ଓଏଲ୍ ବ୍ୟୁରୋ: ପ୍ରାୟ ୭ ମାସ ହେବ ପିସିସି ସଭାପତି ଚୌକି ଫାଙ୍କା। ମାସ ପରେ ମାସ ଗଡ଼ି ଚାଲିଥିବା ବେଳେ ରାଜ୍ୟରେ କଂଗ୍ରେସ ମୁଖିଆ ପଦରେ କାହାକୁ ନିଯୁକ୍ତି ଦିଆଯାଇ ପାରିନାହିଁ। ଏଆଇସିସି ପିସିସିର ସମସ୍ତ କମିଟିକୁ ଭଙ୍ଗ କରିଥିବାରୁ ରାଜ୍ୟରେ କଂଗ୍ରେସ ସଙ୍ଗଠନ ପ୍ରାୟ ସୁପ୍ତ ଓ କିଛି ଦଳୀୟ ନେତା ନିଜ ନିଜ ପ୍ରଚେଷ୍ଟାରେ ସଙ୍ଗଠନ ଚଳାଉଥିବା ଦେଖାଯାଉଛି।
ଏସବୁ ଭିତରେ ଏକ ବଡ଼ ଖବର ସାମ୍ନାକୁ ଆସିଛି। ଖୁବଶୀଘ୍ର ରାଜ୍ୟ କଂଗ୍ରେସକୁ ମିଳିବ ନୂଆ ମଙ୍ଗୁଆଳ। ଦିଲ୍ଲୀ ନିର୍ବାଚନ ପରେ ପିସିସି ସଭାପତି ନାଁ ଘୋଷଣା କରିବେ ହାଇକମାଣ୍ଡ। ଦୁଇଜଣ ପର୍ଯ୍ୟବେକ୍ଷକ ସେମାନଙ୍କ ରିପୋର୍ଟ ଦେଇଛନ୍ତି ବୋଲି କଂଗ୍ରେସ ନେତା ସନ୍ତୋଷ ସିଂହ ସାଲୁଜା କହିଛନ୍ତି। ସେ କହିଛନ୍ତି, ଦିଲ୍ଲୀ ନିର୍ବାଚନ ପାଇଁ ନେତାମାନେ ବ୍ୟସ୍ତ ଅଛନ୍ତି। କଂଗ୍ରେସର ତୃଣମୂଳ ସ୍ତରରୁ ରାଜ୍ୟ ନେତୃତ୍ୱ ଯାଏ ନବକଳେବର ହେବ। ୭ ମାସ ହେବ କଂଗ୍ରେସ ପିସିସି ମୁଖିଆ ନାହାନ୍ତି। ନିୟମ ଅନୁସାରେ ନିର୍ବାଚନ ପ୍ରକ୍ରିୟାର ସମୟ ହୋଇନାହିଁ।
ସୂଚନାଯୋଗ୍ୟ ଯେ, ଗତ ଜୁଲାଇ ୨୧ରେ ପିସିସିର ସମସ୍ତ କମିଟିକୁ ଏଆଇସିସି ଭଙ୍ଗ କରିଥିଲା। ୨୦୨୪ ସାଧାରଣ ନିର୍ବାଚନରେ ଆଶାନୁରୂପ ସଫଳତା ମିଳିିନଥିବାରୁ ହାଇକମାଣ୍ଡ ଦଳର ସମସ୍ତ ଛାମୁଆ କମିଟି ଭଙ୍ଗ କରିଥିଲେ। ତେବେ ନୂଆ ନେତା ସନ୍ଧାନରେ ଏଆଇସିସି ଦୀର୍ଘ ୭ ମାସ ହେବ କସରତ ଜାରି ରଖିଥିଲେ ମଧ୍ୟ ବର୍ତ୍ତମାନ ପର୍ଯ୍ୟନ୍ତ ନିଷ୍କର୍ଷ ବାହାରି ପାରୁନାହିଁ।