ଓଏଲ୍ ବ୍ୟୁରୋ: ଆଜିଠୁ ଆରମ୍ଭ ହୋଇଛି ସଂସଦର ବଜେଟ ଅଧିବେଶନ। ସଂସଦ ବଜେଟ ଅଧିବେଶନର ପ୍ରଥମ ଦିନରେ ମିଳିତ ଅଧିବେଶନକୁ ସମ୍ବୋଧିତ କରିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ। ସଂସଦର ମିଳିତ ଅଧିବେଶନ ଆରମ୍ଭରେ ଦିବଂଗତ ନେତାଙ୍କ ଉଦେଶ୍ୟରେ ଶୋକ ପ୍ରକାଶ କରିଛନ୍ତି। ଏହା ସହ ପ୍ରୟାଗରାଜରେ ଘଟିଥିବା କୁମ୍ଭମେଳା ଅଘଟଣକୁ ନେଇ ଦୁଃଖ ପ୍ରକାଶ କରିଛନ୍ତି ରାଷ୍ଟ୍ରପତି।
ରାଷ୍ଟ୍ରପତି ଦ୍ରୌପଦୀ ମୁର୍ମୁ ସମ୍ବୋଧନ କରି କହିଛନ୍ତି, ମାତ୍ର ଦୁଇ ମାସ ତଳେ ଆମେ ସମ୍ବିଧାନ ଗ୍ରହଣ କରିବାର ୭୫ତମ ବାର୍ଷିକୀ ପାଳନ କରିଥିଲୁ ଏବଂ କିଛି ଦିନ ତଳେ ଭାରତୀୟ ଗଣତନ୍ତ୍ର ମଧ୍ୟ ଏହାର ୭୫ ବର୍ଷର ଯାତ୍ରାକୁ ପୂରଣ କରିଥିଲା। ଏହି ଅବସର ଗଣତନ୍ତ୍ରର ଜନ୍ମଭୂମି ଭାବେ ଭାରତର ଗୌରବକୁ ନୂତନ ଶିଖରରେ ପହଞ୍ଚାଇବ।
ମୋ ସରକାର ଆଜି ଅଭୂତପୂର୍ବ ସଫଳତା ମାଧ୍ୟମରେ ଭାରତର ବିକାଶ ଯାତ୍ରାର ଏହି ଅମୃତ କାଳକୁ ନୂତନ ଶକ୍ତି ପ୍ରଦାନ କରିଛନ୍ତି। ତୃତୀୟ ପାଳିରେ କାମ ତିନି ଗୁଣ ଦ୍ରୁତ ଗତିରେ ଆଗେଇ ଚାଲିଛି। ଆଜି ଦେଶରେ ବଡ଼ ବଡ଼ ନିଷ୍ପତ୍ତି ଓ ନୀତିକୁ ଅସାଧାରଣ ଗତିରେ କାର୍ଯ୍ୟକାରୀ କରାଯାଉଛି।
ପ୍ରଧାନମନ୍ତ୍ରୀ ଆବାସ ଯୋଜନାକୁ ସମ୍ପ୍ରସାରଣ କରିବା ସହ ଅତିରିକ୍ତ ୩ କୋଟି ପରିବାରକୁ ନୂଆ ଘର ଯୋଗାଇ ଦେବାକୁ ନିଷ୍ପତ୍ତି ନିଆଯାଇଛି। ଏଥିପାଇଁ ୫ ଲକ୍ଷ ୩୬ ହଜାର କୋଟି ଟଙ୍କା ବ୍ୟୟ ଅଟକଳ କରାଯାଇଛି। ଆଦିବାସୀ ସମ୍ପ୍ରଦାୟର ପାଞ୍ଚ କୋଟି ଲୋକଙ୍କ ପାଇଁ ‘ଧରତୀ ଆବା ଜନଜାତିୟ ଗ୍ରାମ ଉତ୍କର୍ଷ’ ଅଭିଯାନ ଆରମ୍ଭ ହୋଇଛି। ଏଥିପାଇଁ ଅଶି ହଜାର କୋଟି ଟଙ୍କାର ବ୍ୟୟବରାଦ କରାଯାଇଛି। ଆୟୁଷ୍ମାନ ଭାରତ ଯୋଜନା ଅଧୀନରେ ୭୦ ବର୍ଷରୁ ଅଧିକ ବୟସର ୬ କୋଟି ବରିଷ୍ଠ ନାଗରିକଙ୍କୁ ସ୍ୱାସ୍ଥ୍ୟ ବୀମା ପ୍ରଦାନ କରିବାକୁ ନିଷ୍ପତ୍ତି ନିଆଯାଇଛି।
ସେମାନଙ୍କୁ ପ୍ରତିବର୍ଷ ୫ ଲକ୍ଷ ଟଙ୍କାର ସ୍ୱାସ୍ଥ୍ୟ ବୀମା ମିଳିବ। ମୋ ସରକାର ଯୁବବର୍ଗଙ୍କ ଶିକ୍ଷା ଏବଂ ସେମାନଙ୍କ ପାଇଁ ନୂତନ ନିଯୁକ୍ତି ସୁଯୋଗ ସୃଷ୍ଟି ଉପରେ ବିଶେଷ ଧ୍ୟାନ ଦେଇଛନ୍ତି। ମେଧାବୀ ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷା ପାଇଁ ଆର୍ଥିକ ସହାୟତା ଦେବା ପାଇଁ ପିଏମ୍ ବିଦ୍ୟାଲକ୍ଷ୍ମୀ ଯୋଜନା ଆରମ୍ଭ କରାଯାଇଛି। ଶ୍ରେଷ୍ଠ ୫୦୦ କମ୍ପାନୀ ମଧ୍ୟରେ ୧ କୋଟି ଯୁବକଯୁବତୀଙ୍କୁ ଇଣ୍ଟର୍ନସିପ୍ ସୁଯୋଗ ଦିଆଯିବ।
ମୋ ସରକାର ମହିଳାଙ୍କ ନେତୃତ୍ବାଧୀନ ବିକାଶ ମାଧ୍ୟମରେ ଦେଶକୁ ସଶକ୍ତ କରିବାରେ ବିଶ୍ୱାସ କରେ। ନାରୀ ଶକ୍ତି ବନ୍ଦନ ଆଇନ ମାଧ୍ୟମରେ ଲୋକସଭା ଓ ବିଧାନସଭାରେ ମହିଳାଙ୍କ ପାଇଁ ସଂରକ୍ଷଣ ଏହି ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଜାତୀୟ ଗ୍ରାମୀଣ ଜୀବିକା ମିଶନ ଅଧୀନରେ ୧୧.୯ ନିୟୁତରୁ ଅଧିକ ସ୍ୱୟଂ ସହାୟକ ଗୋଷ୍ଠୀକୁ ସଶକ୍ତ କରାଯାଉଛି। ଦେଶରେ ୧୦୦ ନିୟୁତରୁ ଅଧିକ ମହିଳାଙ୍କୁ ଏଥିରେ ଯୋଡ଼ାଯାଇଛି। ବ୍ୟାଙ୍କ ଲିଙ୍କେଜ୍ ଜରିଆରେ ମୋଟ ୯ ଲକ୍ଷ କୋଟିରୁ ଅଧିକ ଟଙ୍କା ବଣ୍ଟନ କରାଯାଇଛି।
ଦୁର୍ଗମ ଅଂଚଳର ଲୋକଙ୍କୁ ଆର୍ଥିକ ବ୍ୟବସ୍ଥା ସହ ଯୋଡ଼ିବାରେ ଆମର ବ୍ୟାଙ୍କିଙ୍ଗ ଏବଂ ଡିଜିଟାଲ୍ ପେମେଣ୍ଟ ଭଉଣୀମାନେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି। କୃଷି ସଖିମାନେ ପ୍ରାକୃତିକ ଚାଷକୁ ପ୍ରୋତ୍ସାହିତ କରୁଛନ୍ତି ଏବଂ ପଶୁ ସଖିଙ୍କ ମାଧ୍ୟମରେ ଆମର ପଶୁସମ୍ପଦକୁ ସୁଦୃଢ଼ କରାଯାଉଛି। ଡ୍ରୋନ୍ ଦିଦି ଯୋଜନା ମହିଳାଙ୍କ ପାଇଁ ଅର୍ଥନୈତିକ ଓ ବୈଷୟିକ ସଶକ୍ତୀକରଣର ମାଧ୍ୟମ ପାଲଟିଛି। ଆଜି ଷ୍ଟାର୍ଟଅପ୍ ଠାରୁ ଆରମ୍ଭ କରି କ୍ରୀଡ଼ା ଠାରୁ ଆରମ୍ଭ କରି ମହାକାଶ ପର୍ଯ୍ୟନ୍ତ ସବୁ କ୍ଷେତ୍ରରେ ଦେଶକୁ ଗର୍ବିତ କରୁଛନ୍ତି ଆମର ଯୁବପିଢ଼ି।
ମାଇଁ ଭାରତ ପୋର୍ଟାଲ ଜରିଆରେ ଲକ୍ଷ ଲକ୍ଷ ଯୁବକ ଯୁବତୀ ରାଷ୍ଟ୍ର ନିର୍ମାଣ କାର୍ଯ୍ୟରେ ଯୋଡ଼ି ହେଉଛନ୍ତି। ମୋ ସରକାର ଜାତୀୟ ଶିକ୍ଷା ନୀତି ମାଧ୍ୟମରେ ଛାତ୍ରଛାତ୍ରୀଙ୍କ ପାଇଁ ଏକ ଆଧୁନିକ ଶିକ୍ଷା ବ୍ୟବସ୍ଥା ପ୍ରସ୍ତୁତ କରୁଛନ୍ତି। ଯେପରି କେହି ଶିକ୍ଷାରୁ ବଞ୍ଚିତ ନ ହୁଅନ୍ତି ସେଥିପାଇଁ ମାତୃଭାଷାରେ ଶିକ୍ଷାର ସୁଯୋଗ ଯୋଗାଇ ଦିଆଯାଉଛି। ୧୩ଟି ଭାରତୀୟ ଭାଷାରେ ବିଭିନ୍ନ ନିଯୁକ୍ତି ପରୀକ୍ଷା ଅନୁଷ୍ଠିତ ହେଉଛି, ଯାହା ଦ୍ୱାରା ଭାଷା ସମ୍ବନ୍ଧୀୟ ପ୍ରତିବନ୍ଧକକୁ ଦୂର କରାଯାଇପାରିଛି।
ଅଲିମ୍ପିକ୍ସ ହେଉ କି ପାରାଲିମ୍ପିକ୍ସ ସବୁଠି ଭାରତୀୟ ଦଳ ଚମତ୍କାର ପ୍ରଦର୍ଶନ କରିଛନ୍ତି। ନିକଟରେ ବିଶ୍ୱ ଚେସ୍ ଚାମ୍ପିୟନଶିପ୍ ରେ ମଧ୍ୟ ଭାରତ ବିଜୟ ଲାଭ କରିଛି। ଫିଟ୍ ଇଣ୍ଡିଆ ଅଭିଯାନ ମାଧ୍ୟମରେ ଆମେ ଏକ ଶକ୍ତିଶାଳୀ ଯୁବଶକ୍ତି ଗଠନ କରୁଛୁ। ଆର୍ଟିଫିସିଆଲ ଇଣ୍ଟେଲିଜେନ୍ସ କ୍ଷେତ୍ରରେ ଭାରତକୁ ଆଗକୁ ନେବାକୁ “ଇଣ୍ଡିଆ ଏଆଇ ମିଶନ” ଆରମ୍ଭ କରାଯାଇଛି। ନ୍ୟାସନାଲ କ୍ୱାଣ୍ଟମ ମିଶନ ଜରିଆରେ ଭାରତ ଏହି ଜ୍ଞାନକୌଶଳରେ ଅଗ୍ରଣୀ ଦେଶ ମାନଙ୍କ ମଧ୍ୟରେ ନିଜକୁ ସ୍ଥାନିତ କରିବାରେ ସକ୍ଷମ ହେବ।
କୋଭିଡ୍ ଏବଂ ମହାମାରୀ ପରବର୍ତ୍ତୀ ପରିସ୍ଥିତି ଏବଂ ଯୁଦ୍ଧ ଭଳି ବିଶ୍ୱବ୍ୟାପୀ ସଙ୍କଟ ସତ୍ତ୍ୱେ, ଭାରତୀୟ ଅର୍ଥନୀତିର ସ୍ଥିରତା ଏହାର ସୁଦୃଢ଼ତାର ପ୍ରମାଣ। ମୋ ସରକାର ବ୍ୟବସାୟ କରିବାର ସହଜତାକୁ ପ୍ରୋତ୍ସାହିତ କରିବା ପାଇଁ ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି । ଦଶନ୍ଧି ଧରି ଆମ ଦେଶରେ ରାସ୍ତା କଡରେ ଦୋକାନ ଖୋଲି ଜୀବିକା ନିର୍ବାହ କରୁଥିବା ଭାଇ ଭଉଣୀମାନେ ବ୍ୟାଙ୍କିଙ୍ଗ୍ ବ୍ୟବସ୍ଥା ବାହାରେ ରହିଥିଲେ। ଆଜି ସେମାନେ ପିଏମ୍ ସ୍ୱନିଧି ଯୋଜନାରେ ଉପକୃତ ହେଉଛନ୍ତି। ଡିଜିଟାଲ କାରବାର ରେକର୍ଡ ଆଧାରରେ, ସେମାନଙ୍କ ବ୍ୟବସାୟ ବୃଦ୍ଧି ପାଇଁ ଅତିରିକ୍ତ ଋଣ ଦିଆଯାଉଛି।
ଆଜି ଡିଜିଟାଲ ପ୍ରଯୁକ୍ତି ବିଦ୍ୟା କ୍ଷେତ୍ରରେ ଭାରତ ଏକ ପ୍ରମୁଖ ବୈଶ୍ୱିକ ପ୍ରତିଯୋଗୀ ଭାବେ ନିଜର ଉପସ୍ଥିତି ପ୍ରତିଷ୍ଠା କରୁଛି। ବିଶ୍ୱର ଅନ୍ୟ ପ୍ରମୁଖ ଦେଶ ମାନଙ୍କ ସହ ଭାରତରେ ୫ଜି ସେବାର ଶୁଭାରମ୍ଭ ଏହାର ଏକ ଗୁରୁତ୍ୱପୂର୍ଣ୍ଣ ଉଦାହରଣ । ମୋ ସରକାର ଡିଜିଟାଲ ଟେକ୍ନୋଲୋଜିକୁ ସାମାଜିକ ନ୍ୟାୟ ଏବଂ ସମାନତା ପାଇଁ ଏକ ଉପକରଣ ଭାବରେ ବ୍ୟବହାର କରିଛନ୍ତି । ଡିଜିଟାଲ ଦେୟ କେବଳ ନିର୍ଦ୍ଦିଷ୍ଟ ବ୍ୟକ୍ତି କିମ୍ବା ଗୋଷ୍ଠୀ ମଧ୍ୟରେ ସୀମିତ ନୁହେଁ।
ଏପରିକି ଭାରତର କ୍ଷୁଦ୍ରତମ ଦୋକାନୀ ମଧ୍ୟ ଏହି ସୁବିଧାରୁ ଉପକୃତ ହେଉଛନ୍ତି। ଆମ ଦ୍ରୁତ ଡିଜିଟାଲ ହେଉଥିବା ସମାଜରେ ଆଜି ଜାତୀୟ ନିରାପତ୍ତା ସହ ଜଡ଼ିତ ଆଉ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହେଉଛି ସାଇବର ନିରାପତ୍ତା। ଡିଜିଟାଲ ଠକେଇ, ସାଇବର କ୍ରାଇମ ଏବଂ ଡିପ୍ ଫେକ୍ ଭଳି ଟେକ୍ନୋଲୋଜି ମଧ୍ୟ ସାମାଜିକ, ଅର୍ଥନୈତିକ ଏବଂ ଜାତୀୟ ନିରାପତ୍ତା ପାଇଁ ଚ୍ୟାଲେଞ୍ଜ ସୃଷ୍ଟି କରିଛି। ଏହି ସାଇବର ଅପରାଧକୁ ନିୟନ୍ତ୍ରଣ କରିବା ପାଇଁ ଅନେକ ପଦକ୍ଷେପ ନିଆଯାଇଛି। ସାଇବର ନିରାପତ୍ତା କ୍ଷେତ୍ରରେ ଯୁବବର୍ଗଙ୍କ ପାଇଁ ନିଯୁକ୍ତି ସୁଯୋଗ ମଧ୍ୟ ରହିଛି।
ଉଧମପୁର-ଶ୍ରୀନଗର-ବାରାମୁଲା ରେଳ ସଂଯୋଗ ପ୍ରକଳ୍ପ ସମ୍ପୂର୍ଣ୍ଣ ହୋଇଛି ଏବଂ ବର୍ତ୍ତମାନ ଦେଶକୁ କାଶ୍ମୀରରୁ କନ୍ୟାକୁମାରୀ ପର୍ଯ୍ୟନ୍ତ ରେଳ ଲାଇନ ଦ୍ୱାରା ସଂଯୋଗ କରାଯିବ। ଏହି ମହତ୍ତ୍ୱାକାଂକ୍ଷୀ ପ୍ରକଳ୍ପ ଅଧୀନରେ ଚେନାବ ସେତୁ ନିର୍ମାଣ କରାଯାଇଛି, ଯାହା ବିଶ୍ୱର ସର୍ବୋଚ୍ଚ ରେଳ ସେତୁ ଅଟେ। ଏହାବ୍ୟତୀତ ଅଞ୍ଜି ସେତୁ ନିର୍ମାଣ କରାଯାଇଛି, ଯାହା କି ଦେଶର ପ୍ରଥମ ରେଳ କେବୁଲ ବ୍ରିଜ୍।
ଭାରତର ମେଟ୍ରୋ ନେଟୱାର୍କ ଏବେ ଏକ ହଜାର କିଲୋମିଟରର ମାଇଲଖୁଣ୍ଟ ଅତିକ୍ରମ କରିଛି। ମେଟ୍ରୋ ନେଟୱାର୍କ ଦୃଷ୍ଟିରୁ ଭାରତ ଏବେ ବିଶ୍ୱର ତୃତୀୟ ବୃହତ୍ତମ ଦେଶ ପାଲଟିଛି। ଗର୍ଭବତୀ ମହିଳା ଓ ଶିଶୁମାନଙ୍କ ଟୀକାକରଣ କାର୍ୟକ୍ରମର ସଠିକ୍ ଟ୍ରାକିଂ ରଖିବା ପାଇଁ U-WIN ପୋର୍ଟାଲ ଲଞ୍ଚ କରାଯାଇଛି। ଏହି ପୋର୍ଟାଲରେ ଏବେ ପର୍ଯ୍ୟନ୍ତ ପ୍ରାୟ ୩୦ କୋଟି ଟୀକା ଦିଆଯାଇଥିବା ତାଲିକାଭୁକ୍ତ ହୋଇଛି। ଟେଲି ମେଡିସିନ୍ ମାଧ୍ୟମରେ ୩୦ କୋଟିରୁ ଅଧିକ ଇ-ଟେଲି-ପରାମର୍ଶ ଦ୍ୱାରା ନାଗରିକମାନେ ସ୍ୱାସ୍ଥ୍ୟ ଲାଭ ପାଇଛନ୍ତି। ଭାରତରେ ଆଧୁନିକ ଏବଂ ଆତ୍ମନିର୍ଭର କୃଷି ବ୍ୟବସ୍ଥା ଆମର ଲକ୍ଷ୍ୟ।
ମୋର ସରକାର କୃଷକମାନଙ୍କୁ ଫସଲର ଉଚିତ ଦାମ ଦେବା ଏବଂ ତାଙ୍କର ଆୟ ବୃଦ୍ଧି ପାଇଁ ସମର୍ପିତ ଭାବରେ କାମ କରୁଛି। ସହକାରୀ କ୍ଷେତ୍ରର ଆର୍ଥିକ ସଶକ୍ତିକରଣ ପାଇଁ ଗ୍ରହଣ କରାଯାଇଥିବା ବିଭିନ୍ନ ପଦକ୍ଷେପର ଫଳସ୍ୱରୂପ ରୋଜଗାରର ଅନେକ ଅବସର ସୃଷ୍ଟି ହେଉଛି। ୨୦୧୫ ବର୍ଷକୁ ଆନ୍ତର୍ଜାତୀୟ ସହକାରିତା ବର୍ଷ ଭାବରେ ପାଳନ କରାଯାଉଛି, ଯେଉଁଥିରେ ଭାରତ ତାର ଗୁରୁତ୍ୱପୂର୍ଣ୍ଣ ଯୋଗଦାନ ଦେବ।
ସ୍ୱାଧୀନତାର ଅନେକ ଦଶନ୍ଧି ପରେ ମଧ୍ୟ ଯାହାର ଉପେକ୍ଷା ହୋଇଥିଲା, ସେହି ଆମର ଜନଜାତୀୟ ଏବଂ ଆଦିବାସୀ ସମାଜର କଳ୍ୟାଣକୁ ମୋର ସରକାର ପ୍ରଥମ ପ୍ରାଥମିକତା ଦେଇଛି। ‘ଧରତୀ ଆବା ଜନଜାତୀୟ ଗ୍ରାମ ଉତ୍କର୍ଷ ଅଭିୟାନ’ ଏବଂ ‘ପୀଏମ-ଜନମନ ଯୋଜନା’ ଏହାର ପ୍ରତ୍ୟକ୍ଷ ଉଦାହରଣ। ବିଶେଷ ଜାତୀୟ ମିଶନ ଦ୍ୱାରା ଆଦିବାସୀ ସମୁଦାୟର ସିକଲ ସେଲ ସହିତ ସମ୍ବନ୍ଧିତ ସ୍ୱାସ୍ଥ୍ୟ ସମସ୍ୟା ଉପରେ ମଧ୍ୟ ଧ୍ୟାନ ଦିଆଯାଉଛି। ଏହି ମିଶନର ଅନ୍ତର୍ଗତ ପ୍ରାୟ ପାଞ୍ଚ କୋଟି ବ୍ୟକ୍ତିଙ୍କର ସ୍କ୍ରିନିଂ କରାଯାଇଛି।
ସାରା ଦେଶ ଯେଭଳି ଉତ୍ତର ପୂର୍ବାଂଚଳର ଆଠଟି ରାଜ୍ୟର ସମ୍ଭାବନାକୁ ଅନୁଭବ କରିପାରିବ, ଏହି ଦିଗରେ, ପ୍ରଥମ ଅଷ୍ଟଲକ୍ଷ୍ମୀ ମହୋତ୍ସବର ଆୟୋଜନ କରାଯାଇଛି। ପୂର୍ବୋତ୍ତରର ବିକାଶ ସହିତ ସରକାର ଦେଶର “ପୂର୍ବୋଦୟ” ଅର୍ଥାତ ପୂର୍ବାଂଚଳ ରାଜ୍ୟଗୁଡିକର ସର୍ବାଙ୍ଗୀନ ବିକାଶ କାର୍ଯ୍ୟ କରାଯାଉଛି ଯେଉଁଥିରେ ନୂତନ ରୋଜଗାରର ସୁଯୋଗ ମିଳିବ। ସମାଜର ପଛୁଆ ବର୍ଗ ଏବଂ ସଫେଇ କର୍ମଚାରୀଙ୍କୁ ସହଜରେ ଋଣ ପ୍ରଦାନ କରିବା ପାଇଁ ପିଏମ୍ ସୁରଜ ଯୋଜନାର ବିସ୍ତାର କରାଯାଇଛି।
ସରକାରୀ ଯୋଜନାମାନଙ୍କର ଲାଭ ଦିବ୍ୟାଙ୍ଗ ଜନଙ୍କୁ ପହଁଚାଇବା ପାଇଁ ଏକ କୋଟିରୁ ଅଧିକ ଦିବ୍ୟାଙ୍ଗ ପରିଚୟ ପତ୍ର ଜାରି କରାଯାଇଛି। ଆମର ପାଣ୍ଡୁଲିପିଗୁଡିକ ଆମର ଧରୋହର। ଏହାରେ ବିଶାଳ ଜ୍ଞାନ ସମାହିତ ଅଛି ଯାହାର ମାନବ ଜାତିର ଲାଭ ପାଇଁ ଅଧ୍ୟୟନ, ଗବେଷଣା ଏବଂ ବ୍ୟବହାର କରିବାର ଆବଶ୍ୟକତା ଅଛି। ଉନ୍ନତ ପ୍ରଯୁକ୍ତିର ବ୍ୟବହାର କରି ପାଣ୍ଡୁଲିପିଗୁଡିକର ଡିଜିଟାଇଜେସନ୍ ଏବଂ ସଂରକ୍ଷଣର କାର୍ଯ୍ୟ ମିଶନ୍ ମୋଡରେ ଆରମ୍ଭ କରାଯାଉଛି।
ମହିଳାଙ୍କୁ ସଶକ୍ତ କରିବାର ଆମ ସରକାରର ଲକ୍ଷ୍ୟ। ୩ କୋଟି ଲକ୍ଷପତି ଦିଦି ସୃଷ୍ଟି କରିବା ଆମ ସରକାରର ଲକ୍ଷ୍ୟ। ଏବେ ୧ କୋଟି ୩୦ ଲକ୍ଷ ଲକ୍ଷପତି ଦିଦି ସୃଷ୍ଟି କରାଯାଇଛି। ଡ୍ରୋନ୍ ଦିଦି ଜରିଆରେ ମହିଳାଙ୍କୁ ସଶକ୍ତ କରାଯାଉଛି। ଅଲିମ୍ପିକ୍ସରେ ଦେଶର ଝିଅମାନେ ପଦକ ଜିତୁଛନ୍ତି। ଆଜିର ମହିଳା ଲଢ଼ୁଆ ବିମାନ ଉଡ଼ାଉଛନ୍ତି। AI ଓ ଡିଜିଟାଲ କ୍ଷେତ୍ରରେ ଭାରତ ଏବେ ପଥ ପ୍ରଦର୍ଶକ। କ୍ରୀଡ଼ା ପାଇଁ ବିଶ୍ବସ୍ତରୀୟ ବାତାବରଣ ସୃଷ୍ଟି କରାଯାଉଛି। ୧୦ ବର୍ଷ ତଳେ ଭିତ୍ତିଭୂମି ୨ ଲକ୍ଷ କୋଟି ଥିଲା, ଏବେ ୧୧ ଲକ୍ଷ କୋଟି। ସ୍ପେଶ୍ ଡକିଂରେ ଆମକୁ ସଫଳତା ମିଳିଛି ବୋଲି ରାଷ୍ଟ୍ରପତି କହିଛନ୍ତି।