ଦିଲ୍ଲୀରେ ମୁଖ୍ୟମନ୍ତ୍ରୀ ପଦ ପାଇଁ କାହିଁକି ରେଖାଙ୍କୁ ବାଛିଲା ବିଜେପି ? ଜାଣନ୍ତୁ, ୩ ବଡ଼ କାରଣ

ଓଏଲ୍ ବ୍ୟୁରୋ: ଦିଲ୍ଲୀର ନୂତନ ମୁଖ୍ୟମନ୍ତ୍ରୀ ଭାବେ ଶପଥ ନେଲେ ୫୦ ବର୍ଷିୟ ରେଖା ଗୁୁପ୍ତା। ଏବିଭିପିରୁ ରାଜନୈତିକ ଜୀବନ ଆରମ୍ଭ କରିଥିବା ରେଖା ଗୁପ୍ତା ଦିଲ୍ଲୀ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି। ସୁଷମା ସ୍ୱରାଜ, ଶୀଲା ଦିକ୍ଷୀତ ଓ ଆତିଶୀ ମାର୍ଲେନାଙ୍କ ପରେ ଚତୁର୍ଥ ମହିଳା ଭାବେ ଦିଲ୍ଲୀ ମୁଖ୍ୟମନ୍ତ୍ରୀ ଆସନରେ ବସିଛନ୍ତି ରେଖା ଗୁପ୍ତା। ଦୀର୍ଘ ୨୭ ବର୍ଷ ପରେ ଦିଲ୍ଲୀରେ ବିଜେପି କ୍ଷମତାକୁ ଫେରିଛି। ଗତକାଲି ବିଜେପି ବିଧାୟକ ଦଳ ବୈଠକରେ ନୂଆ ମୁଖ୍ୟମନ୍ତ୍ରୀ ଭାବେ ଦିଲ୍ଲୀ ଶାଲିମାରବାଗ ବିଧାୟିକା ରେଖା ଗୁପ୍ତାଙ୍କ ନାଁରେ ମୋହର ବାଜିଥିଲା।
ତେବେ ଆରଏସ୍ଏସ୍ ମହିଳା ମୁଖ୍ୟମନ୍ତ୍ରୀ ଭାବେ ରେଖା ଗୁପ୍ତାଙ୍କ ନାମ ଆଗକୁ ବଢ଼ାଇଥିଲା। ଆଉ ଭାରତୀୟ ଜନତା ପାର୍ଟି ତାକୁ ସମର୍ଥନ କରିିଥିଲା। ଯାହାଫଳରେ ଦିଲ୍ଲୀର ୪ର୍ଥ ମହିଳା ମୁଖ୍ୟମନ୍ତ୍ରୀ ହୋଇଛନ୍ତି ରେଖା ଗୁପ୍ତା। ଛାତ୍ର ରାଜନୀତିରୁ ରାଜନୈିତିକ ଜୀବନ ଆରମ୍ଭ କରିଥିବା ରେଖା ଗୁପ୍ତା ୨ ଥର ବିଧାନସଭା ନିର୍ବାଚନରେ ପରାଜିତ ହୋଇଥିଲେ। ୩ୟ ଥର ନିର୍ବାଚନ ଲଢ଼ି ପ୍ରଥମ ଥର ବିଧାୟକ ସାଜିଥିବା ରେଖା ଗୁୁପ୍ତାଙ୍କୁ ଦିଲ୍ଲୀର ମୁଖ୍ୟମନ୍ତ୍ରୀ କରିଛି ବିଜେପି। ତେବେ ଦିଲ୍ଲୀରେ କାହିଁକି ରେଖା ଗୁପ୍ତାଙ୍କୁ ମୁଖ୍ୟମନ୍ତ୍ରୀ ଭାବେ ବିଜେପି ବାଛିଲା। ତା ପଛରେ ୩ଟି କାରଣ ରହିଛି।
ପ୍ରଥମ କାରଣ: କେଜ୍ରିଓ୍ବାଲଙ୍କ ପରି ବୈଶ୍ୟ
ରେଖା ଗୁପ୍ତା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ପରି ବୈଶ୍ୟ ଅଟନ୍ତି। ଦିଲ୍ଲୀରେ ବୈଶ୍ୟ ସମୁଦାୟର ବ୍ୟାପାର ବାଣିଜ୍ୟରେ ଦଖଲ ରହିଛି। ବୈଶ୍ୟ ସମାଜ ବିଜେପିର କୋର ଭୋଟର। ଏଥିସହିତ ମହିଳାଙ୍କ ସଶକ୍ତିକରଣକୁ ନଜରରେ ରଖି ରେଖା ଗୁପ୍ତାଙ୍କୁ ମୁଖ୍ୟମନ୍ତ୍ରୀ ଭାବେ ଚୟନ କରିଥିଲା ବିଜେପି।
ଦ୍ବିତୀୟ କାରଣ: ମହିଳା ଭୋଟ୍
ଦିଲ୍ଲୀ ବିଧାନସଭା ନିର୍ବାଚନରେ ବିଜେପି ୪୮ଟି ଆସନରେ ବିଜୟୀ ହୋଇଛି। ଚଳିିତ ନିର୍ବାଚନରେ ମୋଟ ୪୫.୫୬ ପ୍ରତିଶତ ଭୋଟ ବିଜେପିକୁ ମିଳିଛି। ଏହା ପଛର ବଡ଼ କାରଣ ହେଉଛି ଯେ ବିଜେପି ମିହିଳାଙ୍କ ପାଇଁ ବଡ଼ ଘୋଷଣା କରିଥିଲା। ଏହାକୁ ନଜରରେ ରଖି ରେଖାଙ୍କୁ ମୁଖ୍ୟମନ୍ତ୍ରୀ ଚେହେରା କରିଛି ବିଜେପି।
ତୃତୀୟ କାରଣ: ମହିଳା ମୁଖ୍ୟମନ୍ତ୍ରୀ
୨୭ ବର୍ଷ ପରେ ଦିଲ୍ଲୀରେ ସରକାର ଗଠନ କରିବାରେ ସଫଳ ହୋଇଛି ବିଜେପି। ୨୭ ବର୍ଷ ପୂର୍ବେ ବିଜେପିର ମୁଖ୍ୟମନ୍ତ୍ରୀ ଥିଲେ ସୁଷମା ସ୍ବରାଜ। ଏବେ ୨୭ ବର୍ଷ ପରେ ପୁଣିଥରେ ଜଣେ ମହିଳାଙ୍କୁ ମୁଖ୍ୟମନ୍ତ୍ରୀ କରି ମହିଳା କାର୍ଡ ଖେଳିଛି ବିଜେପି।