ସବୁଠି ଚାଲିଛି ଜୋରସୋର କାମ। ଏଥରର ମୁଖ୍ୟ ଆକର୍ଷଣ ରହିବ କଟକ ଇନ୍ କଟକ। ଚଳିତବର୍ଷ ବାଲିଯାତ୍ରାକୁ ଉଦଘାଟନ କରିବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ପ୍ରଥମଥର ପାଇଁ ଉଦଘାଟନୀ କାର୍ଯ୍ୟକ୍ରମରେ ଯୋଗ ଦେବେ ୧୫ ଦେଶର ଅତିଥି। ଏଥିପାଇଁ ଉଭୟ ତଳ ଓ ଉପର ପଡ଼ିଆର ଅନୁଧ୍ୟାନ କରିଛନ୍ତି କଟକ ଜିଲ୍ଲାପାଳ, ଡିସିପି ଓ ସିଏମସି କମିଶନରଙ୍କ ସହ ୫୦ରୁ ଅଧିକ ଅଧିକାରୀ।
ଅନ୍ୟପଟେ ମେଳାକୁ ଶୃଙ୍ଖଳିତ କରିବା ସହ ଭିଡ ନିୟନ୍ତ୍ରଣ ଓ ଟ୍ରାଫିକ ପରିଚାଳନା ଉପରେ ଅଧିକ ଫୋକସ କରିଛି କମିଶନରେଟ ପୁଲିସ। ହାଇକୋର୍ଟଙ୍କ ନିର୍ଦ୍ଦେଶ ଅନୁସାରେ କଟକ ଜିଲ୍ଲାପାଳ ନିଷେଧାଦେଶ ଲଗାଇଛନ୍ତି। ଜୋବ୍ରାରୁ ଚହଟା, ଉପର ଓ ତଳ ପଡ଼ିଆ ରାସ୍ତାରେ ବସିବା ମନା। ଫୁଟପାଥରେ ବ୍ୟବସାୟ ନିଷେଧ ପାଇଁ ୧୬୩ ଧାରା ଜାରି ହୋଇଛି। ଉଠାଦୋକାନୀଙ୍କ ବ୍ୟବସାୟ ପାଇଁ ତଳପଡ଼ିଆରେ ସ୍ବତନ୍ତ୍ର ଜାଗା ସ୍ଥିର ହୋଇଛି। ବ୍ୟବସାୟ ପାଇଁ ତଳ ପଡ଼ିଆରେ ୨୦ ହଜାର ବର୍ଗଫୁଟ ସ୍ଥାନ ଚିହ୍ନଟ ହୋଇଛି।
ସୂଚନା ଅନୁସାରେ, ନଭେମ୍ବର ୧୫ରୁ ଆରମ୍ଭ ହୋଇ ନଭେମ୍ବର ୨୨ ଯାଏଁ ଚାଲିବ କଟକ ବାଲିଯାତ୍ରା। ଏନେଇ ପ୍ରସ୍ତୁତି ଆରମ୍ଭ ହୋଇଛି। ତଳ ପଡ଼ିଆ ସହ ଉପର ପଡ଼ିଆରେ ବି ବାଲିଯାତ୍ରା ହେବ। ଚଳିତ ବର୍ଷ ଉଭୟ ଉପର ଓ ତଳ ପଡ଼ିଆରେ ବାଲିଯାତ୍ରା ପାଇଁ ହାଇକୋର୍ଟ ଅନୁମତି ମିଳିଛି। ଲକ୍ଷାଧିକ ଲୋକଙ୍କ ଗହଳିରେ ଉଠିବ ପଡ଼ିବ ବାଲିଯାତ୍ରା ପଡ଼ିଆ। ଏହାକୁ ଦୃଷ୍ଟିରେ ରଖି ଉପର ଓ ତଳ ପଡ଼ିଆକୁ ଅଧିକ ରାସ୍ତା ସଂଯୋଗ କରାଯାଉଛି।