ଢେଙ୍କାନାଳ: ଢେଙ୍କାନାଳ ଜିଲ୍ଲା ଘଟିପିରି ନିକଟରେ କାରକୁ ଧକ୍କା ଦେଲା ଟିପ୍ପର। ଦୁର୍ଘଟଣାରେ ଆର୍ମି ଯବାନଙ୍କ ସମେତ ଦୁଇ ମୃତ। କାର୍ ଦୁର୍ଘଟଣା ଯୋଗୁଁ ଚାଲିଗଲା ଜଣେ ଆର୍ମି ଯବାନଙ୍କ ଜୀବନ।
ଏହି ଦୁର୍ଘଟଣାରେ ଏହି ଆର୍ମି ଯବାନଙ୍କ ସହ କାରରେ ଥିବା ତାଙ୍କର ଅନ୍ୟ ଜଣେବନ୍ଧୁଙ୍କର ମଧ୍ୟ ମୃତ୍ୟୁ ଘଟିଛି। ପୁରୁଣା କଟକ-ସମ୍ବଲପୁର ରାସ୍ତାର ଢେଙ୍କାନାଳ ଜିଲ୍ଲା ଘଟିପିରି ନିକଟସ୍ଥ ଧର୍ମକଣ୍ଟା ନିକଟରେ ମର୍ମନ୍ତୁଦ ଦୁର୍ଘଟଣା ଘଟିଛି। ମୃତ ଆର୍ମି ଯବାନ ଜଣଙ୍କ ସ୍ଥାନୀୟ ରାସୋଳ ଥାନା ଅନ୍ତର୍ଗତ ଗଣ୍ଡାନାଳୀ ଗ୍ରାମର ଗୋପବନ୍ଧୁ ରାଉତ ବୋଲି ଜଣାପଡିଛି।
ଅନ୍ୟ ଜଣଙ୍କ ହେଲେ ଭାପୁର କୋତ୍ତମ ଗ୍ରାମର ମନୋଜ ବେହେରା। ଗୋପବନ୍ଧୁ ଛୁଟିରେ ଗାଁକୁ ଆସିଥିବାବେଳେ ତାଙ୍କର ଘର କାମ ଯୋଗୁଁ ଢେଙ୍କାନାଳରେ ମିସ୍ତ୍ରୀକୁ ଛାଡି କାର୍ ଯୋଗେ ନିଜ ସାଙ୍ଗ ମନୋଜଙ୍କୁ ସହ ଘରକୁ ଫେରିଥିଲେ।
ତେବେ ବିପରୀତ ଦିଗରୁ ଆସୁଥିବା ଏକ ଟିପ୍ପର ତାଙ୍କୁ ଧକ୍କା ଦେଇଥିଲା। ଘଟଣାସ୍ଥଳରୁ ଉଭୟଙ୍କୁ ଗୁରୁତର ଅବସ୍ଥାରେ ଆମ୍ବୁଲାନ୍ସ ଯୋଗେ ଢେଙ୍କାନାଳ ମୁଖ୍ୟ ଡାକ୍ତରଖାନାକୁ ନିଆଯାଇଥିଲା। ମାତ୍ର ବାଟରେ ଉଭୟଙ୍କର ମୃତ୍ୟୁ ଘଟିଛି।
ସେପଟେ ଦୁର୍ଘଟଣା ଘଟିଥିବା ଟିପ୍ପର ଡ୍ରାଇଭର ଫେରାର ହୋଇଯାଇଥିବାବେଳେ ପୋଲିସ ଟିପ୍ପରକୁ ଜବତ କରିଛି।