ସଂସଦରେ ଉପସ୍ଥାପିତ ହେଲା ୱାକଫ୍ ସଂଶୋଧନ ବିଲ୍, କଂଗ୍ରେସର ଆପତ୍ତି

ଓଏଲ୍ ବ୍ୟୁରୋ: ଆଜି ସଂସଦରେ ଉପସ୍ଥାପନ ହୋଇଛି ୱାକଫ୍ ସଂଶୋଧନ ବିଲ୍। ଆଇନ ମନ୍ତ୍ରୀ ୱାକଫ୍ ସଂଶୋଧନ ବିଲ୍ ଉପସ୍ଥାପନ କରିଛନ୍ତି। ୱାକଫ୍ ସଂଶୋଧନ ବିଲ୍ ଉପସ୍ଥାପନା ଆରମ୍ଭରୁ କଂଗ୍ରେସ ସଦସ୍ୟ ଗୃହରେ ଆପତ୍ତି କରିଛନ୍ତି। ତେବେ ୱାକଫ୍ ସଂଶୋଧନ ବିଲ୍ ଉପସ୍ଥାପନ ବେଳେ ଆଇନ ମନ୍ତ୍ରୀ କହିଛନ୍ତି, କିଛି ବ୍ୟକ୍ତି ଏଇ ଆଇନ ନେଇ ମୁସଲମାନ ସମ୍ପ୍ରଦାୟଙ୍କ ପ୍ରତି ଭ୍ରମ ସୃଷ୍ଟି କରିଛନ୍ତି।
୮ ଘଣ୍ଟା ଧରି ୱାକଫ୍ ସଂଶୋଧନ ବିଲ୍ ଉପରେ ଆଲୋଚନା ହେବ। ତେବେ ଏହି ଆଲୋଚନା ଜାରି ହୋଇଥିବାବେଳେ ବିଭିନ୍ନ ବିରୋଧୀ ଦଳ ନିଜ ମନ୍ତବ୍ୟ ପାଇଁ ପ୍ରସ୍ତୁତ ହୋଇଛନ୍ତି।
ଗତକାଲି ବସିଥିବା ବିରୋଧୀ ଦଳ ବୈଠକରେ ଏହି ପ୍ରସଙ୍ଗରେ ଆଲୋଚନା ହୋଇଥିଲା। ବିରୋଧୀ ଦଳ ଗୃହ ବର୍ଜନ ନକରି ଏହି ବିଲକୁ ବିରୋଧ କରିବେ। ଇଣ୍ଡି ମେଣ୍ଟ ଓ ଅନ୍ୟାନ୍ୟ ବିରୋଧୀ ଦଳ ଏହି ବିଲକୁ ବିରୋଧ କରୁଛନ୍ତି। ଦେଶରେ ୱାକଫ ସମ୍ପତ୍ତିର ପରିଚାଳନା ଓ ପ୍ରଶାସନିକ ବ୍ୟବସ୍ଥାରେ ଉନ୍ନତି ଆଣିବା ଉଦ୍ଦେଶ୍ୟରେ ଏହି ବିଲ୍ ଆସିଛି ବୋଲି କୁହାଯାଇଛି।
ଲୋକସଭାରେ ଉପସ୍ଥିତ ରହିବା ଲାଗି ବିଜେପି, କଂଗ୍ରେସ, ଆରଜେଡି, ଟିଏମସି, ଟିଡିପି,ଜେଡିୟୁ, ଶିବସେନା, ଏଲଜେପି(ରାମବିଳାସ) ଆଦି ଦଳ ନିଜ ନିଜର ସାଂସଦମାନଙ୍କୁ ହୁଇପ ଜାରି କରିଥିଲେ। ୫୪୩ ଆସନରୁ ଲୋକସଭାରେ ଏନଡିଏର ୨୯୩ ସାଂସଦ ଅଛନ୍ତି।
କେବଳ ବିଜେପିର ରହିଛନ୍ତି ୨୪୦ ସାଂସଦ। ବିରୋଧୀଙ୍କ ସଦସ୍ୟ ସଂଖ୍ୟା ରହିଛି ୨୪୯। ଏଥିରୁ କଂଗ୍ରେସର ସଦସ୍ୟ ସଂଖ୍ୟା ରହିଛି ୯୯। ସମ୍ବିଧାନର ଧାରା ୧୪, ୨୫, ୨୬ ଓ ୨୯କୁ ଏହି ବିଲ୍ ବିରୋଧ କରୁଛି ବୋଲି ଏଆଇଏମଆଇଏମ କହିଛି।