ଓଏଲ୍ ବ୍ୟୁରୋ: ପୁରୀ କଣାସ ଅଞ୍ଚଳରେ ଡାଇରିଆରେ ଜଣକର ମୃତ୍ୟୁ ହୋଇଥିବା ସ୍ପଷ୍ଟ କରିଛି ସ୍ଵାସ୍ଥ୍ୟ ବିଭାଗ। କଣାସ ଅଞ୍ଚଳରେ ଝାଡ଼ାବାନ୍ତି ବ୍ୟାପିବା ଓ ଏଥିରେ ଲୋକଙ୍କ ମୃତ୍ୟୁକୁ ନେଇ ରାଜ୍ୟ ସରକାରଙ୍କ ଉପରେ ବର୍ଷିଛି ବିଜେଡି। ଏକ ସାମ୍ବାଦିକ ସମ୍ମିଳନୀରେ କଡ଼ା ସମାଲୋଚନା କରିଛନ୍ତି ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ସଂଜୟ ଦାସବର୍ମା ଓ ପୂର୍ବତନ ବିଧାୟକ ରୁଦ୍ର ମହାରଥୀ। ସଂଜୟ ଦାସବର୍ମା ଅଭିଯୋଗ କରିଛନ୍ତି, କଣାସ ଅଞ୍ଚଳରେ ଝାଡ଼ାବାନ୍ତି ବ୍ୟାପିଛି। ଗଙ୍ଗୁଆ ନଦୀର ବର୍ଜ୍ୟବସ୍ତୁ ପରିଚାଳନା ଠିକ ଭାବେ ନ ହେବାରୁ ମଇଳା ପାଣି ଦୟା ନଦୀ ଦେଇ ଚିଲିକାକୁ ଯାଉଛି। ଏହା ଦ୍ୱାରା ଦୟା, ରାଜୁଆ, ମକରା, ରତ୍ନାଚିରା, ଲୁଣା ଭାର୍ଗବୀ ନଦୀ ପ୍ରଭାବିତ ହେଉଛି। ଚିଲିକା ବି ପ୍ରଭାବିତ ହୋଇଛି।
ଦୂଷିତ ପାଣି ବ୍ୟବହାର କରି ଲୋକେ ମୃତ୍ୟୁ ମୁଖରେ ପଡ଼ିଛନ୍ତି। ୨୫୦ରୁ ଅଧିକ ଲୋକ ପୁରୀ ଓ ଭୁବନେଶ୍ୱରରେ ଚିକିତ୍ସିତ ହେଉଛନ୍ତି। ଏହା ବଡ଼ ବିପର୍ଯ୍ୟୟ। ପ୍ରଶାସନ ବିଫଳ। ସଂଜୟ ପ୍ରଶ୍ନ କରିଛନ୍ତି, ଏଯାଏ ମୁଖ୍ୟମନ୍ତ୍ରୀ ସମୀକ୍ଷା କଲେଣି କି। ଆଜି ହିଁ ମୁଖ୍ୟ ଶାସନ ସଚିବ ସମୀକ୍ଷା କରନ୍ତୁ ବୋଲି ଦାବି କରିଛନ୍ତି ସଂଜୟ ଦାସବର୍ମା। ସେ ଦାବି କରିଛନ୍ତି, ଦୀର୍ଘ ଓ କ୍ଷୁଦ୍ର ଯୋଜନା ସହ ଲୋକଙ୍କୁ ଚିକିତ୍ସା ଯୋଗାନ୍ତୁ।
ସେପଟେ ପିପିଲିର ପୂର୍ବତନ ବିଧାୟକ ରୁଦ୍ର ମହାରଥୀ କହିଛନ୍ତି, ଦୁଃଖର କଥା, ସାତ ମାସ ପରେ ବି ସରକାର ଲୋକଙ୍କ ସହିତ ନାହାନ୍ତି। କେବଳ ରଙ୍ଗ, ନାଁ ବଦଳାଇବାରେ ଓ ଖାଇବାରେ ବ୍ୟସ୍ତ। ନବୀନ ପଟ୍ଟନାୟକ ୧୦୦ କୋଟି ଟଙ୍କାର ପ୍ରକଳ୍ପ କରିଥିଲେ। ହେଲେ ଏବେ ତାର କାମ ଠପ। ପ୍ରଦୂଷିତ ପାଣି ଯୋଗୁଁ ପିପିଲିର ଲୋକେ କର୍କଟ ରୋଗରେ ପୀଡିତ। ନବୀନ ସରକାର ସ୍ଵେରେଜ ଟ୍ରିଟମେଣ୍ଟ ପାଇଁ ଅନୁମୋଦନ କରିଥିଲେ। ବିଜେପି ସରକାର କେବେ ସୁଦ୍ଧା ଏହି ପ୍ଲାଣ୍ଟ କରିବ ବୋଲି ପ୍ରଶ୍ନ କରିଛନ୍ତି ରୁଦ୍ର ମହାରଥୀ। ସେ କହିଛନ୍ତି, ବିଜେପି ସରକାର ଉପରେ ଲୋକଙ୍କ ଭରସା ଉଠିଗଲାଣି।
ଅନ୍ୟପଟେ, ଜନସ୍ଵାସ୍ଥ୍ୟ ନିର୍ଦ୍ଦେଶକ ଡାକ୍ତର ନୀଳକଣ୍ଠ ମିଶ୍ର କହିଛନ୍ତି, ଝାଡ଼ାବାନ୍ତିରେ ମୋଟ ୩ ଜଣଙ୍କର ମୃତ୍ୟୁ ହୋଇଥିବା ସୂଚନା ଆସିଥିଲା। ସେଥିରୁ ଜଣେ ଡାଇରିଆରେ ମରିଥିବା ସ୍ପଷ୍ଟ ହୋଇଛି। ଅନ୍ୟ ଦୁଇ ଜଣଙ୍କର ରିପୋର୍ଟକୁ ଅପେକ୍ଷା କରାଯାଇଛି। ସେ କହିଛନ୍ତି, କଣାସ ଅଞ୍ଚଳରେ ୭-୮ ଦିନ ହେଲା ବ୍ୟାପିଛି ଝାଡ଼ାବାନ୍ତି। ପ୍ରଥମେ ଏକ ଭୋଜିରୁ ଝାଡ଼ାବାନ୍ତି ଆରମ୍ଭ ହୋଇଥିଲା। ତାପରେ ଆଖପାଖ ୫ଟି ଗାଁକୁ ଏହା ବ୍ୟାପିଛି। ବର୍ତ୍ତମାନ ସୁଦ୍ଧା ୭୧ ଜଣ ସଂକ୍ରମିତ ହେଇଛନ୍ତି।
ଦୟା ନଦୀରୁ ଦୂଷିତ ଜଳ ବ୍ୟବହାର ଯୋଗୁଁ ଡାଇରିଆ ବ୍ୟାପିଥିବା ଜଣାପଡ଼ିଛି। ନମୁନା ପରୀକ୍ଷାରୁ ଇ-କୋଲି ବ୍ୟାକ୍ଟେରିଆ ଚିହ୍ନଟ ହୋଇଛି। ବର୍ତ୍ତମାନ ସ୍ଥିତି ନିୟନ୍ତ୍ରଣ ଅଛି। ଭୁବନେଶ୍ଵରରୁ ୨ଟି ଟିମ ସହ ସ୍ବାସ୍ଥ୍ୟ ବିଭାଗର ମୋଟ ୮ଟି ଟିମ ସେହି ଅଞ୍ଚଳରେ ନିୟୋଜିତ ହୋଇଛନ୍ତି। ନଦୀର ସବୁ ଘାଟକୁ ସୁପର କ୍ଲୋରିନେସନ୍ ବା ବିଶୋଧନ କରାଯାଉଛି। ସରକାରଙ୍କ ପକ୍ଷରୁ ବିଶୁଦ୍ଧ ଜଳ ଯୋଗାଇ ଦିଆଯାଉଥିବା ଡାକ୍ତର ନୀଳକଣ୍ଠ ମିଶ୍ର କହିଛନ୍ତି।