ଓଏଲ୍ ବ୍ୟୁରୋ: ଆୟକର ଦାଖଲ କରିଥିଲେ ମଧ୍ୟ ବିନା କ୍ଷେତ୍ର ସ୍ତରୀୟ ତଦନ୍ତରେ କୌଣସି ହିତାଧିକାରୀଙ୍କ ରାସନ କାର୍ଡ କଟିବ ନାହିଁ। ରାଜ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଆଜି ଏନେଇ ବଡ଼ ସୂଚନା ଦେଇଛନ୍ତି। ମନ୍ତ୍ରୀଙ୍କ ଅନୁଯାୟୀ, ଯେଉଁମାନେ ଆୟକର ଫାଇଲ କରୁଛନ୍ତି ସେମାନଙ୍କ କାର୍ଡ କଟି ଯାଉଥିବା ନେଇ ବିଭାଗ ପାଖରେ ଅଭିଯୋଗ ହସ୍ତଗତ ହୋଇଛି। ଏନେଇ ହିତାଧିକାରୀଙ୍କୁ ଆଦୌ ବ୍ୟସ୍ତ ହେବାର ନାହିଁ। ବିନା ଫିଜିକାଲ ଭେରିଫିକେଶନରେ କାହାର କାର୍ଡ ନକାଟିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି।
ଅଧିକାରୀମାନଙ୍କ ପାଖକୁ ଆୟକର ଦାତାଙ୍କ ଲିଷ୍ଟ ପ୍ରଦାନ କରାଯାଇଛି। ସେମାନେ ଡୋର ଟୁ ଡୋର ବୁଲି ଅନୁଧ୍ୟାନ କରିବେ। କାହାର ଆୟ କେତେ ଅନୁଧ୍ୟାନ ପରେ ଚୁଡାନ୍ତ ନିଷ୍ପତି ନିଆଯିବ। ପ୍ରକୃତରେ ଯିଏ ଗରିବ ଥିବ କାର୍ଡ ରହିବ ବୋଲି ମନ୍ତ୍ରୀ ସ୍ପଷ୍ଟ କରିଛନ୍ତି। ସେହିପରି ରାଜ୍ୟରେ ନୂଆ ରାସନକାର୍ଡ ଦେବାକୁ ପ୍ରକ୍ରିୟା ଜାରି ରହିଛି। ଖୁବଶୀଘ୍ର ନୂଆ କାର୍ଡ ପ୍ରଦାନ କରାଯିବ ବୋଲି ମନ୍ତ୍ରୀ ଶ୍ରୀ ପାତ୍ର କହିଛନ୍ତି।