ଓଏଲ୍ ବ୍ୟୁରୋ: ବିଶ୍ୱବିଦ୍ୟାଳୟ ଅନୁଦାନ ଆୟୋଗ ୟୁଜିସି ଏକ ଗୁରୁତ୍ୱପୂର୍ଣ୍ଣ ବିଜ୍ଞପ୍ତି ଜାରି କରିଛି। ଯାହା ଏମଫିଲ ଡିଗ୍ରୀ କରିବାକୁ ଇଚ୍ଛୁକ ଥିବା ଛାତ୍ରଛାତ୍ରୀଙ୍କ ପାଇଁ ଅତି ଗୁରୁତ୍ୱପୂର୍ଣ୍ଣ। ଏମଫିଲ ଡିଗ୍ରୀ ପାଠ୍ୟକ୍ରମରେ ଆଡମିଶନ ନକରିବାକୁ ବିଶ୍ୱବିଦ୍ୟାଳୟ ଅନୁଦାନ ଆୟୋଗ ଏକ ବିଜ୍ଞପ୍ତି ଜାରି କରିଛନ୍ତି। କାରଣ ଏହା ଆଉ ଏକ ସ୍ୱୀକୃତିପ୍ରାପ୍ତ ଡିଗ୍ରୀ ନୁହେଁ। ୨୦୨୩-୨୪ ଶିକ୍ଷାବର୍ଷ ପାଇଁ ଏହା ଅବୈଧ ହୋଇଥିବାରୁ ଏମଫିଲ ପାଠ୍ୟକ୍ରମରେ ଆଡମିଶନ ନଦେବାକୁ ଆୟୋଗ ବିଶ୍ୱବିଦ୍ୟାଳୟଗୁଡ଼ିକୁ ଚେତାବନୀ ଦେଇଛି।
କମିଶନ କହିଛନ୍ତି ଯେ କିଛି ବିଶ୍ୱବିଦ୍ୟାଳୟ ଏମଫିଲ ପାଠ୍ୟକ୍ରମ ପାଇଁ ନୂତନ ଆବେଦନକୁ ଆମନ୍ତ୍ରଣ କରୁଛନ୍ତି। କମିଶନ କହିଛନ୍ତି ଯେ, ଏମଫିଲ ଡିଗ୍ରୀ ଆଉ ଏକ ସ୍ୱୀକୃତିପ୍ରାପ୍ତ ଡିଗ୍ରୀ ନୁହେଁ। ବିଜ୍ଞପ୍ତି ଜାରି କରି ଆୟୋଗ ୟୁଜିସି ନିୟମାବଳୀ ୨୦୨୨ର ରେଗୁଲେସନ ନମ୍ବର ୧୪ ଉପରେ ଗୁରୁତ୍ୱାରୋପ କରିଛନ୍ତି, ଯାହା ଉଚ୍ଚଶିକ୍ଷା ପ୍ରତିଷ୍ଠାନରେ ଏମଫିଲ ପାଠ୍ୟକ୍ରମ ଚଳାଇବାକୁ ସ୍ପଷ୍ଟ ଭାବରେ ବାରଣ କରିଛି। ୟୁଜିସି ପୂର୍ବରୁ ଏମଫିଲ ଡିଗ୍ରୀକୁ ବେଆଇନ ଘୋଷଣା କରିଥିଲା ଏବଂ ଉଚ୍ଚ ଶିକ୍ଷାନୁଷ୍ଠାନଗୁଡ଼ିକୁ ଏମଫିଲ ପାଠ୍ୟକ୍ରମ ପ୍ରଦାନ ନକରିବାକୁ ନିର୍ଦ୍ଦେଶ ଦେଇଥିଲା। ୨୦୨୩-୨୪ ଏକାଡେମିକ୍ ଅଧିବେଶନ ପାଇଁ ଯେକୌଣସି ଏମଫିଲ କାର୍ଯ୍ୟକ୍ରମକୁ ତୁରନ୍ତ ବନ୍ଦ କରିବାକୁ ଆୟୋଗ ବିଶ୍ୱବିଦ୍ୟାଳୟଗୁଡ଼ିକୁ କହିଛନ୍ତି।