ଓଏଲ୍ ବ୍ୟୁରୋ: ବଦଳିଛି ୨୪ ବର୍ଷର ସରକାର। ନୂଆ ସରକାର ବଦଳିବା ସହ ନୂଆ ନୂଆ ନୀତି ଆପଣାଇବାରେ ଲାଗିଛନ୍ତି। ନୂଆ ସରକାର ରାଜ୍ୟର ପର୍ଯ୍ୟଟନ କ୍ଷେତ୍ରକୁ ବେଶ ଗୁରୁତ୍ୱ ଦେଇଛନ୍ତି। ଏହି କ୍ରମରେ ରାଜ୍ୟ ପର୍ଯ୍ୟଟନ ବିଭାଗର ଟ୍ୟାଗଲାଇନ ପରିବର୍ତ୍ତନ ପାଇଁ ନୂଆ ସରକାର ଆହ୍ୱାନ କରିଛନ୍ତି। ପୁରୁଣା ସରକାର ଯେଉଁ ଟ୍ୟାଗ ଲାଇନ୍ ରଖିଥିଲେ ତାହାକୁ ପରିବର୍ତ୍ତନ ପାଇଁ ନୂଆ ସରକାର ଆହ୍ୱାନ କରିଛନ୍ତି। ଏନେଇ ନିଷ୍ପତ୍ତି ହୋଇଥିବା କହିଛନ୍ତି ଉପ-ମୁଖ୍ୟମନ୍ତ୍ରୀ ପ୍ରଭାତୀ ପରିଡା।
ପୂର୍ବ ସରକାରରେ ରାଜ୍ୟ ପର୍ଯ୍ୟଟନ ବିଭାଗର ଟ୍ୟାଗ ଲାଇନ ରହିଥିଲା ଇଣ୍ଡିଆସ୍ ବେଷ୍ଟ କେପ୍ଟ ସିକ୍ରେଟ। ପର୍ଯ୍ୟଟନ ବିଭାଗର ଏହି ଟ୍ୟାଗଲାଇନ ପରିବର୍ତ୍ତନ ପାଇଁ ଏକ ପ୍ରତିଯୋଗିତା ଆରମ୍ଭ ହୋଇଛି। ୨୪ ଫେବ୍ରୁ୍ଆରୀରୁ ୧୫ ମାର୍ଚ୍ଚ ପର୍ଯ୍ୟନ୍ତ ଏହି ପ୍ରତିଯୋଗିତା ହେବ। ପର୍ଯ୍ୟଟନ ବିଭାଗ ୱେବସାଇଟ ମାଧ୍ୟମରେ ଟ୍ୟାଗଲାଇନକୁ ନେଇ ଲୋକଙ୍କ ମତାମତ ଗ୍ରହଣ କରାଯିବ। ଟ୍ୟାଗଲାଇନଟି ଗୋଟିଏ ଧାଡି ଓ ୬ଟି ଶବ୍ଦ ମଧ୍ୟରେ ରଖିବାକୁ ହେବ। ଟ୍ୟାଗଲାଇନ ଅର୍ଥ ବାବଦରେ ୧୦୦ ଶବ୍ଦ ମଧ୍ୟରେ ବୁଝାଇବାକୁ ହେବ। ଏହା ସମ୍ପୂର୍ଣ୍ଣ ନିଜସ୍ବ ହୋଇଥିବା ଆବଶ୍ୟକ।
ଯେଉଁ ଟ୍ୟାଗ ଲାଇନ ଅଧିକ ପସନ୍ଦ ଆସିବ, ସେହି ଟ୍ୟାଗଲାଇନକୁ ସରକାର ଆପଣାଇବେ। ଟ୍ୟାଗଲାଇନ ବିଜେତା ଲକ୍ଷେ ଟଙ୍କା ଜିତିପାରିବେ। ସବୁ ବର୍ଗର ଲୋକ ଏହି ପ୍ରତିଯୋଗିତାରେ ଭାଗ ନେଇପାରିବେ। ରାଜ୍ୟରେ ନୂଆ ସରକାର ଆସିବା ପରେ ନାଁ ପରିବର୍ତ୍ତନକୁ ନେଇ ରାଜନୀତି ତେଜିଛି। ବିଭିନ୍ନ ଯୋଜନାର ନାଁ ପରିବର୍ତ୍ତନ ହେଉଥିବା ବେଳେ ଏବେ ପର୍ଯ୍ୟଟନ ବିଭାଗର ନାଁ ପରିବର୍ତ୍ତନ ଆଡକୁ ଆଉ ପାଦେ ଆଗକୁ ବଢିଛନ୍ତି ରାଜ୍ୟ ସରକାର।