ଓଏଲ୍ ବ୍ୟୁରୋ: ରାଜ୍ୟ ରାଜନୀତିରେ ବଢିଛି ଗନ୍ଧମାର୍ଦ୍ଦନ ଜମି ବିବାଦ। ବଲାଙ୍ଗିର-ବରଗଡ଼ ଜିଲ୍ଲା ସୀମାନ୍ତ ଗନ୍ଧମାର୍ଦ୍ଦନ ପାହାଡ଼ର ପାଦଦେଶରେ ଆଦାନୀ ଗ୍ରୁପ ଜମି କିଣିଛି। ଗୁଜରାଟର ଅହମଦାବାଦସ୍ଥିତ ଆଦାନୀ କର୍ପୋରେଟ୍ ହାଉସ ପକ୍ଷରୁ ‘ମହାନଦୀ ମାଇନ୍ସ ଆଣ୍ଡ ମିନେରାଲ୍ସ ପ୍ରାଇଭେଟ ଲିମିଟେଡ’ ନାଁରେ ସେଠି ଜମି କିଣାଯାଇଛି। ଆଉ ଏହାକୁ ଏନେଇ ଏବେ ତେଜିଛି ରାଜନୀତି। ବିଜେଡି ଏହି ପ୍ରସଙ୍ଗରେ ବିଜେପିକୁ ଘେରିଥିବାବେଳେ, ପାଲଟା ଜବାବ ବି ଦେଇସାରିଛି ଭାରତୀୟ ଜନତା ପାର୍ଟି। ରାଜ୍ୟ ରାଜନୀତି ପରେ ଗୃହରେ ଗନ୍ଧମାର୍ଦ୍ଦନ ତାତି ଦେଖିବାକୁ ମିଳିଛି।
ଜଙ୍ଗଲ ଜମି ପ୍ରସଙ୍ଗକୁ ନେଇ ମନ୍ତ୍ରୀ ସୁରେଶ ପୂଜାରୀ ବିଜେଡିକୁ କଟାକ୍ଷ କରିଛନ୍ତି। ମନ୍ତ୍ରୀ କହିଛନ୍ତି, ହତ୍ୟା କରିନଥିବା ଲୋକ ନାଁରେ ହତ୍ୟା ମାମଲା ରୁଜୁ କରି ଜେଲରେ ଭର୍ତ୍ତି କରିଛି ବିଜେଡି। ଯିଏ ଆଜି ଜଙ୍ଗଲ ଜମିର ସୁରକ୍ଷା କଥା କହୁଛି, ସିଏ ଦିନେ କଂପାନୀମାନଙ୍କୁ ଜମି ଟେକି ଦେଇଥିଲେ। ୧୯୯୧ରେ ବିଜୁ ବାବୁ ବାଲକୋକୁ ୨୦୦୪ରେ ବିଜେଡି ବେଦାନ୍ତକୁ ଜମି ଟେକି ଦେଇଥିଲେ। କାହାର କ’ଣ ଚରିତ୍ର ଓଡ଼ିଶାବାସୀ ଜାଣିବାର ଆବଶ୍ୟକ ରହିଛି। ବିଜେଡି ମିତ୍ର ତ ଦୂରର କଥା, ଶତ୍ରୁ ହେବା ପାଇଁ ମଧ୍ୟ ଯୋଗ୍ୟ ନୁହେଁ। ବ୍ରିଟିଶ କଣ କରୁଥିଲେ ତାହା ତ ଜାଣିନି, ବିଜେଡି ତା’ଠାରୁ ବି ଭୟଙ୍କର ବୋଲି ସୁରେଶ ପୂଜାରୀ କହିଛନ୍ତି।