ଜମ୍ମୁ-କାଶ୍ମୀର ଏବଂ ଲଦାଖରେ ଜମି କ୍ରୟ ପାଇଁ ବିଜ୍ଞପ୍ତି ଜାରି କଲା ଗୃହ ମନ୍ତ୍ରଣାଳୟ

ଜମ୍ମୁ-କାଶ୍ମୀର: ଏଣିକି ଦେଶର ଯେକୌଣସି ବ୍ୟକ୍ତି ଜମ୍ମୁ-କାଶ୍ମୀର ଏବଂ ଲଦାଖରେ ଜମି କିଣିପାରିବେ। ଏନେଇ ଆଜି ଗୃହ ମନ୍ତ୍ରଣାଳୟ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି। ଏହି ବିଜ୍ଞପ୍ତି ଅନୁସାରେ ଦେଶର ଯେକୌଣସି ବ୍ୟକ୍ତି ଜମ୍ମୁ-କାଶ୍ମୀର ଏବଂ ଲଦାଖରେ ଜମି କିଣିପାରିବେ ଏବଂ ସେଠାରେ ବସବାସ କରିପାରିବ କିନ୍ତୁ ଚାଷ ଜମି ବିକ୍ରି କରାଯାଇ ପାରିବ ନାହିଁ। ଗୃହ ମନ୍ତ୍ରଣାଳୟ ଦ୍ବାରା ଜାରି ବିଜ୍ଞପ୍ତିରେ କୁହାଯାଇଛି ଯେ, ଏହି ଆଦେଶକୁ ଜାମ୍ମୁ କାଶ୍ମୀର ପୁନର୍ଗଠନ (କେନ୍ଦ୍ରୀୟ ଆଇନଗୁଡ଼ିକର ଅନୁପାଳନ) ତୃତୀୟ ଆଦେଶ- ୨୦୨୦ କୁହାଯିବ। ଏଥି ସହିତ ଏହି ଆଦେଶକୁ ତୁରନ୍ତ ଲାଗୁ କରାଯାଇଛି।

With notification of UT of Jammu and Kashmir Reorganisation (Adaptation of Central Laws) Third Order, 2020, twelve state laws have been repealed as a whole out of the 26 others adapted with changes and substitutes. https://t.co/JeBB5UvdbZ

— ANI (@ANI) October 27, 2020

ଏହି ନିୟମ ଲାଗୁ ପରେ ଜାମ୍ମୁ କାଶ୍ମୀରର ରାଜ୍ୟପାଳ ମନୋଜ ସିହ୍ନା କହିଛନ୍ତି ଯେ ଜମ୍ମୁ-କାଶ୍ମୀରରେ ଶିଳ୍ପ ପ୍ରତିଷ୍ଠା ପାଇଁ ଏହି ନିୟମ ସହାୟକ ହେବ। ଜମ୍ମୁ-କାଶ୍ମୀରରେ ବାହ୍ୟ ଶିଳ୍ପ ପ୍ରତିଷ୍ଠା କରାଗଲେ ଏଠାକାର ଯୁବକ ନିଯୁକ୍ତି ପାଇବେ। ତେଣୁ ଶିଳ୍ପ ଜମିର ବିନିଯୋଗ କରିବାର ଆବଶ୍ୟକତା ରହିଛି। କିନ୍ତୁ ଚାଷ ଜମି କେବଳ ରାଜ୍ୟବାସୀଙ୍କ ପାଖରେ ରହିବ।

ପୂର୍ବରୁ ଜମ୍ମୁ କାଶ୍ମୀରରେ କେବଳ ସେଠାକାର ବାସିନ୍ଦା ହିଁ ଜମି କ୍ରୟ କରିପାରୁଥିଲେ କିନ୍ତୁ ବର୍ତ୍ତମାନ ବାହାର ରାଜ୍ୟର ଲୋକେ ମଧ୍ୟ ଜମି କିଣି ସେଠାରେ ଶିଳ୍ପ ପ୍ରତିଷ୍ଠା ଆରମ୍ଭ କରିପାରିବେ। ଜମ୍ମୁ କାଶ୍ମୀର ପୁନର୍ଗଠନ ଅଧିନିୟମ ଅନୁଯାୟୀ କେନ୍ଦ୍ର ଗୃହ ମନ୍ତ୍ରଣାଳୟ ଏହି ନିଷ୍ପତ୍ତି ନେଇଛି। ଏଥିରେ କୌଣସି ଭାରତୀୟ ବର୍ତ୍ତମାନ ଜମ୍ମୁ କାଶ୍ମୀରରେ କାରଖାନା, ଘର କିମ୍ବା ଦୋକାନ ପାଇଁ ଜମି କିଣି ପାରିବେ। ଏଥିପାଇଁ ସ୍ଥାନୀୟ ବାସିନ୍ଦା ହେବାର ପ୍ରମାଣ ଆବଶ୍ୟକ ହେବ ନାହିଁ।