ଭୁବନେଶ୍ବର: ଧରାପଡ଼ିଲା ଗ୍ୟାଙ୍ଗଷ୍ଟର ହାଇଦର। ଏସସିବି ହସ୍ପିଟାଲରୁ ଫେରାର୍ ହେବା ପରେ କମିଶନରେଟ୍ ପୋଲିସର ସ୍ପେଶାଲ ସ୍କ୍ୱାର୍ଡ ଗ୍ୟାଙ୍ଗଷ୍ଟର ହାଇଦରକୁ ଆଜି ଗିରଫ କରିଛି। ତେଲଙ୍ଗାନା ପୋଲିସ ସହ ମିଶି ଓଡିଶା ପୋଲିସ ହାଇଦରକୁ ଗିରଫ କରିଥିବା ନେଇ ଆଜି ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ପ୍ରେସମିଟ୍ କରି ସୂଚନା ଦେଇଛନ୍ତି।
ପ୍ରକାଶ ଯେ, ଗତ ଏପ୍ରିଲ ୧୦ ତାରିଖରେ ଏସସିବି ହସ୍ପିଟାଲରେ ଚିକିତ୍ସିତ ହେଉଥିବାବେଳେ ପୋଲିସକୁ ଚକମା ଦେଇ ହାଇଦର ଫେରାର୍ ହୋଇଯାଇଥିଲା। ନିୟୋଜିତ ଥିବା ସୁରକ୍ଷାକର୍ମୀଙ୍କୁ ଚକମା ଦେଇ ହାଇଦର ଫେରାର୍ ହୋଇଯାଇଥିଲା।
ଏଥିରେ ତାକୁ ତାର କିଛି ସହଯୋଗୀ ମଧ୍ୟ ସାହାଯ୍ୟ କରିଥିବା ପରେ ଖବର ମିଳିଥିଲା। ଏହାପରେ ହାଇଦର ରାଜ୍ୟ ବାହାରକୁ ଚାଲିଯାଇଥିବା ସନ୍ଦେହ କରାଯାଇଥିଲା। କିଛି ଦିନ ପାଇଁ ପୋଲିସ କଟକ ସହରରେ ମଧ୍ୟ ଚେକିଂକୁ କଡାକଡି କରିଥିଲା। ଏହାପରେ କମିଶନରେଟ୍ ପୋଲିସର ସ୍ୱତନ୍ତ୍ର ସ୍କ୍ୱାର୍ଡ ତେଲେଙ୍ଗାନା ପୋଲିସ ସହ ମିଶି ଆଜି ହାଇଦରକୁ ଗିରଫ କରିଛି।
ହାଇଦର ଫେରାର୍ ହୋଇଯିବା ପରେ ଲୋକମାନଙ୍କ ମନରେ ପୋଲିସକୁ ନେଇ ଏକ ଅସନ୍ତୋଷ ଭାବନା ଦେଖିବାକୁ ମିଳିଥିଲା। ଏବେ ହାଇଦର ପୁଣି ଗିରଫ ହେବା ଘଟଣା ଅନେକଙ୍କୁ ଆଶ୍ୱସ୍ତି ଦେଇଛି।