ଓଏଲ୍ ବ୍ୟୁରୋ: ମାଆ ବୁଢ଼ୀ ଠାକୁରାଣୀ ମନ୍ଦିରରେ ଭକ୍ତଙ୍କ ଭିଡ଼। ଆଜି ମଧ୍ୟରାତ୍ରରେ ଆରମ୍ଭ ହେବ ମା’ ବୁଢ଼ୀ ଠାକୁରାଣୀଙ୍କ ଦ୍ବିବାର୍ଷିକ ଯାତ୍ରା। ଆଉ କିଛି ସମୟ ପରେ ପାରମ୍ପାରିକ ଧେଣ୍ଡୁରା ବାଦ୍ୟ ମାଧ୍ୟମରେ ସହରବାସୀଙ୍କୁ ଯାତ୍ରା ସମ୍ପର୍କରେ ଅବଗତ କରାଯିବ। ସେପଟେ ମା’ଙ୍କ ଅସ୍ଥାୟୀ ପୀଠକୁ ମଧ୍ୟ ସଜ୍ଜିତ କରାଯାଉଛି। ବିଭିନ୍ନ ପ୍ରକାରର ଫୁଲରେ ମା’ଙ୍କ ଅସ୍ଥାୟୀ ପୀଠକୁ ସଜାଇବାରେ ଲାଗିଛନ୍ତି ଫୁଲ ବ୍ୟବସାୟୀ। ଆଜି ସନ୍ଧ୍ୟା ୫ଟାରେ ମା’ଙ୍କ ଯାତ୍ରା ନେଇ ଚାଙ୍ଗୁଡି ପୂଜା ହେବ। ରାତ୍ର ୧୧ଟା ସମୟରେ ଦେଶୀ ବେହେରା ସାହିରୁ ଏକ ବିରାଟ ପଟୁଆରରେ ମା’ଙ୍କ ମନ୍ଦିରରେ ପହଞ୍ଚିବେ ମା’ଙ୍କ ବାପାଙ୍କ ସମେତ ସହରବାସୀ।
ସେଠାରେ ମା’ଙ୍କୁ ପୂଜାର୍ଚ୍ଚନା କରାଯିବା ସହ ମା’ଙ୍କ ଆଜ୍ଞାମାଳ ଧରି ପୁଣି ବିରାଟ ପଟୁଆରରେ ଦେଶୀ ବେହେରା ସାହିକୁ ଆସି ଆଜ୍ଞାମାଳକୁ ସ୍ଥାପନ କରାଯିବ। ପରେ ଆରମ୍ଭ ହେବ ମା’ଙ୍କ ଯାତ୍ରା। ଆଜି ମା’ଙ୍କ ଆଗମନକୁ ନେଇ ସହରବାସୀଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ଅପ୍ରେଲ ୩ରୁ ୨୮ ପର୍ଯ୍ୟନ୍ତ ଏହି ଯାତ୍ରା ଅନୁଷ୍ଠିତ ହେବ ।