ଝାନ୍ସି ଅଗ୍ନିକାଣ୍ଡ: କ୍ଷତିପୂରଣ ରାଶି ଘୋଷଣା କଲେ ମୁଖ୍ୟମନ୍ତ୍ରୀ
ଜଣେ ପ୍ରତ୍ୟକ୍ଷଦର୍ଶୀଙ୍କ କହିବା ମୁତାବକ ଜଣେ ନର୍ସ ଅକ୍ସିଜେନ୍ ସିଲିଣ୍ଡର ପାଇପ୍କୁ ଯୋଡ଼ିବା ପାଇଁ ଦିଆସିଲି କାଠି ଲଗାଇଥିଲେ।
ଓଏଲ୍ ବ୍ୟୁରୋ: ଉତ୍ତର ପ୍ରଦେଶର ଝାନ୍ସିସ୍ଥିତ ମହାରାଣୀ ଲକ୍ଷ୍ମୀବାଇ ହସ୍ପିଟାଲରେ ଭୟଙ୍କର ଅଗ୍ନିକାଣ୍ଡ ଘଟିଛି। ଶୁକ୍ରବାର ବିଳମ୍ବିତ ରାତିରେ ହସ୍ପିଟାଲରେ ନିଆଁ ଲାଗିବାରୁ ୧୦ ଜଣ ଶିଶୁଙ୍କ ମୃତ୍ୟୁ ହୋଇ ଯାଇଛି। ୧୬ ଜଣ ଶିଶୁ ଗୁରୁତର ହୋଇଛନ୍ତି। ସେହି ସମସ୍ତ ଶିଶୁଙ୍କର ଏବେ ଚିକିତ୍ସା କରାଯାଉଥିବା ସୂଚନା ରହିଛି। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହି ଘଟଣାର ଉଚ୍ଚ ସ୍ତରୀୟ ଯାଞ୍ଚ ପାଇଁ ନିର୍ଦ୍ଦେଶ ଦେଇଛନ୍ତି।
ସର୍ଟ ସର୍କିଟରୁ ନିଆଁ ଲାଗିଥିବା କଥା ପ୍ରଥମରୁ ଚର୍ଚ୍ଚା ହେଉଥିଲା ହେଲେ ଏବେ ଆଉ ଏକ ଖବର ସାମ୍ନାକୁ ଆସିଛି। ଜଣେ ପ୍ରତ୍ୟକ୍ଷଦର୍ଶୀଙ୍କ କହିବା ମୁତାବକ ଜଣେ ନର୍ସ ଅକ୍ସିଜେନ୍ ସିଲିଣ୍ଡର ପାଇପ୍କୁ ଯୋଡ଼ିବା ପାଇଁ ଦିଆସିଲି କାଠି ଲଗାଇଥିଲେ। କାଠି ଜଳିବାରୁ ପୁରା ଓ୍ବାର୍ଡରେ ନିଆଁ ଲାଗି ଯାଇଥିଲା।
ଝାନ୍ସିର ମୁଖ୍ୟ ଚିକିତ୍ସାଳୟର ସୁପରିଡେଣ୍ଟଣ୍ଡଙ୍କ ଅନୁସାରେ ଏନ୍ଆଇସିୟୁ ବୋର୍ଡରେ ୫୪ ଜଣ ଶିଶୁ ଥିଲେ। ଅଚାନକ ଅକ୍ସିଜେନ୍ କସଣ୍ଟ୍ରେଣ୍ଟରରେ ନିଆଁ ଲାଗିଥିଲା। ଯାହାଫଳରେ ଶିଶୁ ଥିବା ଓ୍ବାର୍ଡରେ ନିଆଁ ଲାଗିଯାଇଥିଲା। ଝାନ୍ସି ଡିଭିଜନର ଡିଆଇଜି କହିଛନ୍ତି ବର୍ତ୍ତମାନ ନିଆଁକୁ ଆୟତ୍ତ କରାଯାଇଛି। ଯେଉଁମାନେ ଆହତ ହୋଇଛନ୍ତି ସେମାନଙ୍କୁ ଅନ୍ୟ ମେଡିକାଲକୁ ସ୍ଥାନାନନ୍ତରିତ କରିବା ପ୍ରକ୍ରିୟା ଜାରି ରହିଛି।
ଏହି ଘଟଣାକୁ ଅତି ଗୁରୁତର ସହ ନେଇଥିବା ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହାକୁ ଅତ୍ୟନ୍ତ ଦୁର୍ଭାଗ୍ୟଜନକ କହିଛନ୍ତି। ଏଥିସହ ମୃତକଙ୍କ ପରିବାର ପ୍ରତି ଗଭୀର ସମବେଦନା ଜଣାଇବା ସହ କ୍ଷତିପୂରଣ ରାଶି ଘୋଷଣା କରିଛନ୍ତି।
ଝାନସୀ ମେଡିକାଲରେ ଘଟିଥିବା ଅଗ୍ନିକାଣ୍ଡ ଯୋଗୁ ମୃତ ଶିଶୁଙ୍କ ପରିବାର ପାଇଁ ୫ ଲକ୍ଷ ଲେଖାଏ ଅନୁକମ୍ପାମୂଳକ ରାଶି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ଯୋଗୀ। ଏଥିସହ ଗୁରୁତରଙ୍କ ପରିବାର ନିମନ୍ତେ ୫୦ ହଜାର ଟଙ୍କା ଲେଖାଏ ଘୋଷଣା କରିଛନ୍ତି।