ଓଏଲ୍ ବ୍ୟୁରୋ: ବିଧାନସଭା ବଜେଟ ଅଧିବେଶନର ଆଜି ସପ୍ତମ କାର୍ଯ୍ୟ ଦିବସ। ପ୍ରଶ୍ନକାଳ ଆରମ୍ଭ ହୋଇଥିବା ବିଭିନ୍ନ ବିଭାଗର ଆଲୋଚନା ଚାଲିଛି। ବିଧାୟକଙ୍କ ପ୍ରଶ୍ନ ଉତ୍ତର ରଖୁଛନ୍ତି ବିଭାଗୀୟ ମନ୍ତ୍ରୀ। ସୁରୁଖୁରୁରେ ଗୃହ କାର୍ଯ୍ୟ ଆରମ୍ଭ ହୋଇଛି। ଏସବୁ ଭିତରେ ସାନ୍ତାଳୀ ଭାଷାକୁ ନେଇ ବିଧାନସଭାରେ ଦାବି କରିଛନ୍ତି ବିଜେପି ବିଧାୟକ ଭାଦବ ହାଁସଦା। ବିଧାୟକ କହିଛନ୍ତି, ୨୦୨୫ ମସିହାରେ ସାନ୍ତାଳୀ ଭାଷା ଶହେ ବର୍ଷ ପୂରଣ କରିବାକୁ ଯାଉଛି। ତେଣୁ ରାଜ୍ୟସ୍ତରରେ ଏହାର ଶତବାର୍ଷିକୀ ପାଳନ କରାଯାଉ।
ଆଜି ଶୂନ୍ୟକାଳରେ ଉପରୋକ୍ତ ପ୍ରସଙ୍ଗ ଉଠାଇ ବିଜେପି ବିଧାୟକ କହିଛନ୍ତି ଯେ, ପଣ୍ଡିତ ରଘୁନାଥ ମୁର୍ମୁ ୧୯୨୫ ମସିହାରେ ସାନ୍ତାଳୀ ଭାଷାର ଉଦ୍ଭାବନ କରିଥିଲେ। ୨୦୦୩ ମସିହାରେ ପୂର୍ବ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ସାନ୍ତାଳୀ ଭାଷାକୁ ସମ୍ବିଧାନର ଅଷ୍ଟମ ଅନୁଛେଦରେ ସାମିଲ କରିଥିଲେ। ୨୦୨୫ ମସିହାରେ ସାନ୍ତାଳୀ ଭାଷା ୧୦୦ ବର୍ଷ ପୂରଣ କରିବାକୁ ଯାଉଛି। ତେଣୁ ଏହାର ରାଜ୍ୟସ୍ତରୀୟ ଶତ ବାର୍ଷିକୀ ପାଳନ କରାଯାଉ। ସେହିପରି ପ୍ରାଥମିକ ସ୍ତରରୁ ବିଶ୍ଵ ବିଦ୍ୟାଳୟ ଯାଏଁ ସାନ୍ତାଳୀ ଭାଷାରେ ପାଠପଢା ଆରମ୍ଭ ପାଇଁ ବିଧାୟକ ଦାବି କରିଛନ୍ତି।