କଂଗ୍ରେସକୁ ଫେରିବେ କି ସୌମ୍ୟରଞ୍ଜନ ?

ଓଏଲ୍ ବ୍ୟୁରୋ: କଂଗ୍ରେସକୁ ଟ୍ରାକ୍କୁ ଆଣିବାକୁ ଚେଷ୍ଟା ଆରମ୍ଭ କରିଛନ୍ତି ନୂଆ ପିସିସି ସଭାପତି ଭକ୍ତଚରଣ ଦାସ। ସେ ଓଡ଼ିଶା ପ୍ରଦେଶ କଂଗ୍ରେସର ମୁଖିଆ ହେଉ ହେଉ ନେଇଛନ୍ତି ବଡ଼ ନିଷ୍ପତ୍ତି। ନିଲମ୍ବିତ ହୋଇଥିବା ସମସ୍ତ ନେତାଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହୃତ କରାଯାଇଥିବା ଘୋଷଣା କରିଥିଲେ ଶ୍ରୀ ଦାସ। ଯାହାଫଳରେ ଦଳରୁ ନିଲମ୍ବିତ ହୋଇଥିବା ନେତାଙ୍କ ଘର ବାହୁୁଡ଼ା ହୋଇଛି। ଏହି ପ୍ରସଙ୍ଗରେ ରାଜ୍ୟର ବରିଷ୍ଠ ନେତା ସୌମ୍ୟରଞ୍ଜନ ପଟ୍ଟନାୟକ ଦେଇଛନ୍ତି ବଡ଼ ପ୍ରତିକ୍ରିୟା। ଯାହାକୁ ନେଇ ରାଜ୍ୟ ରାଜନୀତି ହଟଚମଟ। ଏପରିକି ପୁୁଣିଥରେ କଂଗ୍ରେସକୁ ଫେରିବେ କି ସୌମ୍ୟରଞ୍ଜନ ପଟ୍ଟନାୟକ ବୋଲି ସୋସିଆଲ ମିଡିଆରେ ଚର୍ଚ୍ଚା ଆରମ୍ଭ ହୋଇଛି।
ଓଡ଼ିଶା କଂଗ୍ରେସ ସଭାପତି ନିଲମ୍ବନ ଆଦେଶ ଉଠାଇ ଦେବା ପ୍ରସଙ୍ଗରେ ସୌମ୍ୟରଞ୍ଜନ ପଟ୍ଟନାୟକ କହିଛନ୍ତି, କଂଗ୍ରେସ ଏକ ପୁରୁଣା ଦଳ। ନିଜ ଭୁଲ୍କୁ ସ୍ବୀକାର କରନ୍ତୁ । ଆଗକୁ ନିଶ୍ଚିତ ସୁଦୃଢ଼ ହେବ ଦଳ। କଂଗ୍ରେସକୁ ଫେରିବେ କି ପ୍ରଶ୍ନରେ ଶ୍ରୀ ପଟ୍ଟନାୟକ କହିଛନ୍ତି, ୧୨ ବର୍ଷ ତଳେ କିଏ କାହିଁକି ମୋତେ ଦଳରୁ ବହିଷ୍କାର କରିଥିଲା। ତାର କାରଣ ପାଉନାହିଁ। ପିିସିସି ସଭାପତି ବହିଷ୍କାରର କାରଣ କହିବେ କି ? ଏବେ କାଇଁ ନେତାଙ୍କ ମନ ପରିବର୍ତ୍ତନ ହେଉଛି ଜାଣିନି ବୋଲି କହିଛନ୍ତି ଶ୍ରୀ ପଟ୍ଟନାୟକ।
ସେ ଆହୁୁରି କହିଛନ୍ତି, କୌଣସି ଦଳର ଭବିଷ୍ୟତ ଅନ୍ଧାର ନୁହେଁ, କଂଗ୍ରେସର ବି ନୁହେଁ।କଂଗ୍ରେସ ଏକ ପୁରୁଣା ଦଳ। ଭୁଲ୍ ସ୍ବୀକାର କରନ୍ତୁ; ନିଶ୍ଚିତ ଦୃଢ଼ ହେବ। ଅହଂକାର ଛାଡ଼ନ୍ତୁ, ଅହଂକାର ବିପଦଜକ ପ୍ରମାଣିତ ହୋଇଛି। କଂଗ୍ରେସ ଏକ ସର୍ବପୁରାତନ ଦଳ, କିନ୍ତୁ ଏବେ ଅବସ୍ଥା ଭଲ ନାହିଁ ବୋଲି କହିଛନ୍ତି ଶ୍ରୀ ପଟ୍ଟନାୟକ।