ଓଏଲ୍ ବ୍ୟୁରୋ: ଏକ ମହତ୍ତ୍ବପୂର୍ଣ୍ଣ ପଦକ୍ଷେପ ନେଇଛି ଆମେରିକା। ଭାରତକୁ ଚୋରି ହୋଇଥିବା ୧୪୦୦ରୁ ଅଧିକ ମୂର୍ତ୍ତି, କଳାକୃତିକୁ ହସ୍ତାନ୍ତର କରିଛି ଆମେରିକା। ଯାହାର ଦର ପାଖାପାଖୀ ୧୦ ନିୟୁତ ଡଲାର। ଭାରତୀୟ ମୁଦ୍ରା ହିସାବରେ ପ୍ରାୟ ୮୫ କୋଟି ଟଙ୍କା। ଏକ ସ୍ୱତନ୍ତ୍ର ସମାରୋହରେ ନ୍ୟୁୟର୍କସ୍ଥିତ ଭାରତୀୟ କନସଲ ଜେନେରାଲ ମନିଷ କୁଲହାରୀଙ୍କୁ ହୋମଲାଣ୍ଡ ସିକ୍ୟୁରିଟି ଇନ୍ଭେଷ୍ଟିଗେସନର ଗ୍ରୁପ୍ ସୁପରଭାଇଜର ଆଲୋକଜାଣ୍ଡ୍ରା ଡିଆର୍ମସ ଏସବୁ କଳାକୃତି ହସ୍ତାନ୍ତର କରିଥିଲେ।
ଭାରତକୁ ଫେରାଇଥିବା କିଛି କଳାକୃର୍ତ୍ତି ନ୍ୟୁୟର୍କର ମେଟ୍ରୋପଲିଟନ ମୁଜିୟମ୍ ଅଫ ଆର୍ଟରେ ପ୍ରଦର୍ଶିତ ହେଉଥିଲା। ସେହି ଭିତରେ ଏକ ବିଶେଷ ବସ୍ତୁ ରହିଛି। ଯାହାକି ଏ ବଳୁଧା ପଥରର ମୂର୍ତ୍ତି। ଯାହାକୁ ଆକାଶୀୟ ନର୍ତ୍ତକୀ ଭାବେ ଜଣାଯାଏ। ଏହି ମୂର୍ତ୍ତିଟି ମଧ୍ୟପ୍ରଦେଶରୁ ଚୋରି ହୋଇଥିଲା। ଚୋରା ଚାଲଣକାରୀମାନେ ଅଶି ଦଶକରେ ଏହାକୁ ଯେଭଳି ସହଜରେ ନେଇପାରିବେ ସେଥିପାଇଁ ଦୁଇଖଣ୍ଡ କରିଦେଇଥିଲେ।
ଚୋରି ମୂର୍ତ୍ତିଟିକୁ ପ୍ରଥମେ ଲଣ୍ଡନକୁ ନିଆଯାଇଥିଲା। ସେଠାରୁ ୧୯୯୨ରେ ସୁଭାଷ କପୁରଙ୍କ ପରାମର୍ଶରେ ନ୍ୟୁୟର୍କ ଅଣାଯାଇଥିଲା। ଠିକ୍ ଭାବେ ଯୋଡାଯିବା ପରେ ତାକୁ ସୁଭାଷ କପୁର ଜଣେ ବ୍ୟକ୍ତିଙ୍କୁ ପ୍ରଦାନ କରିଥିଲେ। ୨୦୨୩ରେ ତାକୁ ହୋମଲାଣ୍ଡ ସିକ୍ୟୁରିଟି ପକ୍ଷରୁ ଜବତ କରାଯାଇଥିଲା। ସେହିଭଳି ଆଉ ଏକ ମୂର୍ତ୍ତି ହେଉଛି ତାନେସାର ଦେବୀ ମା’ଙ୍କର। ରାଜସ୍ଥାନର ଏକ ମନ୍ଦିରରୁ ଏହା ଷାଠିଏ ଦଶକରେ ଲୁଟ୍ ହୋଇଥିଲା।
ପ୍ରାଚୀନ କଳାକୃତିର ଚୋରା ବ୍ୟବସାୟୀ ସୁଭାଷ କପୁର ଓ ନାନ୍ସି ୱେନର ଏବଂ ତାଙ୍କ ଦ୍ୱାରା ପରିଚାଳିତ ନେଟୱାର୍କ ଠାରୁ ବିଭିନ୍ନ ସମୟରେ କିଛି କଳାକୃତି ଜବତ କରାଯାଇଥିଲା। ପ୍ରାୟ ୧୦ ବର୍ଷରୁ ଅଧିକ ସମୟ ହେଲା ହୋମଲାଣ୍ଡ ସିକ୍ୟୁରିଟି ଓ ଜିଲ୍ଲା ସରକାରୀ ଆଣ୍ଟିକ୍ୟୁଟିଜ୍ ଟ୍ରାଫିକିଂ ୟୁନିଟ୍ ପକ୍ଷରୁ ସୁଭାଷ କପୁରଙ୍କ ଗତିବିଧି ଉପରେ ତଦନ୍ତ କରାଯିବା ପରେ ଏସବୁ କଳାକୃତି ମିଳିଥିଲା। ୨୦୧୨ରେ ସୁଭାଷ କପୁରଙ୍କ ବିରୋଧରେ ଡିଷ୍ଟ୍ରିକ୍ଟ ଆଟର୍ଣ୍ଣିଙ୍କ କାର୍ଯ୍ୟାଳୟ ପକ୍ଷରୁ ଗିରଫ ପରୱାନା ଜାରି କରାଯାଇଥିଲା ।