ଓଏଲ୍ ବ୍ୟୁରୋ: ଓଡ଼ିଶାର ମହାଲେଖାକାର ଅତୁଲ ପ୍ରକାଶ ବୁଧବାର ଦିନ ସିଏଜି ରିପୋର୍ଟ ଉପସ୍ଥାପନ କରିଛନ୍ତି। ବିଭିନ୍ନ କ୍ଷେତ୍ରକୁ ନେଇ ସେ ବିସ୍ତୃତ ତଥ୍ୟ ରଖିଛନ୍ତି। ବାଟମାରଣା ହୋଇଛି ୮୬୫ କୋଟି ଟଙ୍କା ଖଣିଜ ରାଜସ୍ୱ। ରାଜ୍ୟରେ ଲଘୁ ଖଣିଜ ଚୋରି ରୋକିବା ଓ ଉଚ୍ଛେଦ କାର୍ଯ୍ୟକଳାପ ପ୍ରଭାବହୀନ। ଲଘୁ ଖଣିଜ ପଦାର୍ଥ ଖନନରୁ ପ୍ରାପ୍ତ ରାଜସ୍ବ ଅଣ ଟିକସ ରାଜସ୍ବର ମୁଖ୍ୟ ଉତ୍ସ ବୋଲି ଅତୁଲ ପ୍ରକାଶ କହିଛନ୍ତି। ୨୦୧୫-୨୨ ମଧ୍ୟରେ ଲଘୁ ଖଣିଜ ରାଜସ୍ବ ୨୯୬୮.୭୫ କୋଟି ଟଙ୍କାରେ ପହଞ୍ଚିଛି।
୨୦୨୨ ମାର୍ଚ୍ଚ ୩୧ ସୁଦ୍ଧା ୫୨୦ ଲଘୁ ଖଣିଜ ଉତ୍ସ ମଧ୍ୟରୁ ୧୪୭ କାର୍ଯ୍ୟକ୍ଷମ ହୋଇପାରିଛି। କିନ୍ତୁ ୩୭୩ ଲଘୁ ଖଣିଜ ଉତ୍ସ କାର୍ଯ୍ୟକ୍ଷମ ହୋଇ ପାରି ନାହିଁ। ଖଣିଜ କ୍ରୟ ଟ୍ରାଞ୍ଜିଟ୍ ପାସ୍ ନ ଦେବାରୁ ୮୬୪.୪୬ କୋଟି ଟଙ୍କା ରାଜସ୍ବ ବାଟମାରଣା ହୋଇଛି। ଖଣି ଲିଜ୍ଧାରୀଙ୍କ ଠାରୁ ୩୯୬୬ କୋଟି ଟଙ୍କା ଆଦାୟ ହୋଇପାରି ନାହିଁ। ସରକାର ଆଦାୟ କରିନଥିବା ସିଏଜି ରିପୋର୍ଟରେ ଏହା ଉଲ୍ଲେଖ କରାଯାଇଛି।
ଲଘୁ ଖଣିଜ ଚୋରି ପଛରେ ବଡ଼ ଲୋକଥିବା ବିଜେଡିର ବରିଷ୍ଠ ନେତା ରଣେନ୍ଦ୍ର ପ୍ରତାପ ସ୍ୱାଇଁ କହିଛନ୍ତି। ୨୦୧୫ରୁ ୨୨ ମଧ୍ୟରେ ଲଘୁ ଖଣିଜ ହେରଫେର ନେଇ CAG ତଥ୍ୟ ପ୍ରସଙ୍ଗରେ ସତ୍ୟତା ରହିଛି ବୋଲି ବରିଷ୍ଠ ନେତା ରାଜା ସ୍ବାଇଁ କହିଛନ୍ତି। ସେ କହିଛନ୍ତି, ଆଗରୁ ଚୋରି ହେଉଥିଲା, ଏବେ ବି ଚୋରି ହେଉଛି। ଆଦିବାସୀ ଅଞ୍ଚଳରୁ ଗୋଡ଼ି ବାଲି ଭଳି ଲଘୁ ଖଣିଜ ଚୋରି ହେଉଛି। ଲଘୁ ଖଣିଜ ଚୋରି ହେବା ପଛରେ ବହୁ ବଡ଼ ଲୋକ ରହିଛନ୍ତି।